1Sa ma‘i le tasi tagata, o Lasalo le Petania, o le aai a Maria ma lona uso o Mareta.
2O Maria foi lea na na uu le Alii i le uu manogi, ua sōloi foi ona vae i lona lauulu, ua ma‘i lona tuagane o Lasalo.
3Ona ave lea o le feau a ona tuafāfine ia te ia, ua faapea mai, Le Alii e, faauta, o loo ma‘i le ua alofaina e oe.
4Ua faafofoga e Iesu, ona faapea lea o ia, O lenei ma‘i e le iu ina oti, a ona o le viiga o le Atua, ina ia viia ai o le Atalii o le Atua.
5Ua alofa lava Iesu ia Mareta, ma lona uso, atoa ma Lasalo.
6Ua faafofoga o ia ua ma‘i o ia, ona nofo pea ai lea o ia, e lua aso, i le mea sa i ai.
7Mulimuli ane ona faapea atu ai lea o ia i ona soo, Ia tatou toe o i Iutaia.
8Ua fai mai ona soo ia te ia. Rapi e, na se‘i saili nei Iutaia e fetogi ia te oe i maa, e te toe maliu atu ea i ai?
9Ona tali atu lea o Iesu, E le ua sefulu ea ma le lua ona itu aso i le ao? Afai e savali se tasi i le ao, e le tausuai o ia, auā e vaai o ia i le malamalama o lenei lalolagi.
10A e afai e savali se tasi i le po, e tausuai o ia, auā e leai se malamalama ia te ia.
11Ua fetalai atu ia upu, a e mulimuli ane ua faapea atu o ia ia te i latou. O loo moe la tatou uo o Lasalo; a e ou te alu e fafagu ia te ia.
12Ona faapea mai lea o ona soo. Le Alii e, afai o moe ia, e ola.
13Ua fetalai Iesu i lona oti, a ua latou masalo ua fetalai o ia i le taoto ma moe.
14Ona ta‘utino atu lea e Iesu ia te i latou. Ua oti Lasalo.
15Ou te olioli foi ona o outou, ina ua ou le i ai, ina ia outou talitonu mai; a e tatou o ia ia te ia.
16Ona fai atu lea o Toma, o le na igoa ia Titumo, i lona au uso a soo. Ia tatou o foi, ina ia tatou oti faatasi ma ia.
17Ua oo atu Iesu, ona silafia lea ua aso fa o ia i le tuugamau.
18Ua vava lalata Petania ma Ierusalema, pe sefulu ma le lima o setatio lo la va.
19E toatele foi o Iutaia ua o atu ia Mareta ma Maria, ina ia faamafanafana ia i laua ona o lo la tuagane.
20Ua faalogo Mareta ua maliu mai Iesu, ona alu ai lea na te faafetaiai ia te ia; a ua nofo Maria i le fale.
21Ona faapea mai lea o Mareta ia Iesu. Le Alii e, ana e iinei, po ua le oti lo‘u tuagane.
22A e ui lava i lea, ua ou iloa o mea uma e te faatoga atu ai i le Atua, e foaiina mai e le Atua ia te oe.
23Ua fetalai atu Iesu ia te ia, E toe tu mai lou tuagane.
24Ua fai mai Mareta ia te ia, Ua ou iloa e toe tu mai lava ia i le toe tu i le aso gataaga.
25Ua fetalai atu Iesu ia te ia, O a‘u nei o le toe tu ma le ola; o lē faatuatua mai ia te au, e ui lava ina oti, a e ola lava ia.
26O tagata ola uma o e faatuatua mai ia te au, e le oti lava e oo i le faavavau; po ua e talitonu mai ea i lena mea?
27Ona faapea mai lea o ia ia te ia, Ioe, le Alii e, ua ou talitonu lava, o oe le Keriso le Alo o le Atua, o lē maliu mai i le lalolagi.
28Ua ia fai mai na upu, ona alu ane lea o ia, ma valaau lemu i lona uso o Maria, ua faapea atu. Ua oo mai le a‘oa‘o, ua valaau ia te oe.
29Ua faalogo ai o ia, ona vave tu lea i luga, ua alu ia te ia.
30A o Iesu e lei maliu aue i le aai, a ua i le mea na la fetaiai ai ma Mareta.
31O tagata Iutaia foi sa i le fale ma ia, ma faamafanafana ia te ia, ua latou vaai atu ia Maria ua vave tu i luga, ma alu i fafo, ona mulimuli atu lea o i latou ia te ia, ua faapea ane. O le a alu ia i le tuugamau e tagi ai.
32Ua oo foi Maria i le mea sa i ai Iesu; ua vaai mai ia te ia, ona faapaū mai lea o ia i ona vae, ua faapea mai ia te ia, Le Alii e, ana e iinei, po ua le oti lo‘u tuagane.
33Ua silafia e Iesu o ia ua tagi, ma Iutaia ua o mai ma ia ua fetagisi, ona tiga tele lea o lona finagalo, ma ua ātu lava o ia;
34ona faapea atu lea, O fea na outou tuuina ai o ia? Ua faapea mai i latou ia te ia, Le Alii e, maliu mai ia, e te silasila i ai.
35Ua tagi Iesu.
36Ona faapea ane ai lea o Iutaia, Faauta i le tele o lona alofa ia te ia!
37A o isi o i latou, ua faapea ane, E lei mafai ea e lenei tagata ua ia faapupula mata o le tauaso, ona vavao foi le oti o lenei tagata?
38Ua toe tiga tele le finagalo o Iesu, ona oo lea o ia i le tuugamau. O le ana lea, ua tuuina foi le maa i lona gutu.
39Ua fetalai atu Iesu, Ave ese ia le maa. Ona fai mai lea ia te ia o Mareta le tuafafine o le ua oti, Le Alii e, ua oo ina manogi, auā o lona po fa lenei.
40Ua fetalai atu Iesu ia te ia, Pe na ou le fai atu ea ia te oe, Afai e te talitonu, ona e iloa lea o le mamalu o le Atua?
41Ona latou ave ese lea o le maa i le mea na tuu ai le ua oti. Ona tepa ae lea o fofoga o Iesu, ua faapea atu, Lo‘u Tamā e, ou te faafetai atu ia te oe, auā ua e faafofoga mai ia te au.
42Ua ou iloa foi, e te faafofoga mai ia te au e le aunoa; a e peitai ua ou fai atu ai, ona o le motu o tagata o loo vagavagai, ina ia talitonu i latou ua e auina mai a‘u.
43Ua ia fetalai atu ia upu, ona alaga lea o ia ua leo tele, Lasalo e, ina sau ia i fafo.
44Ona alu ai lea i fafo o le na oti, ua fusifusia ona vae ma ona lima i ie na tanuma‘i, ua fusi foi ona mata i le solosolo. Ona fetalai atu lea o Iesu ia te i latou, Tatala ia ia te ia, ina tuu atu ia e alu.
45Ona talitonu ai lea ia te ia o Iutaia e toatele, o i latou ia na o mai ia Maria, ina ua latou vaai atu i mea ua faia e Iesu.
46A o isi o i latou, ua latou o atu i le au faresaio, ma ta‘u atu ia te i latou mea ua faia e Iesu.
47Ona faapotopoto lea o le fono e le au ositaulaga sili ma le au faresaio, ua latou faapea ane, Se a sa tatou mea e fai? auā ua faia faailoga e tele e lea tagata.
48Afai e faapenei ona tatou tuu ai pea o ia, e talia o ia e tagata uma lava; e o mai foi tagata Roma, ona faaumatia lea o la tatou nei mea atoa ma lo tatou nuu.
49A o le tasi o i latou, o Kaiafa, o le ositaulaga sili ia i lea lava tausaga, ua fai atu o ia ia te i latou, Tou te le iloa lava se mea e tasi;
50tou te le mafaufau foi, e aoga ia te i tatou ona oti o le tagata e toatasi ma sui o le nuu, ina ia le fano le nuu uma lava.
51E lei fua mai ia te ia ona fai atu o lea mea, a ona o ia o le ositaulaga sili i lea lava tausaga, na ia vavalo ai, o le a maliu Iesu e sui a‘i le nuu.
52E le gata foi ona sui a‘i o lea nuu, a ia faapotopotoina ia faatasi le fanau a le Atua ua taapeape.
53Talu foi i lea aso ua latou taupulepule ai e fasioti ia te ia.
54O le mea lea ua le toe femaliuai faaaliali ai Iesu i tagata o Iutaia, a ua maliu ese ia i lea mea i le laueleele e lata ane i le vao, i le aai e igoa ia Efaraima, ua nofo ai ma ona soo.
55Ua lata mai le paseka a tagata Iutaia, e toatele mai ogānuu ua o ae i Ierusalema a o lei oo ile paseka, ina ia latou faamamā ia te i latou.
56Ona latou saili lea ia Iesu, ua fetautalatalai foi ina o latou o tutū i le malumalu, Pe ni a fa outou? E le sau ea ia i le tausamiga?
57Sa tuu foi le poloai a le au ositaulaga sili ma le au faresaio, afai ua iloa e se tasi se mea o i ai o ia, ia faailoa atu, ina ia latou pue ia te ia.
Who We AreWhat We EelieveWhat We Do
2025 by iamachristian.org,Inc All rights reserved.
