1Ua tutū i luga i latou uma lava, ua ta‘ita‘i ia te ia ia Pilato.
2Ona latou momoli ai lea ia te ia, ua faapea atu, Na matou iloa lenei tagata ua ia faasese i le nuu, ua vavao foi ona avatu o taulaga ia Kaisara, ua faapea mai, o ia lava o le Tupu, o Keriso.
3Ona fesili mai lea o Pilato ia te ia, ua faapea mai, O oe ea o le tupu o tagata Iutaia? Ua tali atu ia ia te ia, ua faapea atu, O lea lava.
4Ona fai ane lea o Pilato i le au faitaulaga sili ma le motu o tagata, Ou te le iloa se mea e sala ai lenei tagata.
5A ua latou finau pea, ua faapea mai, Ua faaoso e ia i le nuu, ua a‘oa‘o i Iutaia uma, ua afua mai i Kalilaia ua oo mai iinei.
6Ua faalogo Pilato ia Kalilaia, ona fesili ane lea o ia, pe se tagata Kalilaia o ia.
7Ua iloa e ia, o ia mai le itu malo o Herota, ona avatu lea o ia ia Herota, o ia foi sa i Ierusalema i ia ona po.
8Ua iloa atu e Herota ia Iesu, ona fiafia tele ai lea o ia; auā ua leva ona fia matamata ia te ia, ona o mea e tele ua logo mai ia te ia; ua faamoemoe foi o ia na te vaavaai i se faailoga e faia e ia.
9Ua fesili mai o ia ia te ia i upu e tele; a e lei tali atu e ia se upu ia te ia.
10Ua tutū i luga le au faitaulaga sili ma le au tusiupu, ua naunau lo latou momoli ia te ia.
11Ua faaleaogaina o ia e Herota ma lana ‘au, ma tauemu mai ia te ia, ua latou faaofu foi ia te ia i le ofu pupula, ona toe au mai ai lea o ia ia Pilato.
12Ua toe lelei o Pilato ma Herota i lea lava aso; auā sa muai feitagai i laua.
13Ona faapotopoto lea e Pilato le au faitaulaga sili, ma le au faipule, ma le nuu,
14ona fai atu lea o ia ia te i latou, Ua outou au mai lenei tagata ia te au, e peiseai se faasese i le nuu; faauta mai foi, ua ou suesue ia te ia i o outou luma, ou te lei iloa se mea e sala ai lenei tagata i mea ua outou molia mai ai ia te ia.
15A ua le iloa foi e Herota; auā na ou aauina atu outou ia te ia; faauta foi, e leai se mea ua faia e ia e tusa ai ona oti o ia.
16O lenei foi, ou te aoai atu ia te ia, i le ou tatalaina atu ai.
17(E ao ina tatalaina e ia o se tasi tagata ia te i latou i le tausamiga.)
18A ua alaga mai le motu o tagata uma lava, ua faapea mai, Ave ese ia lena tagata, a ia tatala mai Parapa ia te i matou.
19(O le tagata lea na tuuina i le fale puipui, ona o le fouvale sa faia i le aai, ma le fasioti tagata.)
20Ona toe tautala atu ai lea o Pilato, ina ua fia tatalaina atu Iesu.
21A ua latou leo tetele mai, ua faapea mai, Ina faasatauro ia, ina faasatauro ia ia te ia.
22Ua fai atu faatolu foi o ia ia te i latou, Se a foi lona leaga ua na faia? Ou te lei iloa se mea e faasalaina ai o ia ia oti; o lea foi ou te aoai atu ai ia te ia, i le ou tatalaina atu ai.
23A ua latou faatauanau mai ma leo tetele, o fai mai ia faasatauroina ia; ua malo o latou leo ma leo o le au faitaulaga sili.
24Ua fai atu e Pilato, ia faia lo latou manao.
25Ua tatalaina e ia ia te i latou o le na tuuina atu i le fale puipui ona o le fouvale ma le fasioti tagata ua latou fai mai ai; a ua tuuina atu e ia o Iesu i lo latou manao.
26Ua latou ta‘ita‘i atu ia te ia, ona latou pue atu lea ia Simona, o le tasi Kurene ua sau mai le vao; ua latou faaee ia te ia le satauro e faafuata ai ma mulimuli ia Iesu.
27Ua mulimuli atu ia te ia le motu o tagata e toatele, ma fafine, e ua taufaitagitu‘i, ma taufaitagiaue ia te ia.
28A ua fāliu Iesu ia te i latou, ua fetalai atu, Tama fafine a Ierusalema e, soia le tagi ia te au, a ia outou tagi ia te outou, atoa foi ma a outou fanau.
29Faauta foi, e oo mai ona aso, e fai mai ai tagata, Amuia e ua pa, ma fafine e lei fananau, ma susu e lei susuina.
30Ona fai atu lea o tagata i mauga, Mafuli mai ia ia te i matou; e fai atu foi i mea maupuepue, Ina ufiufi ifo ia ia te i matou.
31Auā afai e faia nei mea i le laau mata, se a se mea e fai i le laau mago?
32O isi foi pagotata e toalua, ua ta‘ita‘iina atu faatasi ma ia, ia fasiotia.
33Ua latou oo atu i le mea e ta‘ua o le mea o i ai le ulupoo, ua latou faasatauro ia te ia i lea mea, ma e pagotata, o le tasi i le itu taumatau, ma le tasi i le itu tauagavale.
34Ona fetalai atu lea o Iesu, Lo‘u Tamā e, ia e faamagaloina atu ia te i latou; auā ua latou le iloa le mea ua latou faia. Ua tufatufa e i latou ona ofu, ona fai ai lea o le vili.
35Ua tutū mai le nuu, ma matamata mai. O le au faipule foi ua tauemu mai ia te ia faatasi ma i latou, ua faapea mai, Na faaolaina e ia nisi tagata, ina faaola ia o ia ia te ia, pe afai o le Keriso lena ua filifilia e le Atua.
36Ua tauemu mai foi ia te ia tagata tau; ua o ane ia te ia, ma avatu i ai le vineta,
37ua faapea atu, Afai o oe o le tupu o tagata Iutaia, ina faaola ia oe ia te oe.
38Na tusia foi le tusi i ona luga, i le upu a Eleni, ma Roma, ma Eperu, O LE TUPU LENEI O TAGATA IUTAIA.
39O le tasi foi o e na pagotata ua faatautauina ua upu leaga o ia ia te ia, ua faapea mai, Afai o oe o le Keriso, ina faaola ia oe ia te oe atoa ma i maua nei.
40A ua tali atu le tasi, ua vavao ia te ia, ua faapea atu, E te le mata‘u ea i le Atua, ina ua tatou sala faatasi?
41Ua tonu lava la ta sala; auā ua tauia mai i taua e tusa ma mea na ta faia; a o ia nei, e leai se mea e le tusa na faia e ia.
42Ona fai mai lea o ia ia Iesu, Le Alii e, ia e manatua mai a‘u, pe a e afio mai i lou malo.
43Ona fetalai atu ai lea o Iesu ia te ia, E moni, ou te fai atu ia te oe, o le asō ta te faatasi ai ma oe i parataiso.
44Ua oo i le itu aso po ua ono, ona pogisa uma ai lea o le nuu, ua oo lava i le itu aso e iva.
45Ua faapouliuliina foi le la; o le ie puipui foi o le malumalu ua saeluagalemuina.
46Ona valaau ai lea o Iesu, ua leo tele, ua faapea atu, Lo‘u Tamā e, ou te tuuina atu lo‘u nei agaga i ou aao; ua na fetalai ia upu, ona to ai lea o lana mānava.
47Ua iloa e le ta‘ita‘i o le toaselau le mea ua faia, ona vivii atu lea o ia i le Atua, ua faapea atu, E moni, o le tagata amiotonu lenei.
48O tagata uma e ua faapotopoto e maimoa i lea mea, ua vaavaai i mea ua faia, ona pōpō lea o i latou i o latou lava fatafata, ma toe foi atu.
49Ua tutū mamao atu foi tagata uma e sa masani ma ia, atoa ma fafine e na mulimuli mai ia te ia mai Kalilaia, ua vaavaai mai i latou i ia mea.
50Faauta foi, o le tagata e igoa ia Iosefa, o le faipule ia, o le tagata amio lelei ma le tonu;
51(e lei faaopoopo o ia i la latou pule ma la latou mea na fai,) o le Arimataia o ia, o le aai lea o tagata Iutaia, o ia foi sa faatalitali atu i le malo o le Atua.
52Ua alu atu o ia ia Pilato, ma faanoi atu i le tino o Iesu.
53Ua na ave ifo ai, ona aui lea i le ie lino, ona tuu ai lea i le tuugamau na foa i le papa, e lei tuu ai lava se tasi.
54O le aso lea o le sauniga, ua latalata le sapati.
55Ua mulimuli atu foi fafine e na o mai ma ia mai Kalilaia, ua latou vaavaai i le tuugamau, ma le tuuina ai o lona tino.
56Ua latou toe foi atu, ua sauni mea manogi ma suāuu manogi; ua latou malolo foi i le sapati, e tusa ma le poloaiga.
Who We AreWhat We EelieveWhat We Do
2025 by iamachristian.org,Inc All rights reserved.
