1Ua mavae lea mea, ona fafasi ai lea e Tavita ia Filisitia, ma faatoilalo ia te i latou, ma ua faoa Kata ma ona faoa aai nai Filisitia.
2Ua ia fāsia foi Moapi; ona avea lea o Moapi ma pologa ia Tavita, ua latou au mai ai taulaga.
3Ua fasia foi e Tavita o Atatesa le tupu o Sopa e oo atu i Amato, ina ua alu atu o ia e faatumau lana pule i le vaitafe o Eufirate.
4Ua maua e Tavita nai ia te ia, o kariota e tasi le afe, ma e tietie i solofanua e fitu o afe, ma ‘au e savavali o tagata e lua sefulu o afe; ua vaevae e Tavita o ua o vae o solofanua i kariota uma, a ua faasao ai māna o kariota e selau.
5Ua o mai tagata o Suria mai Tamaseko e fesoasoani ia Atatesa le tuu o Sopa, ona fāsia lea e Tavita o Suria e lua sefulu o afe ma afe e lua o tagata.
6Ua tuu e Tavita leoleoga i Suria Tamaseko; ua avea Suria ma pologa ia Tavita, ua latou au mai ai taulaga. Ua faasaoina Tavita e Ieova i mea uma na ia alu i ai.
7Ua ave e Tavita o talita auro na i ai i auauna a Atatesa, ua au mai ai i Ierusalema.
8Ua avea foi e Tavita o ‘apa memea e tele lava mai Tipeata ma Kuna, o aai o Atatesa, na fai a‘i e Solomona o le vai ‘apa memea, ma pou, ma ipu ‘apa memea.
9Ua logona e Tou le tupu o Amato ua fāsia e Tavita ‘au uma a Atatesa le tupu o Sopa,
10ona auina mai ai lea o lona atalii o Aturamo i le tupu o Tavita, e alofa ia te ia, ma faafetai ia te ia, ina ua tau o ia ma Atatesa ma fasi ia te ia; auā sa va tau Atatesa ma Tou; ua au mai foi e ia o ipu eseese uma lava o auro, ma ario, ma ‘apa memea.
11Ua faasaina foi e le tupu o Tavita o ia mea ia Ieova, atoa ma le ario ma le auro na aumaia e ia mai nuu ese uma nei, o Etoma, ma Moapi, ma le fanauga a Amoni, ma Filisitia, ma Amaleka.
12Ua fasia foi e Apisai le tama a Seruia o Etoma e sefulu afe ma afe e valu i le vanu masimā.
13Ona tuu lea e ia o leoleoga i Etoma; ma ua avea Etoma uma ma pologa o Tavita. Ua faasaoina Tavita e Ieova i mea uma na ia alu i ai.
14Ua faia Tavita ma tupu i Isaraelu uma, ua ia faia foi le faamasinoga ma le tonu i lona nuu uma lava.
15O Ioapo le tama a Seruia na pule o ia i ‘au; o Iosefatu le atalii o Ailuta o le fatua‘iupu o ia;
16o Satoka le atalii o Akitopo, ma Aimeleka le atalii o Aviata, o faitaulaga i laua; ma Savesa o le tusiupu ia;
17o Penaia le atalii o Ioiata na pule i le au Kereti ma le au Peleti; o atalii foi o Tavita o alii sili i latou e vava lalata ma le tupu.
Who We AreWhat We EelieveWhat We Do
2025 by iamachristian.org,Inc All rights reserved.
