1Sa faapea foi lo‘u lava manatu, ou te le toe alu atu ia te outou ma le tiga.
2Auā afai ou te faatiga ia te outou, po o ai se na te faafiafia mai ia te au, afai e le o ia ua faatigaina e a‘u?
3Sa ou tusi atu foi lea lava mea ia te outou, ina ne‘i ou alu atu ona maua lea o a‘u e le tiga mai ia te i latou e tatau ona ou olioli ai; ou te faatuatua lava ia te outou uma, o lo‘u nei fiafia, o le fiafia lea o outou uma.
4Auā o le puapuaga tele atoa ma le atuatuvale o le loto na ou tusi atu ai ia te outou ma loimata e tele; e lei ina ia faatigaina outou, a ia outou iloa ai lo‘u alofa ua matuā tele ia te outou.
5O lenei, afai ua faatupuina le tiga e se tasi, ua ia le faatiga ia te au na o a‘u; a e peitai (ina ne‘i ou faamamafa atu), atoa ma outou uma.
6Soia le faia se tasi mea i lena tagata, tau lava o lena sala na faasalaina ai o ia e le toatele.
7A o lenei, ia outou faamagalo atu ma faamafanafana atu i lena tagata, ina ne‘i tofatumoanaina o ia i le tiga matuā tele.
8O lea ou te aioi atu ai ia te outou ina ia faamauina lo outou alofa ia te ia.
9O le mea lava lea na ou tusi atu ai, ina ia ou iloa le faailoga ia te outou, po ua outou anaana i mea uma.
10O le ua outou faamagalo atu i ai se mea, o a‘u foi lea; auā afai ua ou faamagalo atu se mea, o le ua ou faamagalo atu i ai, ua ou faia lea ona o outou i luma o Keriso;
11ina ne‘i ‘ole‘olegia i tatou e Satani; auā tatou te le vālea i ana togafiti.
12Na ou alu atu foi i Teroa ona o le tala lelei ia Keriso, na toina mai foi ia te au se faitotoa e le Alii, a ou te lei iloa sina filemu i lo‘u loto, ina ua ou le maua lo‘u uso o Tito;
13a ua ou faamavae atu ia te i latou, ona ou alu atu lea i Maketonia.
14Ua faafetai i le Atua, o le ua matou manumalo ai pea lava ona o Keriso, o le ua matou faaali atu ai foi i nuu uma le manogi o le mataupu ia te ia.
15Auā o le nanamu i matou ia Keriso i le Atua i e o faaolaina, atoa ma e o malaia;
16o le manogi o le oti e oo i le oti i nisi; a o le manogi o le ola e oo i le ola i nisi. Po o ai foi sē tusa ma nei mea?
17Auā o i matou nei, e le pei o le toatele o e o faafilogia le afioga a le Atua; a ua matou tautalatala atu mai le loto lelei, mai le Atua foi, o i luma o le Atua, o i matou ua ia Keriso.
Who We AreWhat We EelieveWhat We Do
2025 by iamachristian.org,Inc All rights reserved.
