1Ua mavae atu ia mea; sa ia Apisaloma le atalii o Tavita le tuafafine lalelei, o lona igoa o Tamara; ua manao ia te ia Amanono le atalii o Tavita.
2Ua faanoanoa Amanono, ua oo ina ma‘i o ia ona o Tamara lona tuafafine, auā o le taupou o ia; ua faigata foi ia Amanono e fai se mea ia te ia.
3Sa ia Amanono o lana uo, o lona igoa o Ionatapa le atalii o Sama le uso o Tavita; o le tagata togafiti poto lava Ionatapa.
4Ua fai mai o ia ia te ia, O le a le mea ua faapea ai oe ona tinovale i lea aso ma lea aso, o oe o le atalii o le tupu? E te le ta‘u mai ea ia te au? Ua fai atu Amanono ia te ia, Ou te manao ia Tamara le tuafafine o Apisaloma lo‘u uso.
5Ua fai mai Ionatapa ia te ia, Taoto ia i lou moega, ma e faatagā ma‘i. A sau lou tamā e asiasi mai ia te oe, ona e fai atu lea ia te ia, Se‘i sau Tamara lo‘u tuafafine e au mai mea e ‘ai ma a‘u, ma ia sauni e ia mea e ‘ai i o‘u luma, ina ia ou iloa ai, ma ia fafaga mai ia te au.
6Ona taoto ai lea o Amanono, ua faatagā ma‘i; ua alu atu le tupu e asiasi ia te ia, ona fai mai lea o Amanono i le tupu, Se‘i sau Tamara lo‘u tuafafine, ma ia sauni e ia i o‘u luma ni faapāpā areto se lua, na te fafaga foi ia te au.
7Ua feau atu e Tavita ia Tamara i lona fale, ua faapea atu i ai, Se‘i e alu ane i le fale o Amanono lou tuagane, e te sauni ai ni mea e ‘ai māna.
8Ona alu lea o Tamara i le fale o Amanono lona tuagane, a o ia ua taoto; ona tago ai lea e ia i le palugāfalaoa, ua lomi ma fai a‘i faapāpā areto i ona luma, na ia tunu foi faapāpā areto.
9Ona tago lea o ia i le pani, ma sasaa ifo i ona luma, a ua le mafai ona ‘ai ai o ia; ua fai ane Amanono, Ia o ese tagata uma ia te au; ona o ese lea o tagata uma ia te ia.
10Ua fai ane Amanono ia Tamara, Au mai ia le mea e ‘ai i le afeafe, ina ia e fafaga mai ai ia te au. Ona tago lea o Tamara i faapāpā areto na ia faia, ua avatu ai ia Amanono lona tuagane i le afeafe.
11Ua ia avatu ai ia te ia ina ia ‘ai ai o ia; ona tago atu lea o ia ia te ia, ma na fai atu i ai, Lo‘u tuafafine e, sau ia, ta te momoe ma a‘u.
12Ua tali mai o ia ia te ia, Aua, lo‘u tuagane e, aua le toso ia te au, auā e le faia faapea i Isaraelu; aua le faia lena mea leaga.
13O a‘u foi, e faapefea ona ou faate‘aina o lo‘u luma; a o oe, e tusa ma se ulavale o Isaraelu; o lenei, se‘i lua tautala ma le tupu, auā na te le taofia a‘u mai ia te oe.
14A e le mafai o ia ona faalogo i lana upu, na ia faamalosi ia te ia, ma na toso ia te ia, ua momoe foi ma ia.
15Ona matuā ‘ino‘ino tele lava lea o Amanono ia te ia, o le ua sili lava lona ‘ino‘ino ia te ia i lona luai manao; ua fai atu Amanono ia te ia, Tulai ia, ina alu.
16Ua tali mai o ia ia te ia, Ai se a foi? E sili ona leaga o lenei tuliga o a‘u i le mea na e faia ia te au. A ua le mafai o ia ona faalogo ia te ia;
17Ua ia valaau i le tama sa auauna ia te ia, ua faiatu i ai, Tuu atu ia i fafo o lenei fafine ai ia te au, ma faamau le faitotoa i ona tua.
18Sa ofu ia i le ofu talaloa, auā sa faapea ona ofu ai alofafine o le tupu o e taupou. Ona a‘ita‘i lea e le auauna ia te ia i fafo, ma na faamauina le faitotoa i ona tua.
19Ona tuu lea e Tamara o le efu i lona ulu, ma na saeia lona ofu talaloa sa ofu ai o ia, ua na faaee foi lona lima i lona ulu, ua alu atu, ma tagi aue fano.
20Ua fai mai Apisaloma lona tuagane ia te ia, Sa ia te oe ea o Amanono lou tuagane? A o lenei, lo‘u tuafafine e, ina faalologo ia oe, auā o lou tuagane o ia, aua le manatu i lenei mea. Ona nofo fua ai lea o Tamara i le fale o Apisaloma lona tuagane.
21Ua lagona e Tavita le tupu nei mea uma, ona ita tele ai lea o ia;
22a e lei fai atu Apisaloma ia Amanono se upu leaga po o se upu lelei; auā ua ‘ino‘ino Apisaloma ia Amanono, ina ua na toso ia Tamara lona tuafafine.
23Ua mavae tausaga e lua, ona i ai lea ia Apisaloma o e sele fulufulu o mamoe i Paala-asora, e lata ane i Efaraima. Ua fai atu Apisaloma i atalii uma o le tupu latou te o i ai.
24Ona alu atu lea o Apisaloma i le tupu, ua fai atu i ai, Silasila mai ia, o loo i lau auauna o e sele fulufulu o mamoe; se‘i maliu atu ai le tupu ma ana auauna faatasi ma a‘u lau auauna.
25A ua fai mai le tupu ia Apisaloma, Aua, lo‘u atalii e, aua lava matou te o uma atu, ina ne‘i mafatia oe e i matou. Ua tauanau o ia ia te ia, a e le mafai ona maliu atu ai o ia, a ua faamanuia ia te ia.
26Ona fai mai lea o Apisaloma, Afai tatou te le o, ia matou o ma lo‘u uso o Amanono. Ua fai mai le tupu ia te ia, Lua te o ma ia i se a?
27A ua tauanau Apisaloma ia te ia, ona ia tuuina atu lea o Amanono e o ma ia, atoa ma atalii uma o le tupu.
28Ua fai atu Apisaloma i ana auauna, ua faapea atu, Vaavaai outou pe a fiafia le loto o Amanono i le uaina; a a‘u fai atu ia te outou, Fasi ia Amanono; ona outou fasioti lea ia te ia, aua le fefefe; e le o a‘u ea ua fai atu ai ia te outou? Ia faamalolosi, ma ia outou loto tetele.
29Ua faia e auauna a Apisaloma ia Amanono, pei ona fai atu ai Apisaloma. Ona tulai lea o atalii uma o le tupu, ua taitasi ma tietie i lana falata, ma latou sosola.
30Sa i le ala i latou, ona oo mai lea o le tala ia Tavita, ua faapea, Ua fāsia e Apisaloma atalii uma lava o le tupu, ua le toe so latou e toatasi.
31Ona tulai lea o le tupu, ua ia saeia ona ofu, ma taoto i le eleele; o ana auauna uma foi, ua latou tutū atu ua saei o latou ofu.
32Ua fai atu Ionatapa le atalii o Sama le uso o Tavita, ua faapea atu, Aua ne‘i manatu lo‘u alii, ua tāma‘ia taulelea uma o alo o le tupu, auā ua na o Amanono ua maliu; auā ua pulea o ia e Apisaloma talu mai le aso na ia toso ai ia Tamara lona tuafafine.
33O lenei, aua ne‘i manatu lo‘u alii le tupu i lenei mea, o loo faapea, Ua maliliu alo uma o le tupu; auā ua na o Amanono ua maliu.
34Ua sola Apisaloma. Ua tepa atu le taulealea na vaavaai, ona iloa atu lea, faauta, o le nuu e toatele o loo o mai i le ala i ona tua i le itu o le mauga.
35Ona fai atu lea o Ionatapa i le tupu, Faauta, o alo o le tupu o loo maliu mai e pei o le upu a lau auauna, ua faapea lava ona fai.
36Ua oo ina faauma e ia ana upu, faauta, ua o mai alo o le tupu; ona fetagisi ai lea o i latou ua leo tetele, atoa foi ma le tupu, ma ana auauna uma ua fetagisi tele lava i latou.
37A ua sola Apisaloma, ma ua alu atu ia Talemai le atalii o Ameuta, le tupu o Kasuri; a ua faanoanoa pea Tavita ona o lona atalii i aso uma lava.
38Ua sola Apisaloma, ma alu atu i Kasuri; sa i ai foi o ia i tausaga e tolu.
39Ua naunau Tavita le tupu e alu atu ia Apisaloma; auā ua filemu lona loto ia Amanono, auā ua oti o ia.
Who We AreWhat We EelieveWhat We Do
2025 by iamachristian.org,Inc All rights reserved.
