II. NOFOAIGA A TUPU, 4 - Samoan Old Version Bible

O LE MATAUPU IV.O le fata faitaulaga, ma le vai ‘apa memea, ma taelega.

1Ua ia faia foi le fata faitaulaga ‘apa memea, e luafulu kupita lona umi, e lua fulu kupita lona lautele, e sefulu foi kupita lona maualuga.

2Ua ia faia foi le vai ‘apa memea e sefulu kupita lona fua, e afua mai i le tasi itu lau e oo i le isi itu lau; o le mea faataaliolio lava; e lima kupita lona maualuga; o le fua e tolu sefulu ona kupita na faataaliolioina ai.

3Sa i ona lalo o faatusa o povi, e faataaliolioina e soo ai; e sefulu i le kupita e tasi, e faataaliolioina e soo ai le vai. O atu povi e lua sa gaosia ina o gaosia le vai.

4Ua faaee ai i luga o povi e sefulu ma le lua, ua faasaga le tolu i le itu i matu, a e faasaga le tolu i sisifo, a e faasaga le tolu i le itu i toga, a e faasaga le tolu i sasae; ua i ai foi le vai i o latou luga, ua u i totonu o latou tua uma.

5O lona mafiafia foi o le alofilima lea ua faia foi o lona lau e pei o le lau o se ipu, ua fai ai fuga o le susana; o lona tumu e tolu afe o paita lea.

6Ua ia faia foi o tanoa e mulumulu ai e sefulu, o le lima ua ia tuu i le itu taumatau, ma le lima i le itu tauagavale, e mulumulu ai; na latou mulumulu i ai mea e fai a‘i taulaga mu; a o le vai mo le au faitaulaga lea e mulumulu ai.

7Ua ia faia foi o tuugālamepa auro e sefulu, e tusa ma o latou tu, ma ua tuu ai i le malumalu, e lima i le itu taumatau ma le lima i le itu tauagavale.

8Ua ia faia laulau e sefulu, ma ua tuu ai i le malumalu, o le lima i le itu taumatau, ma le lima i le itu tauagavale.

9Ua ia faia foi ipu auro e selau. Ua ia faia foi le lotoā o le au faitaulaga, ma le lotoā tele, ma puipui o le lotoā, ma ua ufiufi puipui i le ‘apa memea.

10Ua ia tuu foi le vai i le itu taumatau i sasae, ua feagai ma le itu i toga.

11Na faia e Hiramo o ulo, ma suo, ma ipu. Ua uma ona faia e Hiramo le galuega na na faia mo le tupu o Solomona mo le fale o le Atua;

12o pou e lua, ma mea lapotopoto, ma kapetala ua i luga o pou e lua, ma mea faaupega e lua e ufiufi a‘i mea lapotopoto e lua o kapetala ua i luga o pou;

13e fa selau o rimoni i mea faaupega e lua; e lua atu rimoni i le mea faaupega e tasi, e ufiufi a‘i mea lapotopoto e lua na i ai i kapetala i luga o pou.

14Na faia foi e ia tuugātanoa, na ia faia foi o tanoa e mulumulu ai i luga o tuuga;

15o le vai e tasi, ma povi e sefulu ma le lua i ona lalo.

16O ulo, ma suo, ma tui, atoa ma a latou mea uma, na faia e Hiramo lona tamā i ‘apa memea pupula mo le tupu o Solomona mo le fale o Ieova.

17Na faia ia mea e le tupu i le eleele laugatasi o Ioritana, i le eleele omea i le va o Sukota ma Saretana.

18Na faia e Solomona o ia mea uma e matuā tele lava; auā na le masino lava le fua o le mamafa o ‘apa memea.

19Na faia e Solomona o mea uma o le fale o le Atua, o le fata faitaulaga auro, ma laulau ua faaee i ai le areto laulauina i luma;

20o tuugālamepa atoa ma o latou lamepa auro lelei, e mu ai e pei o le tu, i luma o le mea e fetalai mai ai;

21o fuga, ma lamepa, ma iofi, na faia e ia i auro, o auro e sili ona lelei;

22o sele lamepa, ma ipu, ma ipu e asu a‘i, ma salefu o auro lelei ia. O le faitotoa o le fale, o ona puipui aupito i totonu mo le mea e sili ona paia, atoa ma puipui o le fale o le malumalu, o auro ia.