1Ua mavae nei mea, ona faia lea e Apisaloma lona nofoa faataavalevale, ma solofanua, ma tagata e toalimagafulu e taufetuli i ona luma.
2Ua usuusu Apisaloma, ma tu i le tasi itu ala o le faitotoa; ai se tasi ua sau ma lana finauga i le tupu e faamasino ai; ona valaau lea o Apisaloma ia te ia, ua faapea atu, Mai le fea nuu ea oe? Ona tali mai lea o ia, Mai le tasi itu aiga o Isaraelu na sau ai lau auauna.
3Ona fai atu lea o Apisaloma ia te ia, Faauta, ua lelei au mea ma ua tonu, a e leai se tasi ua tofia e le tupu e faalogologo ia te oe.
4Ua fai ane foi Apisaloma, Ta fia fai ma faamasino o le nuu; ina ia o mai ia te au tagata e taitoatasi uma ua i ai se finauga po o se faamasinoga, ona ou faamasino tonu ai lea ia te ia.
5A faalatalata mai se tasi e ifo ia te ia, ona tuu atu lea e ia o lona lima, ma tago atu ia te ia, ma sogi ia te ia.
6Ua faapena ona fai e Apisaloma ia Isaraelu uma na o ane i le faamasinoga a le tupu; ona faaliliu lea ia te ia e Apisaloma loto o tagata o Isaraelu.
7Ua mavae tausaga e fagafulu; ona fai mai lea o Apisaloma i le tupu, Se‘i ou alu i Heperona e faataunuu ai la‘u tautoga, na ou tauto atu ai ia Ieova.
8Auā na matuā tauto lau auauna ina ou nofo i Kasuri i Suria, ua faapea, Afai e faafoisia lava a‘u e Ieova i Ierusalema, ona ou auauna lea ia Ieova.
9Ua fetalai atu le tupu ia te ia, Alu ia oe ma le manuia; ona tulai lea o ia, ua alu i Heperona.
10Ona aauina atu lea e Apisaloma i itu aiga uma o Isaraelu o e tūutua, ua faapea, Pe a outou faalogo i le leo o le pu, ia outou fai ane, O loo ua tupu Apisaloma i Heperona.
11Ua o gatasi ma Apisaloma tagata e toalua lau mai Ierusalema, o e na togia, ua latou o ma le faamaoni, latou te le iloa se mea.
12Ona aami atu lea e Apisaloma ai Aitofele le Kilo, le tulafale a Tavita mai lona nuu o Kilo, a o fai lana taulaga. Ua tupu tele le fouvale, ma ua faatoateleina pea le nuu ia Apisaloma.
13Ona alu ane ai lea o le tasi, ua ta‘u atu ia Tavita, ua faapea, O loto o tagata o Isaraelu o loo mulimuli atu ia Apisaloma.
14Ona fai atu lea o Tavita i ana auauna uma sa ia te ia i Ierusalema, Tutū ia, ina tatou sosola, auā tatou te le mau ‘alofaga i luma o Apisaloma; ia tatou faataalise ona o, ne‘i vave maua mai, ma faaoo faamalosi mai se mea leaga ia i tatou, ma fasi le nuu nei i le pelu.
15Ua fai mai auauna a le tupu i le tupu, O mea uma ua finagalo i ai lo matou alii le tupu, faauta mai ea, e faia e i matou au auauna.
16Ona o atu lea o le tupu atoa ma lona aiga uma, o loo mulimuli ia te ia; a ua tuua e le tupu o fafine e toasefulu, o palake, latou te leoleo i le fale.
17Ua o atu le tupu ma le nuu uma o mulimuli atu ia te ia; ua latou nonofo i le mea mamao.
18O ana auauna uma na latou ui ane i ona tafatafa, atoa ma le au Kereti uma, ma le au Peleti uma, ma i latou uma mai Kata, o tagata e toaono galau o e na mulimuli atu ia te ia nai Kata, ua o ane i latou i luma o le tupu.
19Ona fai ane lea o le tupu ia Itai le sa Katā, O le a le mea e alu atu ai oe faatasi ma i matou? Foi ia, ma e nofo faatasi ma le tupu; auā o le tagata ese oe, ma lē aumau i le mea e te nofo ai.
20Na e sau ananafi; e te fealuai solo ea ona o a‘u i le asō i lo tatou o ma i matou? A o a‘u, ou te soona alu atu lava a‘u; foi ia oe, tou te toe foi ma ou uso, ia ia te oe le alofa ma le faamaoni.
21Ona tali mai lea o Itai i le tupu, ua faapea mai, O loo soifua Ieova, ua soifua foi lo‘u alii le tupu, o le mea e i ai lo‘u alii le tupu, po o le oti po o le ola, e i ai lava lau auauna.
22Ona fetalai atu lea o Tavita ia Itai, O atu ia, ma e alu ane. Ona alu ane lea o Itai le sa Katā, ma ona tagata uma, ma tama iti uma sa ia te ia.
23Ua fetagisi le nuu uma ua leo tetele; ua o ane le nuu uma lava; ua sopoia atu foi e le tupu le alia o Ketarono, ma le nuu uma ua o ane i latou i le ala i le vao.
24Faauta foi, o Satoka ma sa Levī uma lava faatasi ma ia, o loo ave le atolaau o le feagaiga a le Atua; ua latou tuu i lalo le atolaau a le Atua, ua alu ae foi Aviata ina seia uma ona o ane o le nuu uma nai le aai.
25Ona fai mai lea o le tupu ia Satoka, Ina toe momoli ia le atolaau a le Atua i le aai; afai e alofagia a‘u e Ieova, na te faafoisia mai a‘u, ma faailoa mai ai ia te au, atoa ma lona afioaga;
26a e afai e faapea mai o ia, Ou te le fiafia ia te oe; faauta mai, o a‘u lenei, ia faia e ia ia te au e pei ona finagalo i ai o ia.
27Ona fai ane lea o le tupu ia Satoka le faitaulaga, E le o oe ea le tagata vaai? Foi atu ia i le aai ma le manuia; o outou, ma Aimaasu lou atalii, ma Ionatana le atalii o Aviata, o oulua atalii e toalu.
28Faauta, ou te faatalitali i le eleele laugatasi i le vao, seia avatu se upu mai ia te outou e faaali mai ai ia te au.
29Ona toe momoli lea e Satoka ma Aviata o le atolaau a le Atua i Ierusalema; ua la nonofo ai.
30Ua alu ae Tavita i le mauga o Olive, o loo alu ae ai ma tagi, ma lona ulu ua ufitia; ua alu ae lava o ia ua le faaseevaeina; o le nuu uma foi ua ia te ia, ua taitasi ma ufitia lona ulu, ua latou o ae, ma fetagisi fano.
31Na ta‘ua ia Tavita, ua faapea, O loo i ai Aitofele i le fouvalega ma Apisaloma. Ona fai ane lea o Tavita, Ieova e, ia e faaleaogaina le pule a Aitofele.
32Ua oo atu Tavita i le tumutumu o le mauga, ua ia ifo ai i le Atua; faauta foi, ua fetaiai ma ia o Usai le Araki, ua saeia lona ofu, ma le eleele i lona ulu.
33Ona fai ane lea o Tavita ia te ia, Afai ta te o ma a‘u, e fai oe ma faalavelave ia te au;
34a e afai e te foi atu i le aai, ma e fai atu ia Apisaloma, Le tupu e, o a‘u nei lau auauna, na ou auauna i lou tamā anamua, a o lenei, ou te auauna ia te oe; ona e faaleaoga lea o le pule a Aitofele mo a‘u.
35E le o iai ea ia te oe o Satoka ma Aviata, o faitaulaga? O upu uma e te faalogo ai i le fale o le tupu, e te ta‘u atu ai ia Satoka ma Aviata, o faitaulaga.
36Faauta, o loo i ai ma i laua o la atalii e toalua, o Aimaasu le atalii o Satoka, ma Ionatana le atalii o Aviata, tou te avatu ia te au e i laua o upu uma tou te faalogo ai.
37Ona alu lea o Usai le uo a Tavita i le aai; ona sau ai lea o Apisaloma i Ierusalema.
Who We AreWhat We EelieveWhat We Do
2025 by iamachristian.org,Inc All rights reserved.
