1Ieova e, le Atua o lē taui ma sui, le Atua e o lē taui ma sui, ia e faaali mai lou pupula.
2Ia e tulai mai, o oe le faamasino o le lalolagi; ia e tuu atu le taui i e ua faasausili.
3Ieova e, e mitamita seia afea o e amio leaga; e mitamita o e amio leaga seia afea?
4Ua latou soona tautala i upu faamaualuga, ua mitamita vale o i latou uma o e fai amio leaga.
5Ieova e, ua latou tu‘imomomoina lou nuu, ua latou faatigaina foi lou tofi.
6O le fafine ua oti lana tane atoa ma le tagata ese, ua latou fasiotia, ua latou fasiotia foi ma ē mātuaoti;
7ma ua faapea a latou, E le silasila mai e Ioa, e le manatua foi e le Atua o Iakopo.
8Ia outou iloa, outou e valelea i le nuu; o outou vale foi, tou te popoto afea?
9O le na faia le taliga, e le lagona ea e ia? O le na faia le mata, e le silasila atu ea o ia?
10O lē sasa i nuu ese, e le aoai atu ea e ia? O lē a‘oa‘o i tagata ia popoto.
11O loo silafia e Ieova o mafaufau o tagata, e faatauvaa lava ia.
12Ioa e, amuia le tagata ua e aoaiina; ma e a‘oa‘oina o ia i lau tulafono.
13Ina ia e tuuina atu se mapu ia te ia i ona po ua puapuaga ai, seia elia le lua mo le ua amio leaga.
14Auā e le tuuna e Ieova lona nuu, na te le tuulafoaiina foi lona tofi.
15Auā e toe foi atu le faamasinoga i le amiotonu; e mulimuli atu foi i ai o i latou uma ua loto faamaoni.
16O ai se tulai mai mo a‘u e tetee i e ua amio leaga? O ai se tu atu mo a‘u e tetee i e ua fai mea leaga?
17Ana le fesoasoani mai ia te au o Ieova, po ua toe itiiti ona nofo lea o lo‘u agaga i le mea taaligoligoa.
18Na ou fai ane, O loo mapeva lo‘u vae; ona taofi ae lea o a‘u e lou alofa, Ieova e.
19O le tele o manatunatu i lo‘u loto ua fiafia ai lo‘u agaga ona o faamafanafanaga mai ia te oe.
20E faatasi ea ma oe le nofoālii o i ai amio leaga, o le ua fai ma tulafono le faatiga?
21Ua latou feosofi mai i le agaga o lē amiotonu; ua latou faasalaina le tagata e leai sana agasala.
22A e faia Ieova mo‘u ‘olo maualuga; o lo‘u Atua foi o le papa lea ou te malu ai.
23E taui atu foi e ia ia te i latou a latou agasala, na te faaumatia foi i latou i a latou amio leaga; o Ieova lo matou Atua na te faaumatia i latou.
Who We AreWhat We EelieveWhat We Do
2025 by iamachristian.org,Inc All rights reserved.
