EPERU, 9 - Samoan Old Version Bible

O LE MATAUPU IX.Ua faasiliga ese le taulaga a Iesu i lo le tulafono.

1O lenei foi, sa i le feagaiga na muamua o sauniga e auauna a‘i, ma le mea paia faalelalolagi.

2Auā na saunia le potu i luma, e ta‘ua o le mea paia, sa i ai le tuugālamepa, ma le laoai, ma le areto e laulauina i luma;

3o ona tala atu foi o le lua o ie puipui sa i ai le potu e ta‘ua o le mea e sili ona paia,

4sa i ai le ipu auro e faamu ai mea manogi, ma le atolaau o le feagaiga ua liloia i auro, sa i ai le ipu auro faaofuofu sa i ai le manai, ma le tootoo o Arona sa tupu, ma papamaa o le feagaiga;

5sa i ona luga foi kerupi pupula, sa maluia ai le nofoa o le alofa; o mea ia e le mafai ona talatala taitasi atu ai nei.

6O lenei, ua faapea ona saunia o ia mea, ona ulufale soo lea o faitaulaga i le potu i luma, ma faia ai a latou galuega;

7a o le potu i tua, e taitasi i tausaga ma foi faatasi i ai na o le faitaulaga sili, e le aunoa ma le toto, sa faitaulaga ai o ia mo ia lava, atoa foi ma agasala a le nuu;

8ua faailoa mai ai e le Agaga Paia, e lei faaalia le ala i le mea e sili ona paia, ina o tu pea le muai fale fetafai;

9o le faatusa lea e oo mai i nei ona po, o loo avatu ai mea alofa ma taulaga, e le mafaia ona faaatoatoaina i la lona loto fuatia ifo o lē auauna i ai,

10o i ai na o mea e ‘ai, ma mea e inu, ma fuluga eseese i le vai, ma faatonuga faaletino, na faatuina seia oo i ona po o le toe fuataiga.

11A o Keriso ua maliu mai, o le faitaulaga sili i mea lelei atali, ua ui ane i le fale fetafai e sili ona lelei ma ona atoatoa, e le faia e lima, o lona uiga e le faia faalelalolagi nei,

12ona ulu faatasi lava lea o ia i totonu o le mea paia, e le ma le toto o ‘oti ma tamai povi, a o lona lava toto, ua na maua le togiola e faavavau mo i tatou.

13Auā afai o le toto o povi poa, ma ‘oti, ma le lefulefu o le povi fafine taanoa, ua sausau atu ai i e ua leaga, e faapaiaina ai e oo i le faamamāina o le tino,

14e le sili ea ona faamamāina o outou loto fuatia ifo ai galuega e oti ai, i le toto o Keriso, o le na avatua o ia e ia e le Agaga e faavavau e fai ma taulaga e le ponā i le Atua, ina ia outou auauna i le Atua soifua?

15O le mea foi lea o loo fai ai o ia ma puluvaga o le feagaiga fou, ona o lona maliu foi e togiola a‘i agasala na faia a o i le muai feagaiga, ia maua ai e i latou ua valaauina o le tofi e faavavau na folafolaina.

16Auā pe a fai se tofiga, se‘i iloga e oti lē ana le tofiga, ona oo ai lea;

17auā e faamaonia se tofiga ona o e ua oti, ina ua le aoga a o ola mai lē ana le tofiga.

18Auā na le faamauina le na muamua a o le o i ai se toto;

19auā ua uma ona ta‘uina atu e Mose i le nuu uma lava o poloaiga uma e tusa ma le tulafono, ona tago atu lea o ia i le toto o tamai povi ma ‘oti, atoa ma le vai, ma fulufulu mamoe e mūmū, ma isopo, ua ia sausauina atu ai le Tusi, atoa ma le nuu uma lava,

20ua fai atu, O le toto lenei o le feagaiga ua poloaiina atu e le Atua ia te outou;

21o le fale fetafai foi atoa ma mea uma e auauna a‘i na ia sausauina atu ai faapea i le toto.

22Na toe ina uma foi o mea uma ona faamamāina i le toto e tusa ma le tulafono; a le o i ai foi se faamaligiina o le toto, ua leai foi se faamagaloina.

23O le mea lea sa tatau ai ona famamāina o faatusa o mea o i le lagi i ia mea; a o mea faalelagi lava e faamamāina i taulaga e sili ona lelei i ia mea.

24Auā ua le ulu atu Keriso i le mea paia ua faia e lima, o le faatusa lea o le mea moni, a o le lagi lava, ina ia iloa ai nei o ia i luma o le Atua mo i tatou;

25a e le ina ia avatu soo o ia e ia ma taulaga, pei o le faitaulaga sili ona ulu atu i le mea paia i lea tausaga ma lea tausaga ma le toto ese;

26auā ana faapea po ua tatau ona tigaina faalasi o ia talu ona faavaeina o le lalolagi; a o lenei, ua tasi lava le faaalia mai o ia i le faaatoaga o tausaga, ina ia aveeseina le agasala, ina ua faia o ia e ia ma taulaga.

27Pei ona tofia foi mo tagata ia tasi lo latou oti, a e mulimuli ane o le faamasinoga;

28na faapea foi Keriso, ua tasi lava ona avatua o ia ma taulaga, ina ia aveina ai agasala a le toatele, e faaali foi o ia ia te i latou o e faatalitali atu ia te ia i lona foi faalua mai, e le ina ia aveina agasala, a ia latou ola ai.