ESOTO 33 - Samoan Old Version Bible

O LE MATAUPU XXXIII.Ua faatu ese e Mose o lona fale.

1Ua toe fetalai mai Ieova ia Mose, Ina alu ia, ma ia outou o ae ai lenei mea, o oe ma le nuu na e aveina ae nai Aikupito, i le nuu na ou tauto atu ai ia Aperaamo, ma Isaako, ma Iakopo, ua faapea atu, Ou te tuuina atu ai i lau fanau.

2Ou te auina atu foi i ou luma le agelu; ou te tuli ese atu foi o sa Kananā, ma sa Amorī, ma sa Hetī, ma sa Perisē, ma sa Hivī, ma sa Iepusē;

3o le nuu lea o loo tafe ai le suāsusu ma le meli; auā tatou te le o ae ma outou, auā o le nuu outou ua maaa le ua; ne‘i ou faaumatia outou i le ala.

4Ua faalogo le nuu i lenei tala leaga, ona latou faanoanoa ai lea, e le teuteu foi se tasi i ana teuga;

5auā na fetalai mai Ieova ia Mose, Fai atu ia i le fanauga a Isaraelu, O le nuu ua maaa le ua outou, o le emo o le mata ou te alu ae ai i totonu o outou, ma ou faaumatia outou; ina tuu ese ia o a outou teuga ia te outou, seia ou iloa, pe se a se mea ou te faia ia te outou.

6Ona to ese lava lea e le fanauga a Isaraelu o a latou teuga i le mauga o Horepa.

7A o Mose, ua ave e ia le fale ie, ua faatu ai e ia i tala atu o le togālauapi, e vava mamao ma le togālauapi; ua ia faaigoa ai foi, le fale ie o le faapotopotoga; ona o ai lea i o latou uma e na saili ia Ieova i le fale ie o le faapotopotoga i tala atu o le togālauapi.

8A oo ina alu atu Mose i le fale ie, ona tutū lea i luga o le nuu atoa uma, ua taitasi ma tu mai i le faitotoa o lona fale ie, ua latou tulimata‘i ia Mose, ina seia ulu atu ia i le fale ie.

9Ua ulu atu Mose i le fale ie, ona ifoifo ai lea o le ao faaniutu, ua tu foi i le faitotoa o le fale ie; ona fetalai mai lea o Ieova ia Mose.

10Ua iloa e le nuu atoa uma o le ao faaniutu, o loo tu i le faitotoa o le fale ie, ona tulai lea o le nuu uma, ma ifo atu ai, e taitoatasi i le faitotoa o lona fale ie.

11Ua fetalai mai foi Ieova ia Mose, o loo fesagai lava, faapei o le tagata ona tautalatala ma lana uo; ua foi atu Mose i le togālauapi, a o lana auauna o Iosua, o le atalii o Nuno, o le taulealea, e lei alu ese lava o ia i le fale ie.

12Ua fai atu foi Mose ia Ieova, Silasila mai, ua e fetalai mai ia te au ia ou aveina ae le nuu nei, a e te lei faailoa mai, po o ai e te auina mai ma te toalua, a ua e fetalai mai faapea, Ua ou iloa oe i lou lava igoa, ua alofagia foi oe e a‘u.

13O lenei, afai ua alofagia a‘u e oe, ia e faailoa mai ia te au lou ala, ina ia ou iloa oe, ina ia alofagia a‘u e oe, ma ia e manatu o ou tagata le nuu nei,

14Ona fetalai mai lea o Ieova, Ta te o atu lava ma a‘u; ou te avatua foi le mapusaga mo oe.

15Ona tali atu lea o ia ia te ia, Pe afai ta te le afio atu ma oe, aua le aveina ae i matou nai le mea nei.

16Se a lava le mea e iloa ai ua alofagia a‘u e oe, o a‘u atoa ma lou nuu, na o lea, ina ua e afio atu faatasi ma i matou? Ona vavaeeseina lea o i matou, o a‘u ma lou nuu ai nuu uma lava i le fogāeleele.

17Ona fetalai mai lea o Ieova ia Mose, O le mea ua e fai mai ai na, ou te faia lava, auā ua alofagia oe e a‘u; ua ou iloa foi oe i lou lava igoa.

18Ona fai atu lea o Mose, Ia e faaali mai ia te au lou mamalu.

19Ona fetalai mai lea o ia, Ou te faaui atu lo‘u lelei uma i ou luma; ou te ta‘u atu foi le igoa o Ieova i ou luma; ou te alofa atu foi i e ou te fia alofa atu i ai, ma ou alofa mutimutivale i e ou te fia alofa mutimutivale i ai.

20Ua ia fetalai mai foi, E te le mafaia ona vaai mai i o‘u mata; auā e le mafai ona vaai mai lava se tagata ia te au, ma ola pea ia.

21Ua fetalai mai Ieova, Faauta i le mea e latalata ane ia te au, e te tu ai i luga o le papa;

22a ui ane ai lo‘u mamalu, ou te tuuina oe i le māvaevae o le papa, ou te ufitia oe i lo‘u lima seia mavae ane a‘u;

23a a‘u ave ese lo‘u lima, ona e iloa mai lea o lo‘u tua; a o o‘u mata e le vaaia lava ia.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help