1O upu nei na fai atu ai Mose ia Isaraelu uma lava i le itu mai o Ioritana, i le vao i le eleele laugatasi e feagai ma Sufe, i le va o Parana, ma Topelu, ma Lapana, ma Haserota, ma Tisaapa.
2O le savaliga mai Horepa i le ala e ui i le mauga o Seira e oo atu i Katesapanea, e sefulu ma le tasi ona aso.
3Ua oo i le tausaga e fagafulu, o le masina e tasi le sefulu ma le tasi, o le aso muamua o lea masina, ona fai atu ai lea o Mose i le fanauga a Isaraelu o mea uma lava na poloai atu ai Ieova ia te ia e fai atu ia i latou;
4ina ua uma ona fasia e ia o Sekono le tupu o sa Amorī sa nofo i Hesepona, ma Oko le tupu o Vasana sa nofo i Aserota i Eterei,
5i le itu mai o Ioritana i le nuu o Moapi na amata ai ona folafolaina e Mose o lenei tulafono, ua faapea atu,
6Na fetalai mai Ieova lo tatou Atua ia te i tatou i Horepa, ua faapea mai, Ua leva lo outou nonofo i lenei mauga;
7ia liliu ane outou, ma savavali, ma o atu outou i le mauga o sa Amorī, ma mea uma lava e latalata ane i ai, i le eleele laugatasi, ma le mauga, ma le nuu maulalo, ma le itu i toga, ma le matafaga, e oo i le nuu o sa Kananā, ma Lepanona, e oo lava i le vaitafe tele, o le vaitafe o Eufirate.
8Faauta, ua ou tuuina atu le nuu i o outou luma, o atu ia outou ina fai mo outou le nuu na tauto ai Ieova i o outou tamā o Aperaamo, ma Isaako, ma Iakopo na te foaiina atu ia te i latou, ma a latou fanau pe a mavae atu i latou.
9Na ou fai atu foi ia te outou i ia ona po, ua faapea atu, Ou te le lavatia lava outou e a‘u e toatasi;
10ua faatoateleina outou e Ieova lo outou Atua, faauta foi, o le aso nei e pei o fetu o le lagi ona toatele o outou.
11Ia atili faatoateleina outou e Ieova le Atua o outou tamā, ia faatoaafeina lo outou faitau, ma ia manuia outou ia te ia, e pei ona fetalai mai o ia ia te outou.
12Ou te lavatia faapefea e a‘u e toatasi o a outou mea mamafa, ma a outou avega, ma a outou fefinauaiga?
13Ia outou filifilia mo outou o tagata popoto o e ua mafaufau, ma e ua iloa, i o outou itu aiga, ina ia ou tofia i latou e fai ma alii ia te outou.
14Na outou tali mai ia te au, ua faapea mai, O le mea lelei lea ua e fai mai ai matou te faia.
15Ona ou ave ai lea o alii sili o outou itu aiga, o tagata popoto i latou, ma e ua iloa, ma ou tofia i latou e fai ma alii ia te outou, o alii o taitoaafe, ma alii o taitoaselau, ma alii o taitolimagafulu, ma alii o taitoasefulu, ma faipule i o outou itu aiga.
16O ona po lava ia na ou poloai atu ai i o outou faamasino, ua faapea atu, Ia outou faalogologo i upu a outou uso, ma ia outou faamasino tonu i le tagata ma lona uso, ma le tagata ese o loo ia te ia.
17Aua tou te faailogaina se tasi i le faamasinoga; e pei ona outou faalogologo i le tagata nuu ia faapea foi i le alii; aua lava tou te fefefe i tagata, auā o le faamasinoga o i lo outou Atua lea; a o le mea e faigata ia te outou, ia au mai lea ia te au, ou te faalogologo i ai.
18O ona po lava ia na ou poloai atu ai ia te outou o mea uma lava tou te faia.
19Na tatou o mai mai Horepa, na tatou savavali foi i lea vao uma e lautele ma le matautia, na outou iloa ai i le ala i le mauga o sa Amorī, e pei ona poloai mai ai Ieova lo tatou Atua ia i tatou; ona tatou o atu lea i Katesapanea.
20Ona ou fai atu lea ia te outou, Ua outou oo mai lava i le mauga o sa Amorī, na foaiina mai ia i tatou e Ieova lo tatou Atua.
21Faauta, ua tuuiua atu e Ieova lou Atua le nuu i ou luma, ina e alu ae ia, ia fai mou, e pei ona fetalai mai ia te oe o Ieova le Atua o ou tamā; aua le fefe, aua le atuatuvale.
22Ona outou faalatalata mai lea ia te au o outou uma lava, ua outou fai mai foi, Ia tatou aauina atu tagata e muamua ia i tatou, ina ia latou asiasi le nuu mo i tatou, ma latou au mai ai se tala ia i tatou i se ala tatou te o ae ai, o aai foi tatou te o i ai.
23Sa lelei lea upu ia te au, ona ou aauina atu ai lea ni o outou, o tagata e toasefulu ma le toalua, o le itu aiga ma le tagata.
24Ona latou faasaga ae lea, ma o ae i le mauga, ua latou oo atu i le alia o Esekolo, ua latou asiasi ai.
25Na tago foi o latou lima i fua o le fanua, ona au mai ai lea ia te i tatou, ma latou foi mai ai ma se tala ia te i tatou, ua latou faapea mai, Ua lelei le nuu ua foaiina mai e Ieova lo tatou Atua ia i tatou.
26Na outou le mafafai ona o ae, a ua outou fouvale i le afioga a Ieova lo outou Atua.
27Na outou muimui foi i o outou fale ie, ua outou faapea ane, O le ‘ino‘ino mai o Ieova ia i tatou ua na au mai ai i tatou ai le nuu o Aikupito ina ia tuuina atu i tatou i lima o sa Amorī, ia faaumatia ai i tatou.
28Pe tatou te o ae i fea? Ua faavaivai mai e o tatou uso o tatou loto, ua faapea mai, O le nuu e sili ona toatele, ma le maualuluga ia te i tatou; o aai foi ua tetele, ma ua puipui i pa e oo i le lagi, i le ma lea foi, na matou iloa ai atalii o Anaki.
29Ona ou fai atu lea ia te outou, Aua tou te fefefe, aua foi tou te matatau ia te i latou.
30O Ieova lo outou Atua o le na te muamua ia te outou, e tau o ia mo outou, e tusa ma mea uma na na faia mo outou i Aikupito i o outou luma;
31ma le vao foi, na e iloa ai ona tausia oe e Ieova lou Atua, e pei o le tagata ona tausia o lona atalii, i le ala uma na outou savavali ai, ua oo ina outou oo mai lava i lenei mea.
32A ua outou le faatuatua ia Ieova lo outou Atua i lenei lava mea,
33o le na muamua ia te outou i le ala, e saili se mea tou te to lauapi ai, o i le afi i le po, e faaali atu ai ia te outou le ala tou te savavali ai, o i le ao foi ina o ao.
34Ua faafofogaina mai e Ieova o a outou upu, ona toasa lea o ia, ua tauto foi ia, ua faapea,
35E le iloa lava e se toatasi o nei tagata o lenei tupulaga leaga le nuu lelei na ou tauto ai e avatu mo outou tamā,
36na o Kalepo le atalii o Iefune, e iloa ai e ia; ou te avatu foi ia te ia ma ana fanau le nuu na ia alu atu i ai; auā ua matuā mulimuli atu o ia ia Ieova.
37Ua toasa mai foi Ieova ia te au talu o outou, ua faapea mai, O oe foi, e te le alu i ai.
38O Iosua le atalii o Nuno, o lē tu i ou luma, e alu lava o ia i ai; ia e faamalosi ia te ia, auā o ia na te tofia le nuu mo Isaraelu.
39O a outou tama iti foi na outou fai mai ai, e avea i latou ma tagata o taua, ma a outou fanau na le iloa i lea aso se mea lelei po o se mea leaga, latou te oo lava i ai, ou te avatu ai ia te i latou, e fai ai foi mo latou tofi.
40A o outou, ina liliu ane ia outou, ma o atu i le vao, i le ala i le sami Ulaula.
41Ona outou tali mai lea, ua outou faapea mai ia te au, Ua matou agasala atu ia Ieova; matou te o ae, matou te sii atu le taua, e pei o mea uma lava na poloai mai ai Ieova lo tatou Atua. Ona laei ai lea o outou, ua taitasi ai ma ana mea tau, ua oso vale foi outou e o ae i le mauga.
42Ona fetalai mai ai lea o Ieova ia te au, Ia e fai atu ia te i latou, Aua tou te o ae, aua tou te sii atu le taua, auā o a‘u, ou te le i ai ia te outou; ne‘i fasia outou i luma o e ua ita mai ia te outou.
43Ona ou fai atu ai lea ia te outou, a ua outou le faalogo mai lava, a ua outou fouvale i le afioga a Ieova, na outou faamaualuga, ma outou o ae i le mauga.
44Ona o mai ai lea o sa Amorī, sa nonofo i lea mauga, e faafetaiai ia te outou, na latou tuliloa foi ia te outou, e pei ona faia e lagomeli, ua latou fafasi ia te outou i Seira e oo atu i Horema.
45Ona outou toe fai mai lea, ma outou fetagisi i luma o Ieova, a ua le faafofogaina mai e Ieova o a outou upu, ua le liliu mai foi ona fofoga ia te outou.
46Ona outou nonofo ai lea i Katesa i aso e tele, o ona aso lava na outou nonofo ai.
Who We AreWhat We EelieveWhat We Do
2025 by iamachristian.org,Inc All rights reserved.
