1Ua fetalai mai foi Ieova ia Mose, ua faapea mai,
2Ia e fai atu i le fanauga a Isaraelu, ia faapea atu ia te i latou, O le taulaga ia te au, o a‘u mea e ai mo taulaga ia te au e fai i le afi, o le mea manogi lelei ia te au, ia outou anaana i ai, ina ia aumaia ia te au i o latou aso ua atofaina.
3E te fai atu foi ia te i latou, O le taulaga e fai i le afi lenei tou te avatua ia Ieova; e tailua tamai mamoe i aso e tasi lo la tausaga, e sao ona lelei, e fai ma taulaga mu e le aunoa.
4E te osia le tasi tamai mamoe i le taeao, ma le isi tamai mamoe e te osia i le afiafi.
5O le omera e tasi o le falaoa lelei e palua ma lona vaega e fa o le sinu o uu ua tu‘ia e fai ma taulaga i mea e ‘ai.
6O le taulaga mu e le aunoa lea ua faatuina i le mauga o Sinai, e fai ma mea manogi lelei, o le taulaga e fai i le afi ia Ieova.
7O lana taulaga i mea e inu o lona vaega e fa lea o le sinu o le uaina i tamai mamoe taitasi; ia sasaaina i le malumalu e fai ma taulaga i mea e inu o le uaina oona a Ieova.
8O le isi tamai mamoe foi e te osia lea i le afiafi; e te osia ai foi e pei o le taulaga i mea e‘ai o le taeao, ma lana taulaga i mea e inu; o le taulaga e fai i le afi, o le mea manogi lelei ia Ieova.
9A o le aso sapati ia lua ni tamai mamoe e tasi lo la tausaga, e sao ona lelei; e lua omera foi o le falaoa lelei e palua ma le suāuu e fai ma taulaga i mea e ‘ai, atoa ma lana taulaga i mea e inu.
10O le taulaga mu lea i sapati uma, e faaopoopoina i le taulaga mu e le aunoa, ma lana taulaga i mea e inu.
11O amataga foi o outou masina tou te avatua ai le taulaga mu ia Ieova; o povi poa taanoa e lua, ma se mamoe poa e tasi, ma tamai mamoe e fitu, e tasi lo latou tausaga, e sao ona lelei.
12Ia taitasi le povi poa ma omera e tolu o falaoa lelei e palua ma le suāuu, e fai ma taulaga i mea e ‘ai; mo le mamoe poa foi e lua omera o falaoa lelei e palua ma le suāuu, e fai ma taulaga i mea e ‘ai.
13Ia taitasi le tamai mamoe ma le omera e tasi o le falaoa lelei e palua ma le suāuu, e fai ma taulaga i mea e ‘ai; o le taulaga mu lea, o le mea manogi lelei, o le taulaga e fai i le afi ia Ieova.
14O a latou taulaga i mea e inu; ia taitasi le povi poa ma le vaeluagalemu o le sinu o le uaina; mo le mamoe poa foi o lona vaetolugalemu o le sinu; ia taitasi le tamai mamoe ma lona vaega e fa o le sinu; o le taulaga mu lea e fai i masina, o masina uma o le tausaga.
15Ia osia foi ia Ieova o le tamai ‘oti poa e tasi e fai ma taulaga mo le agasala, e faaopoopoina i le taulaga mu e le aunoa, ma lana taulaga i mea e inu.
16O le uluai masina, o le aso e sefulu ma le fa i le masina e fai ai le paseka ia Ieova.
17O le aso e sefulu ma le lima o lea masina e fai ai le tausamiga; o aso e fitu e ‘aina ai areto e le faafefeteina.
18O le aso muamua e fai ai le faapotopotoga paia; aua tou te fai ai se galuega mamafa e tasi.
19A e tou te avatua le taulaga e fai i le afi, o le taulaga mu ia Ieova; o povi poa taanoa e lua, ma le mamoe poa e tasi, ma tamai mamoe e fitu e tasi lo latou tausaga, ia sao ona lelei mo outou.
20O a latou taulaga foi i mea e ‘ai o falaoa lelei e palua ma le suāuu; tou te osia omera e tolu i povi poa e taitasi, ma omera e lua i le mamoe poa.
21E te osia le omera e tasi i tamai mamoe taitasi e faatatau i tamai mamoe e fitu.
22O le ‘oti foi e tasi o le taulaga mo le agasala e fai a‘i se togiola mo outou.
23Tou te osia ia taulaga e faaopoopoina i le taulaga mu o le taeao, o le taulaga mu e le aunoa lea.
24E faapea lava ona outou faia i aso uma i ia aso e fitu, o mea e ‘ai o le taulaga e fai i le afi, o le mea manogi lelei ia Ieova; e faia lava ia e faaopoopoina i le taulaga mu e le aunoa, atoa ma lana taulaga i mea e inu.
25Ia faia e outou le faapotopotoga paia i le aso fitu; aua tou te fai ai se galuega mamafa e tasi.
26O le aso foi o mea e faapolopoloina, pe a outou avatua le taulaga i mea e ‘ai fou ia Ieova, pe a mavae o outou vaiasosa, ia faia e outou le faapotopotoga paia; tou te le fai ai se galuega mamafa e tasi.
27A e tou te avatua le taulaga mu e fai ma mea manogi lelei ia Ieova; o povi poa taanoa e lua, ma le mamoe poa e tasi, ma tamai mamoe e fitu e tasi lo latou tausaga.
28O a latou taulaga foi i mea e ‘ai o falaoa lelei e palua ma le suāuu, e tolu omera i povi poa e taitasi, e lua omera i le mamoe poa e tasi.
29O le omera e tasi i tamai mamoe taitasi e faatatau i tamai mamoe e fitu.
30O le ‘oti poa e tasi e fai a‘i se togiola mo outou.
31Tou te osia ia taulaga e faaopoopoina i le taulaga mu e le aunoa, ma lana taulaga i mea e ‘ai, atoa ma a latou taulaga i mea e inu; ia sao ona lelei mo outou.
Who We AreWhat We EelieveWhat We Do
2025 by iamachristian.org,Inc All rights reserved.
