1A e afai o se taulaga faafetai lana taulaga, afai ua fai taulaga ai o ia ai le lafu povi; po o se poa, po o se manu fafine, ia fai taulaga ai o ia i luma o Ieova i se manu e sao ona lelei.
2Na te faaee foi lona lima i le ulu o lana taulaga, ma fasi ai i le faitotoa o le fale fetafai o le faapotopotoga; ona sausauina atu ai lea o le toto e atalii o Arona o faitaulaga, e soo ai i luga o le fata faitaulaga.
3Ona avatu ai lea e ia se taulaga faafetai, o le taulaga e fai i le afi ia Ieova; o le ga‘o alo ma ga‘o uma lava o i ai,
4o fatuga‘o foi e lua ma ga‘o o i ai o loo i luga o lāgotua; a o le ga‘o punipū o i luga o le finagalo, ma fatuga‘o, na te aveeseina ai.
5Ona susunuina ai lea e atalii o Arona i le fata faitaulaga i luga o le taulaga mu i luga o fafie ua i luga o le afi; o le taulaga lea e fai i le afi, o le mea manogi lelei ia Ieova.
6Afai foi mai le lafu mamoe lana taulaga, e fai ma taulaga faafetai ia Ieova; po o se poa po o se manu fafine, ia avatua se manu e sao ona lelei.
7Afai e avatu e ia se tamai mamoe mana taulaga, ia avatua lava i luma o Ieova.
8Na te faaee lona lima i le ulu o lana taulaga, ma fasi ai i luma o le fale fetafai o le faapotopotoga; ona sausauina atu ai lea o lona toto e atalii o Arona i luga o le fata faitaulaga e soo ai.
9Ona avatu ai lea e ia o le taulaga faafetai, o le taulaga e fai i le afi ia Ieova; o lona ga‘o ma le iu atoatoa, na te vavaeeseina foi lea i le mea aupito ane i le ivitu; o le ga‘o alo,
10ma ga‘o uma o i ai, o fatuga‘o foi e lua, ma ga‘o o i ai, o loo i luga o lāgotua; a o le ga‘o punipū o i luga o le finagalo, ma fatuga‘o, na te aveeseina ai.
11Ona susunuina ai lea e le faitaulaga i le fata faitaulaga; o le mea e ‘ai lea o le taulaga e fai i le afi ia Ieova.
12Afai foi o se ‘oti lana taulaga, ia avatua lava i luma o Ieova.
13Na te faaee foi lona lima i lona ulu, ma fasi ai i luma o le fale fetafai o le faapotopotoga; ona sausauina atu ai lea o lona toto e atalii o Arona i luga o le fata faitaulaga e soo ai.
14Na te avatua ai lana taulaga, o le taulaga e fai i le afi ia Ieova; o le ga‘o alo ma ga‘o uma o i ai,
15o fatuga‘o foi e lua, ma ga‘o o i ai, o loo i luga o lāgotua; a o le ga‘o punipū o loo i luga o le finagalo, ma fatu ga‘o, na te aveeseina ai.
16Ona susunuina ai lea e le faitaulaga i le fata faitaulaga; o le mea e ‘ai lea, o le taulaga e fai i le afi, o le mea manogi lelei lea; e ia Ieova ga‘o uma.
17O le tulafono e faavavau i a outou tupulaga amuli i mea uma tou te nonofo ai, aua tou te aai ni ga‘o po o le toto.
Who We AreWhat We EelieveWhat We Do
2025 by iamachristian.org,Inc All rights reserved.
