1O le afioga na oo mai ia Ieremia mai ia Ieova i le sefulu o tausaga o Setekaia le tupu o Iuta, o le sefulu ma le valu o tausaga lea o Nepukanesa.
2O ona po ia na vagaia ai Ierusalema e le itu taua a le tupu o Papelonia; sa puipuia foi Ieremia le perofeta i le lotoā o le fale puipui sa i le fale o le tupu o Iuta.
3Auā na puipuia o ia e Setekaia le tupu o Iuta, ua ia faapea, Se a ea le mea ua e vavalo ai, ua faapea mai, O loo faapea ona fetalai mai o Ieova, Faauta, ou te tuuina atu lenei aai i le lima o le tupu o Papelonia, na te aea;
4e le sao foi Setekaia le tupu o Iuta ai lima o Kaletaia, a e tuuina lava o ia i le lima o le tupu o Papelonia, la te tautala faafesaga‘i ma ia, ma la feiloa‘i ma ia;
5e ta‘ita‘iina foi e ia o Setekaia i Papelonia, e i ai foi o ia i lea mea seia ou asiasi atu ia te ia, ua fetalai mai ai Ieova; e ui lava ina outou tau ma Kaletaia e le manuia outou.
6Ua fai atu Ieremia, Ua oo mai le afioga a Ieova ia te au, ua faapea mai.
7Faauta, e sau ia te oe o Hanameali, le atalii o Saluma, o le uso o lou tamā, e faapea mai, Ia e faatau mo oe lo‘u fanua o loo i Anatota; auā ua ia te oe le pule i le faatau e faatau ai.
8Ona sau ai lea ia te au i le lotoā o le fale puipui o Hanameali, le atalii o le uso o lo‘u tama, e pei o le afioga a Ieova, ua faapea mai ia te au, Se‘i e faatau lo‘u fanua, o loo i Anatota o i le nuu o Peniamina; auā e āu le pule e fai mou le fanua, e ou foi le faatau; ina faatau ia mo oe. Ona ou iloa ai lea, o le afioga a Ieova lea.
9Ona ou faatauina lea mai ia Hanameali, le atalii o le uso o lo‘u tamā, o le fanua o loo i Anatota, ma ou fuatia ia te ia o tupe, o sekeli ario e sefulu ma le fitu.
10Ona ou tusia lea i le tusi, ma ou faamaufaailogaina ai, ma ou amia mai molimau, ma ou fuatia le ario i le fua faatautau.
11ona ou ave ai lea o le tusi o le faatau, o le ua faamaufaailogaina e tusa ma le poloaiga ma tulafono, atoa ma le ua le faamauina;
12ua ou ave foi le tusi o le faatau ia Paruka, le atalii o Neria, le atalii o Maaseia, i luma o Hanameali, le atalii o le uso o lo‘u tamā, i luma foi o molimau na tusi i le tusi o le faatau, i luma foi o tagata Iuta uma sa nonofo i le lotoā o le fale puipui.
13Ua ou matuā fai atu foi ia Paruka i o latou luma, ua faapea atu,
14O loo faapea ona fetalai mai o Ieova o ‘au, le Atua o Isaraelu, Ia e ave nei tusi, o lenei lava tusi o le faatau, o le ua faamaufaailogaina, atoa foi ma lenei tusi ua le faamauina, ia e tuu ai foi i se ipu omea, ina ia tumau i aso e tele;
15auā o loo faapea ona fetalai mai o Ieova o ‘au, le Atua o Isaraelu, E toe faatauina i le nuu nei o fale, ma fanua, ma tovine.
16Ua ou tuuina le tusi o le faatau ia Paruka le atalii o Neria, mulimuli ane ona ou tatalo atu lea ia Ieova, ua faapea atu,
17Aue! le Alii e Ieova, faauta, o oe na e faia le lagi ma le lalolagi i lou malosi tele, ma lou aao faaloaloa, e le faigata foi ia te oe se mea e tasi;
18ua e alofa i afe o tupulaga, ua e taui atu foi le amioletonu a tamā i fatafata o a latou fanau pe a mavae atu i latou; o le Atua sili, ma le malosi, o Ieova o ‘au, o lona suafa lea,
19e sili i faautauta, e silisili foi i au mea e fai; auā ua silasila ou fofoga i ala uma o tagata; e tuuina atu i tagata taitasi e tusa ma ona ala, e tusa foi ma le fua o ana amioga;
20o le na faatuina foi o faailoga ma vavega i le nuu o Aikupito, ua oo i le aso nei, ma le nuu o Isaraelu, atoa ma nuu o tagata ese; ua e faia foi mo oe le suafa, e pei ona faia i le aso nei.
21Na e aumaia foi lou nuu o Isaraelu mai le nuu o Aikupito, ma faailoga, ma vavega, ma le aao malosi, ma le aao faaloaloa, ma mea matua matautia.
22Ua e foaiina mai foi ia te i latou lenei nuu, na e tauto ai i o latou tamā e foai ia te i latou, o le nuu o tafe ai le suāsusu ma le meli;
23na latou o mai ai, ma fai ai mo latou; a ua latou le faalogo i lou siufofoga, ma latou le savavali e tusa ma au tulafono; ua latou le faia mea uma na e poloai ai ia te i latou ia faia; o le mea lea ua e faaoo ai nei mea leaga uma ia te i latou.
24Faauta mai, o mea mautietie, ua oo mai lava i le aai e aea a‘i; ua tuuina foi le aai i lima o Kaletaia, o e ua faasaga tau mai ai, auā o le pelu, ma le oge, ma le faamai; o le mea lava na e fetalaia ua oo; faauta mai foi, ua e silafia.
25A o oe, le Alii e Ieova, ua e fetalai mai ia te au, Ia e faatau le fanua mo oe i tupe, ma aami atu molimau; a o le aai, ua tuuina atu lea i lima o Kaletaia.
26Ona oo mai ai lea o le afioga a Ieova ia Ieremia, ua faapea mai,
27Faauta, o a‘u lava o Ieova, o le Atua o tagata uma; pe faigata ea ia te au se mea e tasi?
28O lea o loo faapea ona fetalai mai ai o Ieova, Faauta, ou te tuuina atu lenei aai i lima o Kaletaia, ma le lima o Nepukanesa le tupu o Papelonia, e aea ai foi e ia;
29e o mai foi Kaletaia, o e tau ma lenei aai, ma latou faamu lenei aai i le afi, e susunuina ai lava e i latou, atoa ma fale na faamuina ai mea manogi i o latou luga ia Paala, ma latou liligi ifo ai taulaga i mea e inu i atua ese, ina ia latou faaonoono mai ia te au.
30Auā ua na o mea leaga ua faia i o‘u luma e le fanauga a Isaraelu ma le fanauga a Iuta talu ina o taulelea i latou; auā ua na ona faaonoono mai o le fanauga a Isaraelu ia te au i galuega a o latou lima, ua fetalai mai ai Ieova.
31Auā ua faia lenei aai ia te au ma mea ou te tiga ai, ma mea ou te ita ai, talu mai le aso na faia ai, ua oo lava i le aso nei, ina ia ou aveeseina ai i o‘u luma;
32ona o amio leaga uma a le fanauga a Isaraelu, ma le fanauga a Iuta, ua latou faia e faaonoono ai ia te au, o i latou, o latou tupu, o latou alii, o latou faitaulaga, ma o latou perofeta, ma tagata Iuta, atoa ma e o nonofo i Ierusalema.
33Ua u mai ia te au o latou tua, a e le o latou mata; ua ou a‘oa‘o atu ia te i latou, ua ou ala a‘oa‘o atu ai lava, a ua latou le faalogo lava ina ia talia mea ua a‘oa‘oina atu ai;
34a ua latou tuuina a latou mea e inosia i le fale ua ta‘ua ai lo‘u igoa, ina ia latou faaleagaina ai.
35Ua faia foi e i latou mea maualuluga ia Paala, ua i le vanu o le atalii o Hinoma, ina ia latou faaui ane o latou atalii ma o latou afafine i le afi ia Moloka; o le mea lava ou te lei poloai ai ia te i latou, ou te lei manatu foi i ai; ua faia e i latou lenei mea e inosia e faatupuina ai le agasala ia Iuta.
36A o lenei, o loo faapea ona fetalai mai o Ieova, le Atua o Isaraelu, i le aai nei, o loo ua outou fai mai ai, Ua tuuina atu ia i le lima o le tupu o Papelonia i le pelu, ma le oge, ma le faamai;
37faauta, ou te faapotopoto ia te i latou ai nuu uma ua ou tulia ai i latou i lo‘u tiga, ma lo‘u ita, ma le ita tele; ou te faafoisia mai i latou i lenei mea, ma ou faanonofoina ai i latou ma le filemu;
38e fai foi i latou mo‘u nuu, e fai foi a‘u mo latou Atua.
39Ou te foaiina atu ia te i latou le loto e tasi, ma le ala e tasi, ina ia latou matatau ia te au i aso uma lava, ia lelei ai i latou, atoa foi ma a latou fanau pe a mavae atu i latou;
40ou te osia foi le feagaiga e faavavau ma i latou, ou te le liliu ese ai ia te i latou, a ou te agalelei atu ia te i latou; ou te tuuina atu foi le mata‘u ia te au i o latou loto, ina ia latou le liliu ese ia te au.
41Ou te fiafia lava ia te i latou, ma ou agalelei atu ia te i latou, ma ou totōina i latou i lenei nuu ma le faamaoni, ma lo‘u loto atoa, ma lo‘u agaga atoa.
42Auā o loo faapea ona fetalai mai o Ieova, E pei ona ou faaoo i lenei nuu lenei malaia tele uma, e faapea foi ona ou faaoo ia te i latou le manuia uma ua ou folafolaina ia te i latou.
43E faataulia foi fanua i le nuu nei, ua outou faapea mai ai, Ua faatafunaina ia, e le o i ai se tagata, po o se manu; ua tuuina atu ia i lima o Kaletaia.
44E faataulia e i latou fanua i tupe, ma latou tusia ai i tusi, ma faamaufaailogaina ai, ma aami molimau i le nuu o Peniamina, ma mea e vagavagai i Ierusalema, ma aai o Iuta, ma aai i atu mauga, ma aai i le itu maulalo, ma aai i le itu i toga; auā ou te faafoisia lava lo latou tafeaga, ua fetalai mai ai Ieova.
Who We AreWhat We EelieveWhat We Do
2025 by iamachristian.org,Inc All rights reserved.
