1Sa i Kaisareia le tasi tagata o Konelio le igoa, o le ta‘ita‘i o le toaselau i le ‘au e igoa i le ‘au a Italia;
2o le tagata amio Atua, ma le mata‘u i le Atua, atoa ma lona aiga uma, o lē avatu mea alofa e tele i le nuu, ma ua tatalo i le Atua e le aunoa.
3Ua na iloa tino i le faaaliga, i le itu aso pe iva, o le agelu a le Atua ua ulufale mai ia te ia, ua faapea mai ia te ia, Konelio e.
4Ua pulatoa o ia ia te ia, ona fefe ai lea, ua faapea atu, Le alii e, se a ea? Ua fai mai o ia ia te ia, Ua o ae au tatalo ma au mea alofa o fai ma faamanatuga i luma o le Atua.
5O lenei, aau atu ia ni tagata i Iopa e aami ia Simona e igoa ia Peteru;
6o loo nonofo ia ma le tasi Simona o le fai pa‘u o manu, e latalata i le sami lona fale; o ia na te ta‘u atu ia te oe mea e tusa ona e faia.
7Ua alu le agelu sa tautala ma Konelio, ona valaau lea o ia i ana auauna e toalua, ma le tagata tau e amio Atua o le tasi o i latou e le te‘a ia te ia;
8ua ia faamatala ia te i latou mea uma, ona aau atu lea o ia ia te i latou i Iopa.
9O le taeao, a o i le ala i latou, ma ua latalata i le aai, ua alu ae ai Peteru i luga o le fale e tatalo i le itu aso pe ono.
10Ua matelaina o ia, ua manatu e ‘ai; o latou o sauni, ua oo ia te ia le faalia;
11ua vaai atu i le lagi ua avanoa, ma le tasi mea ua alu ifo ia te ia, pei se ie lautele, ua noatia i ona pito e fa, ma tuutuu ifo i le lalolagi;
12ua i ai manu vaefa uma lava e tataa, ma manu feai, ma mea fetolofi, ma manu felelei.
13Ona tūlei mai lea o le siufofoga ia te ia, Peteru e, ina tu ia i luga, ina fasi, ma ‘ai.
14A ua fai atu Peteru, Le Alii e, aua lava; auā ou te lei ‘ai lava se mea e sa, po o se mea e leaga.
15Ua foi faalua mai le siufofoga ia te ia, O mea ua faamamāina e le Atua, aua e te ta‘ua e sa.
16Ua fai faatolu mai lenei mea; ona toe avea lea o le mea i le lagi.
17Ua masalosalo Peteru i lona lava loto pe se a lea faaaliga ua iloa e ia, faauta foi, o tagata na aauina e Konelio, sa latou saili i le fale o Simona,
18ua tutū mai i le faitotoa, o valaau ma fesili, po o nofo ai Simona e igoa ia Peteru.
19Ua manatunatu ifo Peteru i le faaaliga, a e fetalai mai le Agaga ia te ia, Faauta, o loo saili mai tagata e toatolu ia te oe.
20A e tu ia i luga, ina alu ifo, tou te o ma i latou, aua lava le masalosalo vale; auā ua aauina i latou e a‘u lava.
21Ona alu ifo lea o Peteru i tagata na aauina e Konelio ia te ia, ua fai atu ai, Faauta, o a‘u lenei ua outou saili na; se a le mea ua outou o mai ai?
22Ona fai mai lea o i latou, O Konelio le ta‘ita‘i o le toaselau, o le tagata amiotonu, ma le mata‘u i le Atua, ua ta‘uleleia e le nuu o Iutaia uma lava, na poloaiina o ia mai le Atua e le agelu paia e aami ia te oe, e te alu i lona fale, ia faalogo o ia i upu ua ia te oe.
23Onafai atu lea o ia ia te i latou e o mai i le fale, ua na talia foi i latou. O le taeao foi ua latou o ai ma Peteru, ua o foi faatasi ma ia nisi o le au uso mai Iopa.
24O le tasi taeao foi ua oo atu ai i latou i Kaisareia. Ua faatali foi Konelio ia te i latou, ua faapotopotoina e ia lona aiga ma ana aumea mamae.
25Ua ulufale atu Peteru, ona faafetaiai lea o Konelio ia te ia, ua faapaū i ona vae, ua ifo ia te ia.
26A ua faatu e Peteru ia te ia, ua faapea atu, Ina tu ia i luga; o a‘u nei lava o le tagata.
27Ona ulufale lea, o loo tautala i laua, ua iloa e ia e toatele ua faapotopotoina.
28Ua fai atu o ia ia te i latou, Ua outou iloa lava ua sa i le tagata Iutaia ona faatasi pe faalatalata i le tagata ese; a ua faasino mai e le Atua ia te au aua ou te ta‘uina atu ua sa pe leaga se tasi tagata.
29O le mea lea ua ou sau ai ma le le fe‘alo‘alofai, ina ua aami atu o a‘u; o lenei, ou te fesili atu, se a le mea ua outou aami atu ai a‘u?
30Ona fai mai lea o Konelio, Anā po fa sa ou anapogi ai, na oo i le itu aso faapenei; o le itu aso e iva foi sa ou tatalo ai i lo‘u fale, faauta foi, na tu mai le tagata i o‘u luma ma le ofu pupula, ua na fai mai,
31Konelio e, ua faafofogaina lau tatalo, ua manatua foi au mea alofa i luma o le Atua.
32O lenei, ia e aauina atu nisi i Iopa, e aami ia Simona, e igoa ia Peteru; o loo nofo o ia i le fale o Simona, le fai pa‘u o manu, e latalata i le sami; a sau o ia, na te tautala mai ia te oe.
33O lea na ou aauloaina atu ai nisi; ua lelei lava ina ua e maliu mai. O lenei, o loo iinei i matou uma lava i luma o le Atua e faalogologo atu i mea uma lava ua poloai mai ai le Atua ia te oe.
34Ona oo atu lea o le lauga a Peteru, ua faapea atu, E moni, ua ou iloa e le faailogaina tagata e le Atua;
35a e peitai o le mata‘u ia te ia i nuu uma lava, ma fai le amiotonu ua talia i latou e ia.
36Ua outou iloa le upu na molia e ia i le fanauga a Isaraelu, ua folafola ai le tala lelei o le manuia ia Iesu Keriso, o le Alii ia o tagata uma lava;
37o le upu lea sa i Iutaia uma, na afua i Kalilaia, ina ua mavae o le papatisoga sa tala‘iina e Ioane;
38o Iesu o le Nasareta, o le na faauuina e le Atua i le Agaga Paia ma le mana, o ia sa femaliuai ma agalelei ma faamalolo atu i e na faatoilaloina uma lava e le tiapolo; auā sa ia te ia le Atua.
39O molimau foi i matou i mea uma lava na faia e ia i le nuu o Iutaia atoa ma Ierusalema; o le na fasiotia foi e i latou i lo latou faatautau i le laau.
40O ia na toe faatuina e le Atu i le aso tolu,
41ma na faaalitinoina o ia, e le o le nuu, uma lava, a o molimau na uluai filifilia e le Atua, o i matou nei lava sa matou aai ma feinu ma ia, ina ua toe tu mai o ia i e ua oti.
42Ua na poloai mai foi ia te i matou e tala‘i atu i le nuu, ma molitino atu, o ia lava le ua tofia e le Atua e fai ma faamasino i e o ola ma e ua oti.
43Ua molitinoina mai o ia e le au perofeta uma, ona o lona suafa e maua ai le faamagalo o agasala a ē faatuatua ia te ia uma lava.
44Ua tautala atu Peteru i nei upu, a e afio ifo le Agaga Paia ia te i latou uma lava o e ua faalogo i le upu.
45Ona matuā ofo lea e na peritomeina o e faatuatua, o e na o mai ma Peteru, ina ua liligi ifo i nuu ese le alofa o le Agaga Paia.
46Auā ua latou faalogo atu ia te i latou ua tautala mai i gagana eseese, ma vivii atu i le Atua. Ona fai atu lea o Peteru,
47E mafai ea e se tasi ona vavao i le vai, ina ia le papatisoina ai i latou nei, o e ua maua le Agaga Paia pei o i tatou nei?
48Ua fai atu foi o ia ia papatisoina i latou i le suafa o le Alii. Ona aioi lea o i latou ia te ia ia latou nonofo ma ia i nisi aso.
Who We AreWhat We EelieveWhat We Do
2025 by iamachristian.org,Inc All rights reserved.
