1Na ou alaga atu i le Atua i lo‘u leo, na ou alaga atu i le Atua; ona faafofoga mai lea o ia ia te au.
2O le aso na puapuagatia ai a‘u na ou saili atu ai i le Alii; na ou faaloaloa lo‘u lima i le po, e lei gase lava; na le mafaia lo‘u loto ona faamafanafanaina.
3A ou manatua le Atua ou te atuatuvale ai; a ou mafaufau ou te loto vaivai ai. Selā.
4O loo ē taofia o‘u mata ina ia le fia moe; ua ou atuatuvale; ou te le mafai ai ona tautala.
5Ou te manatunatu i ona po anamua; o tausaga o le vavau.
6Ou te manatua la‘u pese i le po; ou te mafaufau i lo‘u loto; e tausailiili foi lo‘u agaga.
7E faavavau lava ea ona lafoai e le Alii? E le toe fiafia mai ea o ia?
8Ua uma ea e faavavau lona alofa? E faaleiu ea lana afioga i lea tupulaga ma lea tupulaga?
9Ua faagalogalo ea e le Atua ona alofa mai? Pe taofi ea e ia o lona alofa mutimuti vale i lona toasa? Selā.
10Ona ou faapea ane lea, O lo‘u vaivai lenei, o tausaga o le aao taumatau o le Silisili ese.
11Ou te manatua galuega a Ioa; e moni, ou te matuā manatua ou vavega anamua.
12Ou te manatunatu foi i au galuega uma, ou te mafaufau i mea na e faia.
13Le Atua e, e paia lava lou ala; o ai se atua e silisili e tusa ma le Atua?
14O oe lava le Atua o lē fai vavega; ua faailoa lou malosi i nuu.
15O lou aao na e faaolaina ai lou nuu, o le fanauga a Iakopo ma Iosefa. Selā.
16Na iloa atu le sami ia te oe le Atua e, na iloa atu le sami ia te oe, ona fefe ai lea; na gatete foi le moana.
17O ao uli na faamaligi ifo ai le vai; o le lagi ua taalili mai lea, ua feoai foi āu u fanafana.
18O le leo o lou faititili ua i le asiosio lea; ua malamalama le atu laulau i uila; ua gatete ma luluina le lalolagi.
19Ua i le sami lou ala, ua i vai e tele lou savali, o ou tulagaaao foi e le iloa lava ia.
20Na e ta‘ita‘iina lou nuu e pei o se lafu mamoe i lima o Mose ma Arona.
Who We AreWhat We EelieveWhat We Do
2025 by iamachristian.org,Inc All rights reserved.
