1Ua mavae ia mea uma ona o atu ai lea o Isaraelu uma sa i le tausamiga i aai o Iuta, ma latou tu‘imomoia o tupua, ma vavae i lalo o tupua o Asaira, ma lepetia mea maualuluga, ma fata faitaulaga, sa i Iuta uma, ma Peniamina, ma Efaraima, ma Manase, ua oo ina faaumatia. Ona toe foi ai lea o le fanauga uma a Isaraelu, e taitasi i lona tofi, i a latou aai.
2Ona tofia lea e Esekia o vasega o le au faitaulaga, ma sa Levī, e tusa ma o latou vasega, e taitasi le tagata e tusa ma lana galuega, o le au faitaulaga ma sa Levī, e fai ai taulaga mu ma taulaga faafetai, e auauna, ma faafetai, ma vivii atu i faitotoa o toagālauapi a Ieova.
3Ua tuuina foi o le vaega o oloa a le tupu mo taulaga mu, o taulaga mu i le taeao ma le afiafi, ma taulaga mu i sapati, ma masina faatoa vaaia, ma tausamiga, e pei ona tusia i le tulafono a Ieova.
4Ua ia fai atu foi i le nuu o e ua nonofo i Ierusalema ia au mai le vaega o mea mā le au faitaulaga ma sa Levī, ina ia faamalosia i latou i le tulafono a Ieova.
5Ua oo atu le poloaiga, ona au mai ai lea o mea e tele e le fanauga a Isaraelu, o le faapolopolo o saito, ma uaina, ma suāuu, ma meli, ma le fua uma o le laueleele; o mea foi e sefulu a‘i mea uma na latou aumaia e tele lava.
6O le fanauga foi a Isaraelu ma Iuta, o e ua nonofo i aai o Iuta, na latou aumaia foi o mea e sefulu a‘i povi, ma mamoe, ma mea e sefulu a‘i mea paia ua faasaina ia Ieova lo latou Atua, ma latou tuu i faupuega.
7Na amata ona fai o faupuega i le tolu o masina, a ua faauma ona fai i le fitu o masina.
8Ona o mai lea o Esekia ma alii, ua matamata i faupuega, ona latou faamanu atu lea ia Ieova, ma lona nuu o Isaraelu.
9Ona fesili atu lea o Esekia i le au faitaulaga ma sa Levī pe faapefea faupuega.
10Ona tali mai lea ia te ia o Asaraia le faitaulaga sili o le aiga o Satoka, ua faapea mai, Talu ona amata ona au mai o taulaga i le fale o Ieova, ua tele a matou mea e ‘ai, ua tele foi mea o totoe; auā ua faamanuia e Ieova o lona nuu; ma ua totoe o nei mea e tele.
11Ona fai atu ai lea o Esekia ia sauniuni ni potu i le fale o Ieova; ona latou sauni ai lea.
12Ona latou au mai ai lea ma le faamaoni o taulaga, ma mea e sefulu a‘i mea, ma mea ua faasaina; na pule ai foi Kononia o lo sa Levī, ma Semi lona uso o lē aupito ane ia te ia.
13O leielu foi, ma Asesau, ma Nakato, ma Asaelu, ma Ierimota, ma Iosapata, ma Elielu, ma Isemakia, ma Makata, ma Penaia, o matai ia ua pule i ai Kononia ma Semi lona uso, e tusa ma le poloai mai ia Esekia le tupu, ma Asaraia o le pule i le fale o le Atua.
14O Kori le atalii o Iemina o lo sa Levī, o le leoleo faitotoa i le itu i sasae, ua pule o ia i taulaga ua loto lava tagata ina fai i le Atua, e tufatufa taulaga a Ieova, ma mea ua sili ona paia.
15O e ua aupito ane ia te ia o Etena, ma Meneamina, ma Iosua, ma Semaia, ma Amaria, ma Sekania, i aai o le au faitaulaga, e avatu ai ma le faamaoni i o latou uso, e tusa ma o latou vasega, o e ua sili atoa ma e iti;
16e faaopoopoina o e ua tusia i le gafa o tane, e afua i e ua tolu o latou tausaga atoa ma e ua matutua ai, e avatu ia te i latou taitasi o e ulufale i le fale o Ieova, o le aso ma le mea e avatu mo a latou galuega i o latou tausiga e tusa ma o latou vasega;
17ma e ua tusia i le gafa o le au faitaulaga i aiga o latou tamā, ma sa Levī e afua i e ua luafulu o latou tausaga atoa ma e ua matutua ai, i o latou tausiga e tusa ma o latou vasega;
18ma e ua tusia i le gafa, o latou tama iti uma, o a latou avā, ma o latou atalii, ma o latou afafine, i le faapotopotoga uma; auā ua matuā faapaiaina i latou e i latou i o latou lava tofiga;
19o le fanauga foi a Arona o le au faitaulaga sa i fanua o tuāfanua o a latou aai, i aai taitasi uma, o tagata ua ta‘ua o latou igoa, e avatu ai tufaaga i tane uma o i le au faitaulaga, ma i latou uma ua tusia i le gafa o sa Levī.
20Sa faapea ona faia e Esekia i Iuta uma, ua ia faia foi le amio lelei, ma le tonu, ma le faamaoni i luma o ieova lona Atua.
21O mea uma na ia amata ona fai i le galuega o le fale o le Atua, ma le tulafono, ma poloaiga e sailiili i lona Atua, ua faia e ia ma lona loto atoa, ma ua manuia.
Who We AreWhat We EelieveWhat We Do
2025 by iamachristian.org,Inc All rights reserved.
