ESERA, 8 - Samoan Old Version Bible

O LE MATAUPU VIII.O le malaga a Esera i Ierusalema.

1O i latou nei o matai sili, ma le tusi gafa o i latou e na o ae faatasi ma a‘u ai Papelonia i le nofoaiga a le tupu o Aretaseta.

2O lo le fanauga a Fineaso, o Keresona; o lo le fanauga a Itamaro, o Tanielu; o lo le fanauga a Tavita, o Hatusa.

3O lo le fanauga a Sakania, o lo le fanauga a Parose, o Sakaria; ma ua ia te ia e ua tusigafaina o tane e toaselau ma le toalimagafulu.

4O lo le fanauga a Paka-moapi, o Elioenai le atalii o Serakia, ma ua ia te ia o tane e toalua lau.

5O lo le fanauga a Sekania; o le atalii o Iaaseelu, ma ua ia te ia o tane e toatolu selau.

6O lo le fanauga a Atini, o Epete le atalii o Ionatana, ma ua ia te ia o tane e toalimagafulu.

7O lo le fanauga a Elama, o Isaia le atalii o Atalia, ma ua ia te ia o tane e toafitugafulu.

8O lo le fanauga a Sefatia, o Sepatia le atalii o Mekaeli, ma ua ia te ia o tane e toavalugafulu.

9O lo le fanauga a Ioapo, o Opetaia le atalii o Ikieli, ma ua ia te ia o tane e toalua lau ma le toatinoagafulu ma le toavalu.

10O lo le fanauga a Salome, o le atalii o Iosefia, ma ua ia te ia o tane e toaselau ma le toaonogafulu. O lo le fanauga a Pepai, o Sakaria le atalii o Pekai,

11ma ua ia te ia o tane e toaluafulu ma le toavalu.

12O lo le fanauga a Asegata, o Iokana le atalii o Hakatana, ma ua ia te ia o tane e toaselau ma le toasefulu.

13O le fanauga a Atonikama, o e na mulimuli, o latou igoa foi nei, o Elipelete, o Ieielu, ma Semaia, ma ua ia te i latou o tane e toaonogafulu.

14O le fanauga a Pikevai; o Utai ma Saputo, ma ua ia te i laua o tane e toafitugafulu.

15Ua ou faapotopotoina i latou i le vaitafe ua tafe atu i Aava; ona nonofo lea o i matou i lea mea i aso e tolu; ua ou suesue foi i le nuu ma le au faitaulaga, a e lei maua i lea mea ni o le fanauga a Levi.

16Ona ou aamiatua lea o Elisara, ma Arielu, ma Semaia, ma Elenatana, ma Iaripa, ma Elenatana, ma Natano, ma Sakaria, ma Mesulama, o alii i latou; atoa ma Iaripa, ma Elenatano, o tagata popoto i laua.

17Ua ou aauina atu i latou ia Itu le alii i le nuu o Kasipeia, ua ou tuuina atu foi ia te i latou o upu latou te fai atu ai ia Itu, ma ona uso le au netini, na i le nuu o Kasipeia, ia latou tuuina mai ia te i matou ni e auauna i le fale o lo matou Atua.

18Ona latou tuuina mai lea ia te i matou, e tusa ma le aao alofa o lo matou Atua na ia te i matou, o le tagata faautauta o lo le fanauga a Maali le atalii o Levi, o le atalii ia o Isaraelu; ma Serepeia, ma ona atalii, ma ona uso, e toatinoagafulu ma le toavalu;

19ma Hasapea, ma ua ia te ia Isaia o lo le fanauga a Merari, o ona uso ma o latou atalii e toaluafulu;

20ma nisi o le au netini e na tofia e Tavita ma alii i le galuega a sa Levi, o netini e toalua lau ma le toaluafulu, na ta‘ua i latou uma i o latou igoa.

21Ona ou tala‘iina lea o le anapogi i lea mea i le vaitafe o Aava, ia faatigaina i matou e i matou i luma o lo matou Atua, e saili mai ia te ia se ala tonu mo matou, ma o matou tama iti, ma a matou mea uma.

22Auā na ou mā i faatoga i le tupu i se ‘au ma ni e tietie i solofanua e fesoasoani ia i matou i e saua mai i le ala; auā na matou fai atu i le tupu, ua faapea, O le aao o lo matou Atua ua i luga ia te i latou uma o e sailiili atu ia te ia e lelei ai i latou; a o lona mamana ma lona toasa ua i luga ia te i latou uma o e tuua o ia.

23Ua matou anapopogi foi ma sailiili i lo matou Atua ona o lea mea, ma ua faafofoga mai ai o ia ia te i matou.

24Ona ou vavaeeseina lea ni alii o le au faitaulaga e toasefulu ma le toalua, o Serepeia, ma Hasapea, ma ua ia te i laua ni o latou uso e toatinoagafulu.

25Ona ou fuatia lea ia te i latou o le ario, ma le auro, ma ipu, o taulaga i le fale o lo matou Atua na faia e le tupu, ma ana faipule, ma alii ua ia te ia, ma Isaraelu uma e na i ai i lea mea;

26na ou fuatia i o latou lima o taleni o ario e ono selau ma le limagafulu, ma taleni e selau o ipu ario, ma taleni o auro e selau;

27o ipu auro foi e luafulu, e afe o tareki ia; ma ipu ‘apa memea pupula e lelei e lua e tāua e tusa ma auro.

28Ona ou fai atu lea ia te i latou, Ua paia outou mo Ieova; ua paia foi ipu; o le ario foi ma le auro o le taulaga lea ua fai ma le loto ia Ieova le Atua o outou tamā;

29ia outou mataala, ma tausi i ai seia outou fuaina atu ai i luma o alii o le au faitaulaga, ma sa Levi, ma matai sili o Isaraelu, i Ierusalema, i potu o le fale o Ieova.

30Ona talia lea e le au faitaulaga ma sa Levi o le fua o le ario, ma le auro, ma ipu, e faaoo ai i Ierusalema i le fale o lo matou Atua.

31Ona matou o ai lea nai le vaitafe o Aava i le aso e sefulu ma le lua o le masina muamua, o le a o i Ierusalema; na i ai le aao o lo matou Atua i luga ia te i matou, ma ua ia laveaiina i matou ai lima o e saua, ma e lamalama mai i le ala.

32Ua matou oo foi i Ierusalema, ma nonofo ai i aso e tolu.

33O le fa o aso foi na fuaina ai le ario, ma le auro, ma ipu, i le fale o lo matou Atua i le lima o Meremota le atalii o Uria le faitaulaga, ua ia te ia foi Eleasaro le atalii o Fineaso; ua faatasi foi ma i laua o Iosapata le atalii o Iosua, ma Noateia le atalii o Pinui o sa Levi i laua.

34Ua faitauina ma fuatia ia mea uma, ma ua tusia le fua o ia mea uma i lea lava aso.

35O e na o mai mai le tafeaga, o tagata na aunuua, na latou osia taulaga mu i le Atua o Isaraelu, o povi poa e sefulu ma le lua mo Isaraelu uma, ma mamoe poa e ivagafulu ma le ono, ma tamai mamoe e fitugafulu ma le fitu, ma ‘oti poa e sefulu ma le lua, o le taulaga mo le agasala o ia mea uma o taulaga mu ia Ieova.

36Ua latou tuuina atu foi le poloaiga a le tupu i alii sili na tofia e le tupu, ma alii e pule i ona tala mai o le vaitafe, ona latou fesoasoani lea i le nuu, ma le fale o le Atua.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help