1Ona faapea atu lea o Solomona, Na fetalai mai Ieova, e afio o ia i le pogisa.
2A ua ou faia le fale mo oe e te afio ai, o le afioaga e te afio ai e faavavau.
3Ona liliu atu lea o le tupu, ma faamanuia atu i le faapotopotoga uma o Isaraelu; ua tutū mai foi le faapotopotoga uma o Isaraelu.
4Ua ia faapea atu, Ia faafetaia Ieova le Atua o Isaraelu, o le ua faataunuuina mai i lona aao le mea na tŭlei mai lona fofoga i lo‘u tamā o Tavita, ua faapea mai,
5Talu lava le aso na ou au mai ai o lo‘u nuu nai le nuu o Aikupito, ou te lei filifilia se aai i itu aiga uma o Isaraelu e fai ai se fale ina ia i ai lo‘u igoa; ou te lei filifilia foi se tasi e fai ma ta‘ita‘i o lo‘u nuu o Isaraelu;
6a ua ou filifilia Ierusalema ina ia i ai lo‘u igoa; ua ou filifilia foi Tavita ina ia pule o ia i lo‘u nuu o Isaraelu.
7Sa loto foi lo‘u tamā o Tavita e fai se fale mo le suafa o Ieova le Atua o Isaraelu.
8A ua fetalai mai Ieova i lo‘u tamā o Tavita, Auā ua e loto ina fai se fale i lo‘u igoa, ua lelei ina ua i ai i lou loto.
9A e peitai oe, e te le faia le fale; a o lou atalii o lau lava fanau, o ia na te faia le fale i lo‘u igoa.
10Ua faataunuuina foi e Ieova lana afioga na ia fetalaia mai; auā ua nofo atu a‘u e fai ma sui o lo‘u tamā o Tavita, ua ou tietie foi i le nofoālii o Isaraelu, e faapei ona fetalai mai ai o Ieova, ua ou faia foi le fale o le suafa o Ieova le Atua o Isaraelu.
11Ua ou tuuina ai foi le atolaau o loo i ai le feagaiga a Ieova, na osia e ia ma le fanauga a Isaraelu.
12Ua tu o ia i luma o le fata faitaulaga o Ieova i luma o le faapotopotoga uma o Isaraelu, ma na faaloaloa ona lima;
13auā na faia e Solomona le tulaga ‘apa memea e lima kupita lona umi, ma le lima o kupita lona lautele, ma le tolu o kupita lona maualuga, ma ua tuu ai i totonu o le lotoā; ua tu foi o ia i ona luga, ma ua tootuli i ona tulivae i luma o le faapotopotoga uma o Isaraelu, ma ua faaloaloa ae ona lima i le lagi,
14Ua faapea atu foi o ia, o Ieova e, le Atua o Isaraelu, e leai se Atua e tusa ma oe i le lagi, po o le lalolagi; o loo tausia le feagaiga ma le alofa i au auauna, o ē savavali i ou luma ma o latou loto atoa;
15o oe ua e tausia i lau auauna o Tavita lo‘u tamā o le mea na e fetalai mai ai ia te ia; na e fetalai mai i lou fofoga, o lou aao foi ua e faataunuuina ai, e faapei ona fai i le aso nei.
16O lenei foi, Ieova e, le Atua o Isaraelu, ia e tausia mā lau auauna o Tavita lo‘u tamā le mea na e fetalai mai ai ia te ia, ua faapea mai, E le aunoa se tagata ia te oe i o‘u luma e tietie i le nofoālii o Isaraelu; tau lava ina tausia e au fanau o latou ala, ina ia latou savavali i la‘u tulafono, e faapei ona ē savali i o‘u luma.
17O lenei, Ieova e, le Atua o Isaraelu, ia e faamaonia lau afioga na e fetalaia mai i lau auauna o Tavita.
18Pe moni ea e afio le Atua ma tagata i le lalolagi? Faauta, o le lagi ma le lagi o lagi e le ofi ai oe; e le atili ai ea ona ē le ofi i lenei fale ua ou faia?
19A ia e liuliualo mai i le tatalo a lau auauna, ma lana aioi, Ieova e, lo‘u Atua, ina ia faafofoga mai i le valaau ma le tatalo, o loo tatalo atu ai lau auauna i ou luma;
20ina ia silasila mai ou fofoga i lenei fale i le ao atoa ma le po, o le mea na e fetalaia mai, e te tuu i ai lou suafa; ina ia e faafogafoga mai i le tatalo e tatalo atu ai lau auauna i lenei mea.
21Ia e faafofoga mai i le aioi atu a lau auauna, ma lou nuu o Isaraelu, pe a latou tatalo atu i lenei mea; ia e faafofoga mai foi mai le lagi, o le mea o loo e afio ai; ia e faafofoga mai, ma ia e faamagalo mai.
22Afai e agasala se tasi tagata i le tasi tagata, ma ua fai atu o ia ia te ia na te faia se tautoga, ina ia tauto ai o ia, aa oo mai foi le tautoga i luma o lou fata faitaulaga i lenei fale;
23ia e faafofoga mai mai le lagi, ma ia e faia le faamasinoga i au auauna, e taui atu i le ua amioleaga, ia tauia lana amio ia te ia lava; e ta‘uamiotonuina foi le ua amiotonu, ia tuuina atu ia te ia e tusa ma lana amiotonu.
24A fasia lou nuu o Isaraelu i luma o e ita mai, ina ua latou agasala atu ia te oe; a latou toe foi mai, ma ta‘uta‘u atu lou suafa, ma tatalo, ma aioi atu i ou luma i lenei fale;
25ia e faafofoga mai oe mai le lagi, ma e faamagalo mai le agasala a lou nuu o Isaraelu, ma e faafoisia mai i latou i le laueleele na e foaiina mai ia te i latou ma o latou tamā.
26A punitia le lagi, ma ua leai se ua, ina ua agasala atu i latou ia te oe; afai latou te tatalo i le mea nei ma latou ta‘uta‘u atu lou suafa, ma liliu ese i a latou agasala, pe a e faatiga ia te i latou;
27ia e faafofoga mai oe i le lagi, ma e faamagalo mai le agasala a au auauna, ma lou nuu o Isaraelu, pe a a‘oa‘oina i latou e oe i le ala lelei latou te savavali ai; ma ia e foai mai le ua i luga o lou laueleele, na e foaiina mai i lou nuu e fai mo latou tofi.
28Afai e i ai i le nuu se oge, afai e i ai se faamai, afai e i ai le mamae, po o le polopologā, o le sē akerise, po o le anufeae; afai e siosioina i latou i le nuu o i ai a latou aai e i latou o e ita mai; so se mala, po o se ma‘i e i ai;
29o talosaga uma ma aioi uma e fai e se tasi tagata, po o lou nuu o Isaraelu uma, o e ua iloa taitoatasi o lona ma‘i, ma lona tiga, ma faaloaloa ona lima i lenei fale;
30ia e faafofoga mai mai le lagi, o le mea o loo e afio ai, ma e faamagalo mai, ma e taui atu i tagata taitoatasi e tusa ma ana amio uma, ua e silafia lona loto; auā na o oe lava e silafia loto o tagata;
31ina ia latou matatau ia te oe, ma savavali i ou ala, i aso uma latou te ola ai i le laueleele na e foaiina mai i o matou tamā.
32O le tagata ese foi, e le so lou nuu o Isaraelu, a ua sau o ia mai le nuu mamao, ona o lou suafa mamalu, ma lou aao malosi, ma lou aao faalaolao; afai latou te o mai, ma tatalo i lenei fale;
33ia e faafofoga mai mai le lagi, o le mea o loo e afio ai, ma e faia e tusa ma mea uma e valaau atu ai le tagata ese ia te oe; ina ia iloa lou suafa e nuu uma i le lalolagi, ma ia latou matatau ia te oe, e faapei o lou nuu o Isaraelu; ia latou iloa foi ua igoa i lou suafa lenei fale ua ou faia.
34Afai e o atu lou nuu e tau le taua ma ē ita mai ia te i latou i le ala e te aauina atu ai i latou, ma latou tatalo atu ia te oe o faasaga mai i lenei aai na e filifilia, ma le fale ua ou faia mo lou suafa;
35ia e faafofoga mai mai le lagi i a latou tatalo, ma a latou aioi atu, ma ia e fai le faamasinoga mo i latou.
36Afai latou te agasala atu ia te oe, (auā e leai se tagata ua le agasala,) ma e toasa mai ia te i latou, ma e tuuina atu i latou i e ita mai ia te i latou, ma latou ave ia te i latou faatagataotaua i se nuu mamao, pe latalata mai;
37a e afai e toe manatunatu ifo i latou i le nuu e avea i ai i latou faatagataotaua, ma latou liliu mai, ma aioi mai ia te oe i le nuu o latou o tāfea i ai, ma latou faapea atu, Ua agasala i matou, ma faapiopio i matou, ma amio leaga;
38afai latou te liliu mai ia te oe ma o latou loto atoa, ma o latou agaga atoa, i le nuu o latou o tāfea i ai, e ave i latou i ai faatagataotaua, ma latou tatalo e faasaga mai i lo latou nuu na e foaiina mai i o latou tamā, ma le aai na e filifilia, ma le fale ua ou faia mo lou suafa;
39ia e faafofoga mai, mai le lagi, o le mea o loo e afio ai i a latou tatalo, ma a latou aioi atu, ma ia e fai le faamasinoga mo i latou, ma e faamagalo mai i lou nuu o e ua agasala atu ia te oe.
40O lenei, lo‘u Atua e, ou te aioi atu, ia silasila mai ou fofoga, ma ia e liliu mai ou fofoga i le tatalo e faia i lenei mea.
41O lenei, Ieova e, le Atua, ia e tulai atu i lou malologa, o oe ma le atolaau o lou malosi; Ieova e, le Atua, ia oofu au ositaulaga i le olataga, ia fiafia au pele i le lelei.
42Ieova e, le Atua, aua ne‘i e ‘alo ou fofoga i le na e faauuina; ia e manatua ou alofa i lau auauna o Tavita.
Who We AreWhat We EelieveWhat We Do
2025 by iamachristian.org,Inc All rights reserved.
