1Oi talofa i le aai o e fasi tagata! ua tumu lava i le pepelo ma le saua; ua le aveeseina ai lava le mea na saeia.
2O le paō o le sasa, o le taalili o mea taavalevale, o solofanua ua feasofai, ma kariota ua osooso.
3Ua i ai le oso ae o e ua tietie i solofanua, ma le fepulafi mai o pelu, o le emoemo mai foi o tao; o le toatele foi o e ua fāsia, ma le faupuega o tagata oti; e le masino tagata oti, ua latou tautevateva i o latou tagata oti.
4Ona o le tele o le talitane o le fafine talitane o le ua lalelei, o le tamaitai taulāitu, o le ua faatau atu nuu i lona talitane atoa ma aiga o ana togafiti faataulāitu.
5O loo faapea mai Ieova o ‘au, Faauta, ou te fai oe mo‘u fili, ou te susue ae foi ou lavalava, ma lafo ae i ou mata, ou te faaali atu lou tino i atu nuu, e faaali foi lou mā i malo.
6Ou te lafo mea leaga i luga ia te oe, ou te faainosia foi oe, ma ou faia oe ma mataaga.
7Ona oo ai lea ina sosola ese ia te oe o i latou uma o e vaai atu ia te oe, ma latou faapea ane, Ua faatafunaina Nineva! o ai se faamafanafana i ai? Po ifea ou te saili ai nisi e faamatalaloto ia te oe?
8Pe sili ea oe ia Noamoni, o le sa nofo i vaitafe, sa siomia foi i le vai, o lona malosi o le vai tele lea, sa i ai lona pa i le vai tele?
9O Aitiope o lona malosi lea, atoa ma Aikupito, sa le masino foi ona tagata; o Futu ma Lipua o ou fesoasoani ia.
10A ua tāfea o ia, ua alu o ia faatasi ma e ua faatagataotauaina; o ana tama iti foi sa palasi i tuluiga o ala uma; sa fai foi le vili i ona alii mamalu, sa nonoa foi ona alii sili uma i maea uamea.
11O oe foi e te inu ia onā; e te lafi lava; o oe foi e te saili se ‘olo ona o le ua ita ia te oe.
12O ou ‘olo uma ua ni mati ia, o loo i ai fua e muai matua; afai e luluina, ona toulu ai lea i le gutu o le ‘ai ai.
13Faauta, o lou nuu i totonu ia te oe ua ni fafine lava, e matuā avanoa faitotoa o lou nuu i e o fai oe ma fili, e susunuina au faamaufaalava i le afi.
14Ia e utuina vai, auā o le a siosioina oe, ina teu ia ia malolosi ou ‘olo; alu ia i le palapala, ina soli ia le omea, ia teu ia malosi le mea e tunu ai maaomea.
15E susunuina oe i le afi i lea mea, e fasia oe i le pelu, na te ‘aina lava oe pei o le sē aleka, ia faatoateleina oe pei o sē aleka, ia faatoateleina oe pei o sē akerise.
16Ua e faatoateleina ou tagata faatau e sili i fetu o le lagi; ua salalau sē aleka, ona lele ese ai lea.
17O ou alii sili e pei o sē akerise ia, ma ou alii e pulea ‘au e pei o sē akerise aupito tetele ia, o e nonofo i āi i le aso maalili, ua alu ae le la, ona sosola ai lea, e le iloa foi le mea latou te i ai.
18Le tupu o Asuria e, o loo momoe ou leoleo mamoe, o taooto ou alii sili; ua faataapeapeina lou nuu i mauga, e leai foi se na te faapotopotoina i latou.
19E leai sina feoloolo o lou malaia, e matuā leaga lou manua; o i latou uma o e faalogologo i le tala ia te oe, latou te pati lima ia te oe; auā o ai se tasi ua le oo i ona luga lau amio leaga e le aunoa?
Who We AreWhat We EelieveWhat We Do
2025 by iamachristian.org,Inc All rights reserved.
