1Ua tali mai pea Ieova ia Iopu, ua faapea mai,
2O lē finau ma Le e ona le malosi uma lava, na te aoai mai ea? O lē faatonu mai i le Atua, ia tali mai o ia i lea mea.
3Ona tali atu ai lea o Iopu ia Ieova, ua faapea atu,
4Faauta, ua faatauvaa lava a‘u, se a se mea ou te tali atu ai ia te oe? Ou te tuu ae lo‘u lima i lo‘u gutu.
5Ua ou tautala atu faatasi, a e ou te le toe tali atu; ua faalua foi, a e ou te le toe faaopoopo i ai.
6Ona tali mai ai lea o Ieova ia Iopu mai le afā, ua faapea mai,
7Ina fusi ia lou sulugatiti e pei o le tagata malosi; ou te fesili atu ia te oe, ina e faailoa mai ia ia te au.
8E te faaleaogaina ea la‘u lava faatonuga? E te faasala ea ia te au, ina ia ta‘uamiotonuina oe?
9Ua ia te oe ea le lima e pei o lo le Atua? Pe e te faititili ea ma le leo e pei o ia?
10Ina e teteu ia oe i le mamalu ma le malualii; ma ia e ofu i le viiga ma le matagofie.
11Ina sasaa solo atu ia le tele o lou ita; ia e vaai atu foi i e faamaualuga uma lava, ma ia e faamaulaloina i latou,
12Vaai atu ia i e faamaualuga uma, ma ia e faatoilaloina i latou; ia e solipalaina foi o e amio leaga i le mea o i ai i latou.
13Ia e tanumia i latou faatasi i le eleele; ia e fusi o latou mata i le mea lilo.
14Ona ou ta‘utino atu ai lea ia te oe, ua mafai ona faaolaina oe i lou lima taumatau.
15Faauta ea i le pemota, o le na ou faia faatasi ma oe, na te ‘aina le mutia e pei o le povi.
16Faauta, ua i ai lona malosi i lona papātua, ma lona malosi foi ua i ai i mea mălōlō o i lona manava.
17Ua ia faamalo‘u i lona iu e pei o le arasi, ua felavasa‘i ua o lona tulaiu.
18O ona ivi, o ivi ‘apa memea ia; o ona ivi e pei o se ‘oso uamea.
19O le sili ia o mea na faia e le Atua; o le na faia o ia ua ia tuu atu i ai lana pelu.
20Auā ua fua mai mea e ‘ai mā ia i mauga, ua taaalo ai manu feai uma o le vao.
21Na te taoto i lalo o laau paolo, i mea lilo o i ai u ma palapala.
22Ua maluia o ia i le paolo o laau paolo; ua siomia o ia i garava i le alia.
23Faauta, a osofia auvai o le vaitafe, na te le sola lava; e ui ina oso mai Ioritana i lona gutu e le fefe lava ia.
24O ai se na te mafaia ona pue ia te ia a o vaai mai? Pe tuia lona isu ao lavea i mailei?
Who We AreWhat We EelieveWhat We Do
2025 by iamachristian.org,Inc All rights reserved.
