1Ua fetalai mai foi Ieova ia Mose ma Arona,
2ua faapea mai, Afai ua i se tagata i le pa‘u o lona tino se ma‘i fulafula, po o se mea faapa‘upa‘u, po o se lupe, ua i le pa‘u o lona tino e pei o le ila lepela; ona aumaia lea o ia ia Arona le faitaulaga, po o se tasi o ona atalii o faitaulaga.
3Ona matamata atu ai lea o le faitaulaga i le ila i le pa‘u o lona tino; a liua foi fulufulu o i le ila, ua sinasina, ua peiseai foi ua omo ifo le ila i le pa‘u o lona tino, o le ila lepela lava lea; e matamata atu foi le faitaulaga ia te ia, ma fai atu ua leaga o ia.
4Afai foi ua sinasina le lupe i le pa‘u o lona tino, a e peiseai ua le omo ifo i le pa‘u, ua le liua sinasina foi fulufulu; ona puipuia lea e le faitaulaga le o i ai le ila seia oo i le po fitu.
5E matamata atu foi le faitaulaga ia te ia i le aso fitu, faauta foi, a iloa atu i le ila, ua gata, ua le sosolo foi le ila i le pa‘u, ona toe puipui ai lea e le faitaulaga ia te ia i nisi aso e fitu.
6E toe vaai atu foi le faitaulaga ia te ia i le isi aso fitu; faauta foi, ua sinasina faanenefu le ila, ua le sosolo foi le ila i le pa‘u, ona ta‘umamā ai lea o ia e le faitaulaga, ua na o le mea faapa‘upa‘u lava; ona ta ai lea e ia ona ofu, ona mamā ai lea o ia.
7A e afai ua sosolo tele le mea faapa‘upa‘u i le pa‘u, ina ua uma ona matamata ia te ia o le faitaulaga e faamamāina ai o ia, ona toe matamata atu ai lea o le faitaulaga ia te ia;
8a iloa atu e le faitaulaga, faauta foi, o loo sosolo le mea faapa‘upa‘u i le pa‘u, ona fai atu ai lea e le faitaulaga ua leaga o ia; o le lepela lava o ia.
9Afai o i ai le ila lepela i se tagata, ona au mai ai lea o ia i le faitaulaga.
10A vaaia e le faitaulaga; faauta foi, ua sinasina le mea fulafula i le pa‘u, ua liua foi ua sinasina fulufulu, e i ai foi le aano totototo i le mea fulafula;
11o le lepela lea ua leva i le pa‘u o lona tino, e fai atu e le faitaulaga ua leaga o ia, e le puipui ia te ia; auā ua leaga o ia.
12Afai foi ua tupu tele le lepela i le pa‘u, ua liloia uma ai le pa‘u o le ua i ai le ila i le lepela, e afua ifo i lona ulu e oo lava i ona vae, i mea uma e matamata atu ai le faitaulaga;
13ona vaavaai atu ai lea o le faitaulaga; faauta foi, ua lilo lona tino uma i le lepela, na te ta‘umamāina o le ua i ai le ila; ua liua uma ua sinasina; ua mamā o ia.
14Ae peitai o le aso e iloa ai le aano totototo, e leaga ai o ia.
15E matamata atu foi le faitaulaga i le aano totototo, ma fai atu ua leaga o ia; o le mea leaga le aano totototo; o le lepela lea.
16Afai foi ua toe liua le aano totototo, ua liua ua sinasina, ona alu ane ai lea o ia i le faitaulaga.
17Ona matamata atu ai lea o le faitaulaga; faauta foi, ua liua le ila ua sinasina; ona ta‘umamāina ai lea e le faitaulaga o ia o i ai le ila; ua mamā o ia.
18O le pa‘u o le tino sa i ai se papala,
19a ua mafu, a e afai o i le mea sa i ai le papala e i ai se mea fulafula sinasina, po o se lupe ua sinasina faamūmū, ua vaaia foi e le faitaulaga;
20ua vaaia foi e le faitaulaga, faauta foi, ua peiseai ua omo ifo i le pa‘u, ua liua foi ua sinasina fulufulu o i ai, ona fai atu ai lea e le faitaulaga ua leaga o ia; o le ila lepela lea, o le papala e tupu ai le manunu.
21Ae afai e iloa e le faitaulaga, faauta foi, ua leai ni fulufulu sinasina, ua le omo ifo foi i le pa‘u, a ua sinasina faanenefu; ona puipuia lea o ia e le faitaulaga i aso e fitu.
22Ae afai ua sosolo tele i le pa‘u, ona fai atu ai lea e le faitaulaga ua leaga o ia; o le ila lava lea.
23Ae afai ua gata le lupe i le mea sa i ai, ua le sosolo, o le papala vevela lea; e ta‘umamāina ai o ia e le faitaulaga.
24Afai foi e i le pa‘u o le tino le mea ua mu, ua i ai foi i le aano ua mu se lupe ua sinasina, ua faamūmū, pe faasinasina.
25Ona matamata atu ai lea o le faitaulaga, faauta foi, ua liua ua sinasina fulufulu o i le lupe, ua peiseai ua omo ifo ia i le pa‘u; o le lepela lava lea ua tupu ai i le mea sa mu; ona fai atu ai lea e le faitaulaga ua leaga o ia; o le ila lepela lava lea.
26A e afai ua iloa ai e le faitaulaga, faauta foi, ua leai ni fulufulu sinasina i le lupe, ua le omo ifo foi i le pa‘u, a ua sinasina faanenefu; ona puipuia ai lea o ia e le faitaulaga i aso e fitu.
27Ona matamata atu ai lea e le faitaulaga ia te ia i le aso fitu; afai foi ua sosolo tele i le pa‘u, e fai atu e le faitaulaga ua leaga o ia; o le ila lepela lava lea.
28Ae afai ua gata le lupe i le mea sa i ai, ua le sosolo i le pa‘u, a ua sinasina faanenefu; o le ma‘i fulafula lea i le mea na mu, e ta‘umamāina ai o ia e le faitaulaga; auā o le ma‘i vevela lea i le mea na mu.
29Ai se tane po o se fafine ua i ai se ila i ulu po o le ‘ava;
30ona matamata atu ai lea o le faitaulaga i le ila; faauta foi, ua peiseai ua omo ifo i le pa‘u; ua i ai foi lauulu seea faasamasama; e fai atu e le faitaulaga ua leaga o ia; o le ma‘i pa‘upa‘ua, o le lepela lava lea i le ulu po o le ‘ava.
31Afai foi ua iloa e le faitaulaga i le ila o le ma‘i pa‘upa‘ua, faauta foi, ua peiseai ua le omo ifo i le pa‘u, ua leai ni lauulu uliuli o i ai; ona puipuia ai lea o ia ua i ai le ila o le ma‘i pa‘upa‘ua e le faitaulaga, i aso e fitu.
32O le aso fitu e matamata atu ai le faitaulaga i le ila; faauta foi, ua le sosolo le ma‘i pa‘upa‘ua, ua leai foi ni lauulu faasamasama, ua peiseai ua le omo ifo le ma‘i pa‘upa‘ua i le pa‘u;
33ona tafi ai lea e ia o lona lauulu, a e aua ne‘i tafi le ma‘i pa‘upa‘ua; ona toe puipuia ai lea o ia e le faitaulaga i nisi aso e fitu;
34a oo i le aso fitu ona matamata atu ai lea o le faitaulaga i le ma‘i pa‘upa‘ua, faauta foi, ua le sosolo le ma‘i pa‘upa‘ua i le pa‘u, ua peiseai ua le omo ifo foi i le pa‘u; ona ta‘umamāina ai lea o ia e le faitaulaga; na te taia foi ona ofu, ona mamā ai lea o ia.
35A e afai ua sosolo tele le ma‘i pa‘upa‘ua i le pa‘u, a ua uma ona faamamāina o ia;
36ona matamata atu ai lea o le faitaulaga ia te ia; faauta foi, ua sosolo le ma‘i pa‘upa‘ua i pa‘u, ona le saili lea e le faitaulaga ni lauulu samasama; ua leaga o ia.
37A e afai ua peiseai ua gata le ma‘i pa‘upa‘ua, ua tupu ai foi ni lauulu uliuli; ua mafu le ma‘i pa‘upa‘ua, ua mamā o ia; e ta‘umamāina foi o ia e le faitaulaga.
38Ai se tane, po o se fafine ua i ai i le pa‘u o le tino le lupe, o le lupe ua sinasina;
39ona vaai atu ai lea o le faitaulaga, faauta foi, o i ai le lupe ua sinasina i le pa‘u o lona tino ua nenefu faasinasina; o le ila sinasina lea ua tupu i le pa‘u; ua mamā o ia.
40O le tagata foi ua toulu lona lauulu, ua ulu tula o ia; ua mamā o ia.
41A e afai ua toulu le lauulu i lona muaulu, ua tula lava lona muaulu; ua mamā o ia.
42Afai foi ua i le ulu tula, po o le muaulu tula se ila faasinasina faamūmū; o le lepela lea ua tupu i lona ulu tula, po o lona muaulu tula.
43Ona vaai atu ai lea o le faitaulaga; faauta foi, ua sinasina faamūmū le ma‘i fulafula o i ai le ila i lona ulu tula, po o lona muaulu tula, e peiseai e lepela i le pa‘u o le tino,
44o le tagata lava lea ua lepela, ua leaga o ia; e fai atu e le faitaulaga ua leaga lava o ia; o i ai lona ila i lona ulu.
45O le tagata lepela foi ua i ai le ila, e saeia ona ofu, e to foi lona pulou, na te ufitia foi lona laugutu aupitoaluga, ma alaga atu, Ua leaga, ua leaga.
46O aso uma o i ai le ila ia te ia e leaga ai o ia; ua leaga lava o ia; e nofo toatasi o ia, e nofo ai o ia i tua o le toagālauapi.
47O se ofu foi ua i ai le ila lepela, po o se ofu fulufulu mamoe, po o se ofu lino;
48po o le ala, po o le fausa; o le ie lino, po o le ie fulufulu mamoe, po o le pa‘u, po o se mea lava e faia i le pa‘u;
49afai foi ua faasamasama, po o faamūmū le ila i le ofu, po o le pa‘u, (o le ala, po o le fausa,) po o se mea lava ua faia i le pa‘u; o le ila lepela lava lea; e faaali atu ai i le faitaulaga.
50Ona vaai atu ai lea o le faitaulaga i le ila, ona puipui atu ai lea o le mea o i ai le ila i aso e fitu.
51E matamata atu foi o ia i le mea ua i ai le ila i le aso fitu; afai ua sosolo le ila i le ofu (i le ala, po o le fausa,) po o se pa‘u, po o se mea lava ua faia i le pa‘u; o le lepela aati lea ila; ua leaga lea mea.
52Ona susunuina ai lea e ia o le ofu, o le ala, po o le fausa i le ie fulufulu mamoe, po o le ie lino, po o se mea ua faia i le pa‘u ua i ai le ila; auā o le lepela aati lea; e susunuina ai lava i le afi.
53A e afai ua vaai e le faitaulaga, faauta foi, ua le sosolo le ila i le ofu, (o le ala, po o le fausa,) po o se mea lava ua faia i le pa‘u;
54ona fai atu ai lea o le faitaulaga, latou te taia le mea o i ai le ila, na te puipuia foi i nisi aso e fitu.
55Ona matamata atu ai lea o le faitaulaga i le mea ua i ai le ila, ina ua uma ona taia; faauta foi, ua le liua le lanu o le ila, ua le sosolo foi le ila; e leaga lava lea; e te susunuina ai i le afi; o le mea aati lea, ua au fulufulua i totonu po o tua.
56A e afai ua vaai e le faitaulaga, faauta foi, ua sinasina faanenefu le ila ina ua uma ona taia; ona sasae ese lea e ia i le ofu, po o le pa‘u, po o le ala, po o le fausa.
57Ae afai e iloa pea i le ofu, po o le ala, po o le fausa, po o se mea lava ua faia i le pa‘u; o le mea sosolo lava lea; e te susunuina ai le mea o i ai le ila i le afi.
58O le ofu foi, po o le ala, po o le fausa, po o se mea lava ua faia i le pa‘u, pe a uma ona taia, afai ua te‘a ai ma le ila, e toe taia, ona mamā ai lea.
59O le tulafono lena i le ila lepela i le ofu fulufulu mamoe, po o le lino, (o le ala, po o le fausa,) po o se mea lava ua faia i le pa‘u, e ta‘umamāina ai, pe fai atu ua leaga.
Who We AreWhat We EelieveWhat We Do
2025 by iamachristian.org,Inc All rights reserved.
