1Ona tago lea o Samuelu i le fagu uu, ua liligi ifo ai i lona ulu, ma sogi ia te ia; ua fai mai. E le ua faauu ea oe e Ieova e fai ma alii i lona tofi?
2A ē alu ese nei ia te au, e te maua atu tagata e toalua i le tuugamau o Rasela i le tuaoi o Peniamina i Selesa; e fai mai i laua ia te oe, Ua maua asini na e alu e saili; faauta foi, ua tuu e lou tamā lona manatu i asini, a e atuatuvale ona o oulua, o loo faapea ia, Se a se mea ou te faia ona o lo‘u atalii?
3Ona e alu atu lea nai lea mea, e te oo atu i le aluna o Tapora, tou te fetaiai ai ma tagata e toatolu o loo o ae i latou i le Atua i Peteli; o loo ave e le tasi tamai ‘oti e tolu, o loo ave e le tasi potoi areto e toagafua, o loo ave e le tasi le fagu pa‘u o uaina.
4E ofo mai i latou ia te oe, latou te foai mai foi ia te oe o potoi areto e lua, e te talia foi nai o latou lima.
5Mulimuli ane e te oo i le mauga o le Atua, o loo i ai le leoleoga a Filisitia; a ē oo i ai i le aai, ona fetaiai lea ma oe le au perofeta o loo o ifo i le mea maualuga, o loo muamua i o latou luma napeli, ma topa, ma fagufagu, ma kitara, e perofeta ane foi i latou.
6Ona osofia lea o oe e le Agaga o Ieova, e te perofeta foi oe faatasi ma i latou; e liua oe peiseai se isi tagata.
7A oo mai nei faailoga ia te oe, faitalia oe ona fai o se mea e te manatu ai ua tatau, auā o loo ia te oe le Atua.
8E te muamua ifo ia te au i Kilikala; faauta fo, ou te alu ifo ia te oe e fai ai taulaga mu, ma sauna taulaga faafetai. E fitu aso e te faatali ai i lo‘u alu atu ia te oe, ma ou faailoa atu ia te oe le mea e te faia.
9Ua oo ina ua liliu atu lona tua e alu ese ia Samuelu, ona liliu lea o lona loto e le Atua; ua taunuu foi nei faailoga uma i lea lava aso.
10Ua oo atu i laua i le mauga, faauta i le ua perofeta ua fetalai ma ia, ona osofia lea o ia e le Agaga o le Atua, ona perofeta ane lea o ia faatasi ma i latou.
11O i latou uma na iloa o ia anamua ua latou vaai, faauta, ua perofeta mai o ia faatasi ma le au perofeta; ona faapea lea o le nuu o le tasi i le tasi, O le a lenei mea ua oo i le atalii o Kiso? Ua i ai ea foi Saulo faatasi ma le au perofeta?
12Ona tali mai lea o le isi tagata o le nuu, ua faapea, A o ai ea lo latou tamā? O le mea lea sa fai ai le faatusa, O loo i ai i ea foi Saulo ma le au perofeta?
13Ua uma ona perofeta ane o ia, ona alu ae ai lea o ia le mea maualuga.
14Ua fai mai le uso o le tamā o Saulo ia te ia ma lana auauna, Na oulua o ifea? Ua fai atu, Na ma saili asini, ua ma iloa ua leai, ona ma o lea ia Samuelu?
15Ona fai mai lea o le uso o le tamā o Saulo, Se‘i ta‘u mai ia ia te au, po o le a na fai mai ai Samuelu ia te oulua?
16Ona fai atu lea o Saulo i le uso o lona tamā, Na ia ta‘utino mai ia te i maua, ua maua asini; a o le upu i le malo na fai mai ai Samuelu, e lei ta‘u ai ia te ia.
17Ua faapotopotoina le nuu uma e Samuelu i luma o Ieova i Mesepa.
18Ona fai atu lea o ia i le fanauga a Isaraelu, O loo faapea mai Ieova le Atua o Isaraelu, O a‘u na ou aveina ae ia Isaraelu nai Aikupito, ma ou laveaiina outou nai lima o Aikupito, ma lima o malo uma na faasaua ia te outou.
19A o outou, ua outou lafoai atu i lenei aso i lo outou Atua sa na faaola ia te outou i mea uma na outou leaga ai ma o outou puapuaga uma; ua outou fai mai foi ia te ia, Ia tofia lava se tupu mo i matou. O lenei, ina laulau tutū mai ia i luma o Ieova o outou itu aiga ma o outou aiga.
20Ona faalatalataina mai lea e Samuelu o itu aiga uma o Isaraelu; ona maua lea o le itu aiga o Peniamina.
21Ua faalatalataina mai e ia le itu aiga o Peniamina, e āua‘i mai ai aiga, ona maua lea o le aiga o Matere; ona maua lea o Saulo le atalii o Kiso; ua latou saili ia te ia, a e lei iloa.
22Ona toe fesili atu lea o i latou ia Ieova, E iu ea ina sau le tagata iinei? Ua fetalai mai Ieova, Faauta, o loo lafi o ia i le vao oa.
23Ona latou femoei atu lea, ua aami ia te ia nai lea mea; ua tu atu o ia i luma o le nuu, e gata ifo i ona tau‘au le maualuga o le nuu uma.
24Ona fai atu lea o Samuelu i le nuu uma, Vaavaai ia ia te ia ua filifilia e Ieova, ua leai se tasi o le nuu uma e tusa ma ia. Ona alalaga ai lea o le nuu uma, ua faapea, Ia soifua le tupu!
25Ona ta‘u atu lea e Samuelu i le nuu o le uiga o le malo, ma na tusia i le tusi, ma na teua i luma o Ieova. Ona aauina atu lea e Samuelu o le nuu uma ia taitasi ma alu i lona aiga.
26Ua alu atu foi Saulo i lona aiga i Kipea; ua o foi ma ia le ‘au e ua faamanatuina o latou loto e le Atua.
27A ua fai ane tagata ulavavale, Pe faapefea ona faaola mai ia te i tatou e lena tagata? Ua latou ‘ino‘ino ia te ia; ua le au mai foi se alofa ia te ia; a ua faalologo o ia.
Who We AreWhat We EelieveWhat We Do
2025 by iamachristian.org,Inc All rights reserved.
