1Ua mavae le oti o Mose le auauna a Ieova, ona fetalai mai ai lea o Ieova ia Iosua le atalii o Nuno, o le na auauna ia Mose, o loo faapea mai,
2Ua oti Mose la‘u auauna, o lenei foi ina e tulai atu ia, ia sopoia atu Ioritana lena o oe, atoa ma lenei nuu uma, e ō i le nuu ua ou foaiina atu ai ia te i latou, o le fanauga a Isaraelu lava.
3O mea uma lava e solia e o outou alofivae, ou te foaiina atu ai ia te outou, e pei ona ou fai atu ai ia Mose.
4E afua i le vao ma Lepanona lena, e oo atu i le vaitafe tele, o le vaitafe o Eufirate, o le nuu uma o sa Hetī, e oo atu foi i le sami tele, o le mea e goto ai le la, e fai ia ma o outou tuaoi.
5E le tu mai se tagata e tetee ia te oe i aso uma o lou ola; e pei ona ou i ai ia Mose, e faapea ona ou i ai ia te oe; ou te le tuua lava oe, ou te le tuulafoai lava ia te oe.
6Ia e faamalosi ma loto tele; auā e te tofia mo lenei nuu le laueleele na ou tauto ai i o latou tamā e foai atu ia te i latou.
7Tau ina e faamalosi, ma ia matuā loto tele lava; ia e anaana e fai e tusa ma le tulafono uma na fai atu ai Mose la‘u auauna ia te oe; aua e te alu ese ai i le itu taumatau po o le itu tauagavale, ina ia manuia ai oe i mea uma e te alu i ai.
8E le te‘a i lou gutu le tusi o lenei tulafono, a ia mafaufau i ai i le ao atoa ma le po, ina ia e anaana e fai e tusa ma mea uma ua tusia i ai; ona manuia ai lea ia te oe o lou ala, ona e manuia ai lea.
9Ou te lei fai atu ea ia te oe? Ia e faamalosi, ma loto tele; aua e te fefe, aua e te mata‘u; auā o Ieova lou Atua o loo ia te oe i mea uma e te alu i ai.
10Ona fai atu ai lea o Iosua i le au faipule o le nuu, o loo faapea atu,
11Ia outou feoai i le toagālauapi, ma fai atu i le nuu, ia faapea atu, Ina sauniuni ia o a outou oso, auā e toe aso tolu ona outou sopoia atu ai lea o Ioritana nei, ma o atu e fai mo outou le nuu ua foaiina mai e Ieova lo outou Atua ia te outou e fai mo outou.
12Ona fai atu lea o Iosua i sa Reupenā, ma sa Katō, ma le tasi vaega o le itu aiga o Manase, ua faapea atu,
13Ia manatua le upu na poloai atu ai Mose le auauna a Ieova ia te outou, o loo faapea atu, Ua avatua e Ieova lo outou Atua le malologa ia te outou; ma ua foaiina mai e ia lenei nuu ia te outou;
14o a outou avā, ma a outou tama iti, ma a outou manu, latou te nonofo i le nuu na foaiina atu e Mose ia te outou i le itu mai o Ioritana; a o outou, tou te o atu i luma o outou uso, o sauni i le taua, o tagata matuā malolosi uma lava, e fesoasoani ia te i latou;
15seia avatua e Ieova le malologa i o outou uso, e pei ona avatua ia te outou, ma ua faia foi mo i latou le nuu ua foaiina mai e Ieova lo outou Atua ia te i latou; ona toe foi mai ai lea o outou i le nuu ua fai mo outou, na foaiina mai e Mose le auauna a Ieova ia te outou, i le itu mai o Ioritana, i le mea e alu ae ai le la, ma outou mau ai.
16Ona latou tali mai ai lea ia Iosua, ua faapea mai, O mea uma e te fai mai ai ia te i matou, matou te faia lava; o mea uma foi e te aauina atu i ai i matou, matou te o lava i ai;
17e pei ona matou faalogo ia Mose i mea uma, e faapea ona matou faalogo ia te oe; tau ina ia ia te oe Ieova lou Atua, e pei ona i ai o ia ia Mose.
18Ai se tagata e tetee atu i lau pule, ma le le faalogo i au upu i mea uma e te fai mai ai ia te ia, e fasiotia o ia; tau ina e faamalosi, ma loto tele.
Who We AreWhat We EelieveWhat We Do
2025 by iamachristian.org,Inc All rights reserved.
