1Faalogo mai ia i lenei mea outou le aiga o Iakopo, o e ua igoa i le igoa o Isaraelu, ma ua latou o atu nai le vai o Iuta; o e tauto i le suafa o Ieova, ma ta‘uta‘u atu i le Atua o Isaraelu, a e le o le faamaoni ma le amiotonu.
2Auā e igoa ai i latou i le aai paia, ma latou faalagolago i le Atua o Isaraelu; o Ieova o ‘au lona suafa.
3Na a‘u faaalia mea muamua talu anamua; ua oo atu ia mea ai lo‘u gutu, na ou faailoa atu ai; ua faafuasei ona ou faia, ma ua taunuu lava.
4Auā ua ou iloa ua finau vale lava oe, ma lou ua o le ua uamea lea, ma lou muaulu o le ‘apa memea lea;
5o le mea lea na a‘u faaali atu ai ia mea ia te oe talu anamua; na ou faailoa ia te oe a o lei oo mai; ina ne‘i ē fai ane, Ua faia ia mea e la‘u tupua; ua pule ai foi la‘u tupua ua ta ma la‘u tupua uamea.
6Ua e faalogo ai; ina vaai ia i na mea uma; a o outou, tou te le faaalia ea? E afua mai i nei ona po ou te faailoa ai ia te oe o mea fou, o mea lilo foi sa e le iloa.
7Ua faia nei lava ia mea, a e le o anamua; a o lei oo i le aso nei e te lei faalogo ai; ina ne‘i e fai ane, Faauta, na e iloa lava ia mea.
8E moni, ua e le faalogo; e moni, ua e le iloa; e moni, talu anamua ua le uai mai ou taliga; auā na ou iloa e te matuā amio faa‘ole‘ole; na igoa oe, o le fouvale, talu ina fanau mai.
9Ou te faatoatoa ona o lo‘u igoa; ou te taofi foi lo‘u ita ia te oe ona o lo‘u viiga, ina ne‘i ou faaumatia oe.
10Faauta, ua ou faate‘a le otaota ia te oe, a e le pei o le ario; ua ou filifilia oe i le ogaumu o i ai le puapuaga.
11Ona o a‘u, ona o a‘u lava, ou te faia; auā pe faapefea ona faagafuaina lo‘u igoa? o lo‘u mamalu foi, ou te le avatua lea i se tasi.
12Faalogo mai ia ia te au, Iakopo e, o oe foi Isaraelu le na ou valaauina; o a‘u lava ia, o a‘u lava lē muamua, o a‘u foi lē mulimuli.
13O lo‘u lima foi na faavaeina ai le lalolagi, ma lo‘u lima taumatau na folasia ai le lagi; ou te valaau ia te i latou, ona latou tutū faatasi mai lea.
14Ia faapotopoto mai outou uma lava, ma ia outou faalogo mai. O ai ea so latou na ia faaalia mai nei mea? Ua alofa Ieova ia te ia; na te faia lona finagalo i Papelonia, e oo foi lona lima i Kaletaia.
15O a‘u, o a‘u lava, na a‘u fai atu; na ou valaauina foi o ia; na ou aumaia o ia, e manuia foi lona ala.
16Faalatalata mai ia ia te au; ia outou faalogo mai i lenei mea; talu mai le amataga ou te lei tautala faalilolilo; talu ona i ai o lea mea, na ou i ai o a‘u; o lenei foi, o le Alii o Ieova, na ia auina mai a‘u, ma lona Agaga.
17O loo faapea ona fetalai mai o Ieova, o le na faatauina oe, o le Paia o Isaraelu, O a‘u o Ieova, o lou Atua, o loo a‘oa‘o ia te oe i mea e aoga, o loo ta‘ita‘iina oe i le ala e te ui ai.
18E! ana uai mai ou taliga i a‘u poloaiga, po ua tusa ma se vaitafe lou manuia; ma lau amiotonu, e tusa lea ma peau o le sami;
19po ua pei o le oneone lau fanau; ma ē tutupu mai i lou manava, e pei o lona manava; e le vavaeeseina, ma le fanoia lona igoa ai o‘u luma.
20Ia outou o ese i Papelonia; ia sosola ese ia Kaletaia ma le taalili o le alaga fiafia; ia outou faaali atu, ia faailoa atu lenei mea, ia faaoo atu ai i le tuluiga o le lalolagi; ia outou fai atu ai, Ua faatauina e Ieova o lana auauna o Iakopo.
21Sa latou le fia inu i nuu naumati na ia avea ai i latou; na ia faatafe mai le vai mai le papa mo i latou; na ia vaea le papa, ona tafe mai ai lea o le vai.
22Ua fetalai mai Ieova, E leai se filemu i e amio leaga.
Who We AreWhat We EelieveWhat We Do
2025 by iamachristian.org,Inc All rights reserved.
