1O le sefulu ma le lua o tausaga o Aasa le tupu o Iuta na fai ai Hosea le atalii o Ele ma tupu o Isaraelu i Samaria i tausaga e iva.
2Na ia faia foi le amio leaga i luma o Ieova, a e lei ausia amio a tupu o Isaraelu e na muamua ia te ia.
3Ua sii mai le taua ia te ia e Salemanesa le tupu o Asuria, ua faitoilalo foi Hosea ia te ia, ma ua fai taulaga i ai.
4A ua iloa e le tupu o Asuria o Hosea a fouvale, auā na na auina le sāvali ia So le tupu o Aikupito, ua na le avane foi le taulaga i le tupu o Asuria, faapei o lea tausaga ma lea tausaga; o le mea lea na puipui ai ia te ia e le tupu o Asuria, ma na fusifusi ia te ia i le fale puipui.
5Ona alu ae lea o le tupu o Asuria i le nuu uma, ua alu ae lava i Samaria, ua sio ai i tausaga e tolu.
6O le iva o tausaga o Hosea na aea ai Samaria e le tupu o Asuria, ua na faatāfeaina foi Isaraelu i Asuria, ma tuuina atu ia te i latou i Hala ma Havoli e lata ane i le vaitafe o Kosane, atoa ma aai o Metai.
7Na oo ia mea ina ua agasala le fanauga a Isaraelu ia Ieova lo latou Atua, o le na aveina ae ia te i latou ai le nuu o Aikupito ai lalo o le lima o Farao le tupu o Aikupito, ma ua latou matatau i atua ese.
8Ua savavali foi i tu a nuu ese sa tulia e Ieova i luma o le fanauga a Isaraelu, atoa ma tu a tupu o Isaraelu sa latou faia.
9Na fai faalilolilo e le fanauga a Isaraelu mea e le tusa ia Ieova lo latou Atua; na latou faia foi mo i latou mea maualuluga i o latou aai uma, o le pae o tagata leoleo atoa ma le aai nofo ‘olo.
10Ua latou faatuina foi mo i latou tupua ma tupua o Asaira i luga i mauga maualuluga uma, ma lalo o laau lauolaola uma.
11Ua latou faamu ai mea manogi i mea maualuluga uma, faapei o nuu ese e ua faatāfea e Ieova i o latou luma, ua latou faia foi mea leaga e faaonoono atu ai ia Ieova;
12auā ua latou auauna i tupua, o le mea na fetalai mai ai Ieova ia te i latou, Aua tou te faia lea mea.
13Ua aoai mai lava Ieova ia Isaraelu atoa ma Iuta e le au perofeta uma, ma tagata vaai uma, ua faapea mai, Ia outou liliu mai i o outou ala leaga, ma ia outou tausi i a‘u poloaiga ma a‘u sauniga, ia tusa ma le tulafono uma na ou poloai atu ai i o outou tamā, na ou tuuina atu ai foi ia te outou e a‘u auauna o le au perofeta.
14A ua latou le faalogo lava, a e peitai ua latou faamaaa i o latou ua, faapei o ua o latou tamā, o e na le talitonu ia Ieova lo latou Atua.
15Ua latou tiai foi ana sauniga ma lana feagaiga na osi ma o latou tamā, atoa foi ma ana tulafono na ia fetalai mai ai ia te i latou; ua latou mulimuli atu foi i le mea faatauvaa, ona amio faatauvaa ai lea o i latou; ua faaa‘oa‘o foi i nuu ese na vagavagaia i latou, na poloai mai ai Ieova ia te i latou, Aua ne‘i faia faapei o i latou.
16Ua latou tuua foi poloaiga uma a Ieova lo latou Atua, ua latou faia foi mo i latou tupua uamea, o tamai povi e lua; ua latou fai foi le tupua o Asaira, ua latou ifo foi i ‘au uma o le lagi, ma latou auauna ia Paala.
17Ua latou faaui ane o latou atalii ma o latou afafine i le afi, ua latou fai togafiti faataulāitu foi, ma saili faailoga; ua matuā tuuina atu foi i latou e i latou ia fai amio leaga i luma o Ieova e faaonoono atu ai ia te ia.
18O le mea lea na matuā toasa mai ai Ieova ia Isaraelu, ua ia ave ese ai ia te i latou i ona luma; e leai se na toe, na o le itu aiga lava o Iuta.
19O Iuta foi na le tausi i poloaiga a Ieova lo latou Atua, a ua latou savavali i tu a Isaraelu na latou faia.
20Ona lafoai ai lea e Ieova o le fanau uma a Isaraelu, ma ia faapuapuagatia i latou, ua na tuuina foi i latou i lima o e na vete ia te i latou, ina seia oo ina lafoaiina i latou uma e ia.
21Auā na ia vavaeeseina Isaraelu ai le aiga o Tavita; ona latou fai ai lea mo latou tupu o Ierepoamo le atalii o Nepata; ua mimilo ese foi e Ierepoamo ia Isaraelu ne‘i latou mulimuli atu ia Ieova, na ia faatupu ia te i latou le agasala tele.
22Na savavali foi le fanauga a Isaraelu i agasala uma a Ierepoamo na ia faia, na latou le te‘a ese ai lava.
23Ua oo ina tuueseina e Ieova ia Isaraelu ai ona luma, e tusa ma lana afioga i ana auauna uma le au perofeta. O lea na faatāfeaina ai Isaraelu ai lo latou nuu i Asuria, ua oo mai lava i le aso nei.
24Ona au mai ai lea e le tupu o Asuria o tagata mai Papelonia, ma Kuta, ma Ava, ma Amato, atoa foi ma Sefavaima, ua tuu atu i latou i aai o Samaria, o sui o le fanauga a Isaraelu, ua latou fai mo i latou o Samaria, ma latou nonofo i ona aai.
25O le amataga o lo latou nonofo i lea nuu ua latou le matatau ai ia Ieova; ona aauina atu ai lea e Ieova o leona ia te i latou, na oti ai nisi o i latou.
26Ona latou ta‘u atu ai lea i le tupu o Asuria, ua faapea atu, O nuu na e avea, ma tuuina i aai o Samaria, ua latou le iloa le tu a le Atua o le nuu; o lea ua aauina mai ai e ia o leona ia te i latou, faauta foi, ua oti ai ō latou, auā ua latou le iloa le tu a le Atua o le nuu.
27Ona fai mai ai lea o le tupu o Asuria, ua faapea mai, Ina avatu ia le tasi o le au ositaulaga na outou aumaia i lea nuu, latou te o e nonofo ai, na te a‘oa‘o atu ia te i latou i le tu a le Atua o le nuu.
28Ona alu atu ai lea o le tasi o le au ositaulaga na latou aumaia mai Samaria, ua nofo i Peteli, ma a‘oa‘o atu ia te i latou i le uiga o le mata‘u ia Ieova.
29A ua taitasi le nuu ma fai o latou lava atua, ma tuu ai i fale o i mea maualuluga sa faia e tagata Samaria, taitasi le nuu ma fai ai i a latou aai na latou nonofo ai.
30Na faia e tagata Papelonia o Suko-peno, na faia foi e tagata Kuta o Nekala, na faia foi e tagata Amato o Asima,
31na faia e tagata Ava o Niveasa ma Tareaka, o tagata o Sefavaima foi na latou susunu i a latou fanau i le afi mo Atameleko ma Anameleko, o atua ia o Sefavaima.
32Na latou matatau ia Ieova, ma fai foi mo i latou o ositaulaga i mea maualuluga mai le nuu uma, na latou ositaulaga mo i latou i fale o i mea maualuluga.
33Na latou matatau ia Ieova, a e auauna foi i o latou lava atua, faapei o tu a nuu e na faatāfeaina i latou nai lea mea.
34Ua oo lava i le aso nei o latou o fai faapei o tu tuai. Latou te le matatau ia Ieova; latou te le fai foi faapei o a latou tu, ma a latou sauniga, ma le tulafono, ma le poloaiga na poloai mai ai Ieova i le fanauga a Iakopo, na ia faaigoaina o Isaraelu.
35Na osi foi e Ieova le feagaiga ma i latou, ma na poloai mai ai ia te i latou, ua faapea mai, Aua tou te matatau i atua ese, aua tou te ifo ia te i latou, aua tou te auauna i ai, aua foi tou te ositaulaga ia te i latou.
36A o Ieova, o le na aveina ae ia te outou ai le nuu o Aikupito i le mana tele ma le aao faaloaloa, tou te matatau ia te ia, tou te ifo ia te ia, tou te ositaulaga foi ia te ia.
37O sauniga foi, ma tu, ma le tulafono, ma le poloaiga na ia tusi mai mo outou, tou te tausi i ai ia faia i aso uma; aua foi tou te matatau i atua ese.
38O le feagaiga foi na ou osia ma outou, aua ne‘i galo lea ia te outou; aua foi tou te matatau i atua ese.
39A e peitaī o Ieova lo outou Atua ia outou matatau i ai; ona laveai lea o ia ia te outou i lima o i latou uma lava o e ita mai ia te outou.
40A e lei faalogo lava i latou, a e peitai ua latou faia lava faapei o a latou tu tuai.
41O lea na matatau ai ia nuu ia Ieova, a e auauna foi i a latou tupua ua ta. O a latou fanau foi, ma fanau a latou fanau, faapei ona faia e o latou tamā e faapea ona faia e i latou, ua oo mai lava i le aso nei.
Who We AreWhat We EelieveWhat We Do
2025 by iamachristian.org,Inc All rights reserved.
