FAATAOTO, 2 - Samoan Old Version Bible

O LE MATAUPU II.O le aoga o le poto.

1Lo‘u atalii e, afai e te talia a‘u upu, ma e teu i lou loto a‘u poloaiga,

2e uai atu ai ou taliga i le poto, e faasaga atu ai lou loto i le faautauta;

3afai lava e te valaau atu i le atamai, ma e leo tele atu i le faautauta;

4afai e te sailiili ia te ia, e pei ona sailiili i le ario; afai e te suesue i ai, pei ona suesue i le oloa lilo;

5ona e lagona ai lea o le mata‘u ia Ieova, ma e maua ai le poto i le Atua.

6Auā o Ieova na te foai mai le poto; mai lona fofoga le poto ma le faautauta;

7na te teua le poto mo e amio sa‘o; o le talita o ia i e ua tonu lo latou savali,

8ina ia leoleo i ala o lē amiotonu; e tausi foi e ia le ala o ona tagata amio Atua;

9ona e lagona ai lea o le amiotonu, ma le faamasinoga, ma le amio sa‘o; o ala lelei uma lava.

10A oo le poto i lou loto, ma ua mālie ia te oe le atamai;

11e faafeao le mafaufau ia te oe; e leoleo ia te oe le faautauta;

12ina ia laveai ia te oe ai le ala leaga; ai le tagata ua tautala i mea faapiopio;

13o e tuua ala tonu, a e ui atu i ala pogisa;

14o e fiafia e fai mea leaga; ua latou olioli i le faapiopio e leaga;

15o e faapiopio i o latou ala, ma vaogatata i a latou amio;

16e laveai ia te oe ai le fafine ese, o le fafine ese na te faaoleole i ana upu;;

17o le na te tuua le na tausi ia te ia a o teine muli; ua galo foi ia te ia le feagaiga a lona Atua.

18Auā e taunuu atu lona fale i le oti, ma ona ala i agaga o e ua oti;

19o i latou uma o e o atu ia te ia, e le foi mai i latou; latou te le maua ala o le ola.

20Ina ia e savali i le ala o e lelei, ma e tausiusi i ala o e amiotonu.

21Auā o e amio sa‘o, latou te mau i le nuu; ma e ua sao a latou amio, e faatotoeina ai i latou;

22a e vavaeeseina o e amio leaga ai le laueleele, e liaiina ai foi o e amio pepelo.