II KORINITO, 3 - Samoan Old Version Bible

O LE MATAUPU III.O le lelei silisili ese o le sauniga o le tala lelei.

1A matou toe amata ea ona ta‘ulelei i matou ia te i matou? pe aoga ea ia te i matou, pei o isi, ni tusi e ta‘ulelei ai e avatu ia te outou? po o tusi e ta‘ulelei ai mai ia te outou?

2O outou o la matou tusi, o tusia i o matou nei loto, ua iloa ma faitaulia e tagata uma.

3O loo faaalia outou, o outou o le tusi a Keriso ua saunia e i matou, e lei tusia i le vaitusi, a o le Agaga o le Atua soifua; ua le tusia i papatusi maa, a o papatusi aano o le loto.

4O loo ia te i matou lenei faatuatuaga i le Atua talu lava o Keriso;

5auā e le mafai pe a na o i matou ona manatunatu i se mea, peiseai na ia te i matou, a o le Atua e mafai ai i matou;

6o ia foi na sauni i matou ia tatau ona fai ma auauna o le feagaiga fou, e le o le tusi, a o le Agaga; auā e a le tusi e fasioti, a e a le Agaga e faaola.

7A e afai sa faapea le mamalu o le sauniga na oo mai ai le oti, na togia ai i mataitusi i maa, ua le mafai ai le fanauga a Isaraelu ona pulatoa atu i fofoga o Mose ona o le pupula o ona fofoga, o le pupula lea faaumatia;

8e le matuā sili ea le mamalu o le sauniga ua oo mai ai le Agaga?

9Auā afai sa mamalu le sauniga na oo mai ai le faasala, e matuā sili lava ona mamalu o le sauniga ua oo mai ai le amiotonu.

10Auā foi o le mea na mamalu e leai sona mamalu i lenei mea, ona o le mamalu e silisili ese.

11Afai foi sa mamalu le mea e faaumatia, e matuā sili le mamalu o le mea e tumau.

12O lenei, ona ua ia te i matou o lenei faamoemoe, matou te matuā faaalitino;

13a e le pei o Mose, na tuu e ia le ufiufi i ona fofoga, ina ia le mafai ona pulatoa ai o le fanauga a Isaraelu i le iuga o le mea ua faaumatia;

14a e peitai sa faatauasoina o latou manatu; auā ua oo mai i nei ona po o tumau pea lea lava ufiufi pe a faitauina le feagaiga tuai, e lei faailoa ua faaumatia lea talu Keriso.

15A ua oo i nei ona po, o loo i ai lava le ufiufi i o latou loto pe a faitauina Mose.

16A e peitai pe a liliu i le Alii, ona aveeseina ai lea o le ufiufi.

17O le Alii foi o le Agaga ia; o le mea o i ai le Agaga o le Alii, o i ai le sa‘olotoga.

18A o i tatou uma, o loo vaavaai i tatou i le pupula o le Alii e peiseai o i se faaata ma o tatou mata, e le ufitia, ua liua ai i tatou ua foliga i ai nai le pupula e oo i le pupula, faapei ona mai le Alii le Agaga.