II. SAMUELU, 4 - Samoan Old Version Bible

O LE MATAUPU IV.O le fasiga o Isoposeta.

1Ua faalogo le atalii o Saulo ua oti Apineru i Heperona, ona faavaivai ai lea o ia, atoa ma Isaraelu uma sa latou atuatuvale ai.

2Sa i ai i le atalii o Saulo tagata e toalua o e pule i ‘au, o le igoa o le tasi o Paana, o le igoa o le tasi o Rakapa, o atalii o Rimoni le Perota, ai le fanauga a Peniamina; auā, sa nofo itu aiga Perota ia Peniamina.

3Na sosola atu tagata o Perota i Kitaima, ua āumau ai, ua oo lava i nei ona po.

4O Ionatana le atalii o Saulo, sa ia te ia lona atalii ua pipili i ona vae; sa lima ona tausaga ina ua oo atu ai le logo ia Saulo ma Ionatana nai Isereelu; ona avae lea ia te ia e le na tausi ia te ia, ua sola; ua oo ina faataalise ona sola, ona paū ai lea o le tama, ona pipili ai lea o ia; o lona igoa o Mefiposeta.

5Ua o atu atalii o Rimoni le Perota, o Rakapa ma Paana, ua la oo atu i le fale o Isoposeta i le itu aso e vevela ai le la; sa taoto o ia i lona moega i le tutonu o le la.

6Ua o atu i laua i totonu o le fale e la‘u saito, ua la tutu‘i ia te ia i le manava; ona sosola ai lea o Rakapa ma Paana lona uso;

7auā ua la ulu atu i le fale, a o ia, sa taoto i lona moega i lona afeafe e taoto ai o ia, ua la fasi, ma faaoti ia te ia, ma vavae ese lona ao; ona la ave lea o lona ao; ua atoa le po ua la ui atu ai i le ala i le eleele laugatasi.

8Ua la aumaia le ao o Isoposeta ia Tavita i Heperona; ona la fai mai lea i le tupu, Faauta i le ulu o Isoposeta le atalii o Saulo, na fai oe mona fili, o le na saili e fasioti ia te oe, ua taui atu e Ieova ona o oe le alii le tupu, i lenei aso ia Saulo ma lana fanau.

9Ona tali atu lea o Tavita ia Rakapa ma Paana lona uso, o atalii o Rimoni le Perota, ua fai atu ia te i laua, O loo soifua Ieova, o le na laveai mai ia te au i puapuaga uma lava,

10na ta‘u mai se tasi ia te au, o loo faapea mai, Faauta, ua oti Saulo; fa te ia, na ia au mai le tala lelei, ona ou pue ai lea ia te ia, ma fasioti ia te ia i Sekeleka, a o ia fa te ia ou te avatu ai se taui o lana tala.

11A o lenei, o tagata amio leaga ua la fasioti le tagata amiotonu i lona fale i luga o lona moega, ou te le taui atu ea i lona toto ia te oulua, ma ou faaumatia oulua i le nuu nei?

12Ona fai atu lea o Tavita i taulelea, ona latou fasioti ai lea ia te i laua, ma ua vavae ese o la lima ma o la vae, ma tautauina i luga o le vailepa i Heperona; a o le ao o Isoposeta na latou ave ia, ma tanu i le tuugamau o Apineru i Heperona.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help