TEUTERONOME, 14 - Samoan Old Version Bible

O LE MATAUPU XIV.O le faatonuina o mea e ‘ai.

1O fanau outou a Ieova lo outou Atua; aua tou te selei o outou tino, aua foi tou te sele mamā o outou muaulu mo tagata oti.

2Auā o le nuu paia lava oe mo Ieova lou Atua, ua filifilia foi oe e Ieova ina ia avea oe mona nuu, o le oloa tāua e sili i nuu uma lava o i le fogāeleele.

3Aua e te ‘aina se mea inosia e tasi.

4O manu vaefa nei tou te aai ai; o le povi, ma le mamoe, ma le ‘oti,

5o le aila, ma le sevi, o le imura, ma le ako, ma le tisona, ma le teō, ma le somera;

6o manu vaefa uma foi e magalua le atigivae, ma tosiluaina atigivae i itu e lua, o le e toe ‘ai i lana mama i manu vaefa, o mea ia tou te aai ai.

7A e peitai o mea nei tou te le aai ai i manu ua toe aai i a latou mama, ma manu e magalua atigivae ua tosiluaina; o le kamela, ma le anapata, ma le sefanai; auā latou te toe aai a latou mama, a e le magalua o latou atigivae; e leaga ia ia te outou.

8O le puaa foi, auā e magalua ona atigivae, a e le toe ‘ai i lana mama, e leaga ia ia te outou; aua tou te aai i o latou tino, aua foi tou te papai atu i o latou tino ua mate.

9O mea nei tou te aai ai i mea uma o i le vai; o mea uma e fai ‘apa‘apa ma una tou te aai ai;

10a o mea uma ua le fai ni ‘apa‘apa ma ni una, aua tou te aai ai; e leaga ia ia te outou.

11O manu felelei uma e mamā tou te aai ai.

12A o mea nei aua tou te aai ai; o le aeto, ma le perese, ma le oseni,

13o le rae, ma le aia, ma le taie, ma manu e uiga faatasi i ai;

14ma oreva uma, ma manu e uiga faatasi i ai;

15o le iaena, ma le teemesa, ma le saape, ma le nesa, ma manu e uiga faatasi i ai;

16o le kusa, ma le inesope,

17ma le tanisamiti, o le kati, ma le raama, ma le saleka,

18ma le kasita, ma le matuu, ma manu e uiga faatasi i ai; ma le tukapiti, ma le pe‘a;

19o mea uma foi e fetolofi felelei e leaga ia ia te outou; e le ‘aina i latou.

20O manu felelei uma e mamā tou te aai ai.

21Aua tou te aai i se mea ua mate fua; a ia e avatua i le tagata e āumau i au aai, na te ‘ai ai; pe faatauina atu e oe i se tagata ese; auā o le nuu paia lava oe mo Ieova lou Atua. Aua ne‘i e tunu se tamai ‘oti i le suāsusu a lona tinā.

22Ia e matuā avatua le mea e sefulu a‘i i mea uma e maua i au fua, e tutupu i le fanua i lea tausaga ma lea tausaga.

23O le mea foi e filifilia e ia e tuu ai lona suafa e te ‘ai ai i luma o Ieova lou Atua le mea e sefulu a‘i lau saito, ma lau uaina, ma lau suāuu, ma uluai tama a au povi ma au mamoe; ina ia a‘oa‘oina ai oe ia mata‘u ia Ieova lou Atua i aso uma lava.

24A e afai e mamao lava le ala ia te oe, ma e le lavā foi ona ave ai; afai foi e vava mamao ma oe le mea e filifilia e Ieova lou Atua e tuu ai lona suafa, pe a faamanuia oe e Ieova lou Atua;

25ona e faatau mai ai lea o tupe, ma fusi tupe ma ave i lou lima, ma e alu atu i le mea ua filifilia e Ieova lou Atua.

26E te faatau mai foi i ia tupe o mea uma lava e manao ai lou loto, o se povi, po o se mamoe, po o se uaina, po o se ‘ava, atoa ma mea uma lava e manao i ai lou loto; ona e ‘ai lea i lea mea i luma o Ieova lou Atua, e te olioli foi, o oe, atoa ma lou aiga.

27O le sa Levī foi o i lau aai, aua e te tuulafoai ia te ia; auā e leai sona fanua po o sona tofi faatasi ma oe.

28A mavae tausaga e tolu e te ave lona sefulu uma lava o au mea ua maua mai i lea tausaga, ma e faaputu ai i lau aai;

29o le sa Levī (auā e leai sona fanua po o sona tofi faatasi ma oe,) o le tagata ese foi ma le ua āumatuā, ma le fafine ua oti lana tane, o i lau aai, latou te o ane, ma latou aai ai ia maoona; ina ia faamanuia ai oe e Ieova lou Atua i galuega uma lava a ou lima e te faia.