SALAMO, 42 - Samoan Old Version Bible

O LE SALAMO XLII.O le naunau atu i le malumalu o le Atua.Ma le usu pese. O le salāmo

e a‘oa‘o ai mā le fanauga a Koru.

1Le Atua e, e faapei ona naunau o le aila i vaitafe, o loo faapea ona naunau o lo‘u agaga ia te oe.

2Ua fia inu lo‘u agaga i le Atua, o le Atua soifua; o afea ea ou te alu atu ai ia iloa ai a‘u i luma o le Atua?

3Ua faia o‘u loimata ma‘u mea e ‘ai i ao ma po, a o fai mai pea i latou, O ifea ea lou Atua?

4Ou te manatunatu i ia mea, ona faavaivai ai lea o lo‘u loto i totonu ia te au; auā sa matou o faatasi ma le toatele, ma matou savavali i le fale o le Atua ma le leo fiafia ma le viiga, o le toatele o e fai le tausamiga.

5Lo‘u agaga e, se a ea le mea ua e faanoanoa ai, ma ē atuatuvale ai i totonu ia te au? Ia e faamoemoe i le Atua, auā ou te toe vivii ia te ia ona o le faaolataga mai ona luma.

6Lo‘u Atua e, ua faanoanoa lo‘u agaga i totonu ia te au; o le mea lea ou te manatunatu ai ia te oe i le nuu o Ioritana, ma le atu Heremoni, ma le mauga itiiti.

7O loo fevalaauai lea moana ma lea moana i le vāgana mai o ou afu; ua felaaiai mai i luga ia te au ou galu ma ou peau uma lava.

8E pule mai Ieova lona alofa ia te au i le ao, e ia te au foi le pese ia te ia i le po, o le tatalo i le Atua o lo‘u ola.

9Ou te fai atu i le Atua lo‘u papa, Se a le mea ua e faagalogalo ai ia te au? Se a le mea ou te fealuai ai ma le eleelea, ona o le saua mai o le ita mai?

10Ua momomo o‘u ivi i le faalumaina o a‘u e i latou o e ita mai ia te au, i lo latou fai mai pea, O ifea ea lou Atua?

11Lo‘u agaga e, se a ea le mea ua e faanoanoa ai? Ua atuatuvale foi oe i totonu ia te au i se a? Ia e faamoemoe i le Atua, auā ou te toe vivii ia te ia, o lo‘u faaolataga ia ma lo‘u Atua.