1-2Ua faalatalata mai alii uma na ave ‘au, ma Ioanana le atalii o Karea, ma Iaasenaia le atalii o Hosaia, ma le nuu uma, o tagata nuu atoa ma alii, ma latou fai mai ia Ieremia le perofeta, Se‘i paū atu i ou luma la matou faatoga, ma ia e tatalo ia Ieova lou Atua mo i matou, o i matou nei uma o e totoe; auā o i matou o totoe e toaitiiti, sa toatele, e pei ona sisila ou fofoga ia te i matou;
3ina ia faasino mai ia te i matou e Ieova lou Atua se ala matou te savavali ai, ma se mea matou te faia.
4Ona fai atu ai lea o Ieremia le perofeta ia te i latou, Ua ou faalogo lava, faauta mai, ou te tatalo ia Ieova lo outou Atua e tusa ma a outou upu; o upu uma foi e tali mai ai Ieova ia te outou ou te ta‘u atu ai ia te outou; ou te le natia se upu ia te outou.
5Ona latou fai mai ai lea ia Ieremia, Ia fai Ieova ma molimau moni ma le faamaoni ia te i tatou, pe afai matou te le faia lava e tusa ma mea uma e auina mai ai oe e Ieova lou Atua ia te i matou.
6Pe lelei, pe leaga, matou te faalogo lava i le siufofoga o Ieova lo tatou Atua, matou te auina atu ai oe ia te ia; ina ia manuia i matou pe a matou faalogo i le siufofoga o Ieova lo tatou Atua.
7Ua mavae po e sefulu, ona oo mai ai lea o le afioga a Ieova ia Ieremia.
8Ona valaau ai lea o ia ia Ioanana le atalii o Karea, ma alii uma ua ia te ia na ave ‘au, ma le nuu uma, o tagata nuu atoa ma alii;
9ua fai atu foi o ia ia te i latou, O loo faapea ona fetalai mai o Ieova, le Atua o Isaraelu, o le na outou auina atu ai a‘u e momoli atu la outou faatoga i ona luma;
10afai tou te nonofo pea i lenei nuu, ona ou atiina ae lea o outou, a e ou te le lepetia; ou te totōina foi outou, a e ou te le liaiina; auā ua ou salamo i le malaia ua ou faia ia te outou.
11Aua tou te fefefe i le tupu o Papelonia, o le ua outou fefefe i ai; aua lava tou te fefefe ia te ia, o loo fetalai mai ai Ieova; auā ou te ia te outou e faaola ia te outou, ma laveai ia te outou ai lona lima.
12Ou te alofa ia te outou, e alofa mai ai o ia ia te outou, ma faafoisia outou i lo outou laueleele.
13A e afai tou te fai mai, Matou te le nonofo i lenei nuu; e le faalogo foi outou i le siufofoga o Ieova lo outou Atua,
14o loo faapea outou, E leai lava; a e matou te o i le nuu o Aikupito, matou te le iloa ai taua, ma matou le lagona ai le leo o le pu, matou te le oge foi i mea e ‘ai; matou te nonofo foi i lea mea;
15o le mea lea ia outou faalogologo mai ai nei i le afioga a Ieova, o outou o e totoe o Iuta, o loo faapea ona fetalai mai o Ieova o ‘au, le Atua o Isaraelu, Afai tou te matuā faasaga outou e o atu i Aikupito, ma outou o atu ai e āumau ai;
16ona maua ai lea o outou e le pelu ua outou matatau ai i lea mea, o le nuu o Aikupito lava; o le oge foi ua outou atuatuvale ai, e maua ai lava outou i lea mea, o Aikupito lava; tou te oti foi i lea mea.
17E faapea tagata uma latou te faasaga e o atu i Aikupito, e āumau ai i lea mea; e oti i latou i le pelu, ma le oge, ma le faamai; e leai so latou e toe, pe sao i le malaia ou te faaoo ai i luga ia te i latou.
18Auā o loo faapea ona fetalai mai o Ieova o ‘au, le Atua o Isaraelu, E pei ona ou liligi ifo lo‘u tiga ma lo‘u ita i luga o e sa nonofo i Ierusalema, e faapea foi ona ou liligi ifo lo‘u ita i luga ia te outou, pe a o atu outou i Aikupito; e fai foi outou ma faafanoga, ma mea e ofo ai, e fai a‘i foi fetuu, ma luma; e le toe iloa foi e outou lenei mea.
19Ua fetalai mai Ieova ia te outou o e totoe o Iuta, Aua tou te o i Aikupito; ia outou iloa lava, ua ou matuā fai atu ia te outou i le aso nei.
20Auā ua sese outou tou te tigaina ai, ina ua outou auina atu o a‘u ia Ieova lo outou Atua, ua faapea mai, Ina tatalo ia mo i matou ia Ieova lo tatou Atua; e pei o mea uma foi e fetalai mai ai Ieova lo tatou Atua, ia faapea ona e ta‘u mai ai ia te i matou, ona matou faia lea.
21Ua ou ta‘u atu ai foi ia te outou i le aso nei; a e peitai ua outou le faalogo i le siufofoga o Ieova lo outou Atua, i se mea e tasi na auina mai ai a‘u e ia ia te outou.
22O lenei, ia outou iloa lava, e oti outou i le pelu, ma le oge, ma le faamai, i le mea tou te fia o atu i ai, e āumau ai.
Who We AreWhat We EelieveWhat We Do
2025 by iamachristian.org,Inc All rights reserved.
