1O faataoto foi nei a Solomona, na siitia mai e tagata o Esekia le tupu o Iuta.
2O le mamalu o le Atua ia natia ai mea; a o le mamalu o tupu ia suesue ai mea.
3O le lagi e maualuga lea, ma le lalolagi e maulalo lea; o loto foi o tupu e le ma suesueina.
4Ia faatea le otaota i le ario, ona maua ai lea o se ipu mo le tufuga fai mea uamea;
5ia faatea le ua amio leaga i luma o le tupu, ona faatumauina ai lea o lona nofoālii i le amiotonu.
6Aua e te faalialia i luma o le tupu; aua foi e te tu i le mea e i ai alii sili.
7Auā e lelei ona ia fai atu ia te oe, Sau ia i luga nei; a e leaga ona faamaulaloina oe i luma o le alii ua e vaai i ai.
8Aua ne‘i e alu faataalise e fai le finauga; ina ne‘i fememeai oe, pe a oo i lona iuga, ina ua faamāina oe e lē lua te tuaoi.
9Ia fai la oulua finauga ma lē lua te tuaoi; a e aua le faaali atu le upu faalilo a le tasi tagata;
10ne‘i faalumaina oe e le ua faalogo i ai; ona le te‘a lea ia te oe ona ta‘uleagaina.
11O le upu ua fai faatatauina, o moli auro ia i ato ario togitogi faamamanuina.
12O le tagata ua aoai ma le poto i taliga ua faalogo mai, o le mama auro lea, ma le asoa auro lelei.
13E pei o le mālūlū o le kiona i ona po o le seleselegāsaito; e faapea le avefeau faamaoni i e auina o ia; na te faafoisia mai agaga o ona alii.
14O le tagata ua tautala tele i ana mea e foai, a e pepelo, o ao ma matagi ia, a e leai se timuga.
15O le faatoatoa e faaoleoleina ai le ta‘ita‘i; ma le laulaufaiva filemu e gau ai le ivi.
16Ua e maua ea le meli? ia e ‘ai faatatau i ai; ne‘i e ma‘ona tele ai, ona e puai ai lea.
17Ia seāseā ona e alu atu i le fale o lē lua te tuaoi; ne‘i musu o ia ia te oe, ma ‘ino‘ino ia te oe.
18O le tagata ua molimau pepelo i lē la te tuaoi, o le uatogi lea, ma le pelu, ma le u fanafana e maamaai.
19O le nifo ua gau, ma le vae ua mapeva, o le faatuatua lea i le tagata pepelo i le aso vale.
20O le ua ave ese le ofu i le aso mālūlū, i le ma le vineta i luga o le neteri, e faapea le ua lagi ni siva i le loto ua faanoanoa.
21Afai e fia ‘ai le ua ita ia te oe, ia e fafaga ia te ia; afai e fia inu o ia, ia e faainu ia te ia i le vai;
22auā e te avae ai malala ola i luga o lona ulu; e tauia foi oe e Ieova.
23O le matagi mai le itu i matu e tupu ai uaga; ma le laulaufaiva faatuaupua e tupu ai mata ita.
24E lelei ona nofo i le tumutumu i luga o le fale; a e leaga ona nofo ma le fafine faamisa i le fale tele.
25O le vai mālūlū i le tagata ua lailoa i le fia inu, o le tala lelei lea mai le nuu mamao.
26O le vaipuna ua faagaepu, ma le vaipuna ua faaleagaina, o le tagata amiotonu lea ua paū i luma o le ua amio leaga.
27O le ‘ai tele i meli, e le lelei lea; o le suesuega foi o lo latou mamalu, o le mea e mafatia ai lea.
28O le aai ua sofaia, ua leai se pa, o le tagata lea na te le mataofia lona loto.
Who We AreWhat We EelieveWhat We Do
2025 by iamachristian.org,Inc All rights reserved.
