1A ua manao le tupu o Solomona i fafine ese e toatele, e faaopoopo i le afafine o Farao, o fafine o sa Moapī, ma sa Amonī, ma sa Etomā, ma sa Saitonū, ma sa Hetī;
2o nuu na fetalai mai ai Ieova i le fanauga a Isaraelu, Aua tou te o atu ia te i latou, aua foi ne‘i latou o mai ia te outou; auā e moni, latou te faaliliuina o outou loto e mulimuli i o latou atua. Ua matuā manao Solomona ia te i latou.
3Sa ia te ia ana avā o alo o alii e toafitu galau, ma ana palake e tolu galau; na faaliliueseina lava lona loto e ana avā.
4Auā ua toeaina Solomona ona faaliliueseina lea o lona loto e ana avā e mulimuli i atua ese; na le sao lona loto ia Ieova lona Atua, e faapei o le loto o lona tamā o Tavita.
5Auā na mulimuli atu Solomona ia Asaira le atua fafine o sa Saitonū, ua mulimuli foi ia Melekoma le mea leaga a sa Amoni.
6Ua amio leaga Solomona i luma o Ieova, ua le matuā mulimuli atu o ia ia Ieova, e pei o lona tamā o Tavita.
7Ona fai ai lea e Solomona o le mea maualuga o Kimosa le mea leaga a Moapi, i le mauga o loo i luma o Ierusalema; mo Moloka foi, o le mea leaga a le fanauga a Amoni.
8Ua faapea foi ona fai e ia mo ana avā uma o nuu ese, o e na faamuina mea manogi, ma fai taulaga i o latou atua.
9Ona toasa lea o Ieova ia Solomona, auā ua liliueseina lona loto ia Ieova le Atua o Isaraelu, o le na faaali mai faalua ia te ia,
10ma poloai mai ia te ia i lena lava mea, aua ne‘i mulimuli atu o ia i atua ese; a e lei tausia e ia le mea ua poloai mai ai Ieova.
11Ona fetalai mai lea o Ieova ia Solomona, Ua ia te oe lenei mea, ua e le tausia foi la‘u feagaiga ma a‘u tulafono na ou poloai atu ai ia te oe, o le mea lea ou te matuā saeeseina ai le malo ia te oe, ma ou foaiina atu i lau auauna.
12A ou te le faia lenei mea i lou olaga ona o lou tamā o Tavita; a e ou te saeeseina ai i le lima o lou atalii.
13A e peitai ou te le saeeseina le malo uma; a ou te foaiina atu le itu aiga e tasi i lou atalii, ona o la‘u auauna o Tavita, ona o Ierusalema foi ua ou filifilia.
14Ona faatuina mai lea e Ieova se tasi e tetee ia Solomona o Atata o lo sa Etomā, o so le fanau a le tupu sa i Etoma.
15Aua sa i Etoma Tavita, na alu ae foi Ioapo o le pule i ‘au e tatanu i e na fasiotia, ina ua uma ona fasiotia o tane uma i Etoma;
16auā sa nonofo ai Ioapo ma Isaraelu uma i masina e ono, seia faaumatia tane uma i Etoma;
17ona sosola lea o Atata, o ia ma tagata Etoma, o auauna a lona tamā faatasi ma ia, e o atu i Aikupito, sa tama itiiti foi o Atata.
18Na tulai i latou nai Mitiana, ma latou o atu i Parana; na latou faaopoopo mai ia te i latou tagata o Parana, ma o atu i Aikupito ia Farao le tupu o Aikupito; sa na foai mai ia te ia se fale, ma fai atu e avane mea e ‘ai ia te ia, ua na foai mai foi ia te ia se fanua.
19Na matuā alofagia Atata e Farao, na ia avatu foi ia te ia o le uso o lona faletua e fai ma ana avā, o le uso lea o le masiofo o Tapenesa.
20Na fanaua foi e le uso o Tapenesa ia te ia lona atalii o Kenupata; na faateaeseina o ia ma le susu e Tapenesa i le fale o Farao; sa i le aiga o Farao o Kenupata faatasi ma atalii o Farao.
21Ua faalogo Atata i Aikupito ua taoto Tavita faatasi ma ona tamā, ua oti foi Ioapo le pule i ‘au, ona fai atu lea o Atata ia Farao, Tuu mai ia te au ia ou alu i lo‘u nuu.
22Ona tali mai lea o Farao ia te ia, Se a se mea ua e le maua ia te au, ina ua e fia alu lava i lou nuu? Ona fai atu lea o ia, E leai lava, a ia e matuā tuuina mai ia te au e alu.
23Ua faatuina mai foi e le Atua se tasi e tetee atu ia te ia, o Resona le atalii o Eliata, o le na sola nai lona alii o Atatesa le tupu o Sopa.
24Na faapotopotoina mai e ia o tagata ia te ia, na fai ai o ia ma alii e avea le ‘au, ina ua fasiotia e Tavita o tagata o Sopa; na latou o foi i Tamaseko ma latou nonofo ai, na pule i latou i Tamaseko.
25Na ita foi o ia ia Isaraelu i tausaga uma o Solomona e faaopoopo i le leaga na faia e Atata; ua inosia e ia o Isaraelu, na fai foi o ia ma tupu o Suria.
26O Ierepoamo foi, o le atalii o Nepata o le sa Efaraimā, mai Seleta, o le auauna ia a Solomona, o Serua foi le igoa o lona tinā, o le fafine ua oti lana tane, na fouvale foi o ia i le tupu.
27O le mea foi lenei na fouvale ai o ia i le tupu; na faia e Solomona o Milo, na ia sosoo i mea na sofaia o le aai a Tavita lona tamā.
28O Ierepoamo foi, o le toa malosi ia; ua iloa e Solomona o le taulealea to‘aga ia, ona ia tofia lea o ia e pule i galuega uma e faia e le aiga o Iosefa.
29O ona po ia na alu atu ai Ierepoamo nai Ierusalema, na iloa o ia i le ala e le perofeta o Akia o le Sailo; na ofu foi o ia i le ofu fou, ua na o i laua i le vao.
30Ona tago lea o Akia i le ofu fou sa ofu ai o ia, ma saei ai i saegāofu e sefulu ma le lua.
31Ona fai atu ai lea o ia ia Ierepoamo, Ina ave ia mo oe saega e sefulu, auā o loo faapea mai Ieova le Atua o Isaraelu, Faauta, ou te saeia le malo ai le pule a Solomona, ma ou foai atu ia te oe itu aiga e sefulu;
32a e peitai e i ai ia te ia le itu aiga e tasi ona o la‘u auauna o Tavita, ona o Ierusalema foi o le aai na ou filifilia i itu aiga uma o Isaraelu.
33Auā ua latou lafoai ia te au, ma ua latou ifo ia Asaira le atua fafine o sa Saitonū, ma Kimosa le atua o Moapi, ma Melekoma le atua o le fanauga a Amoni; e lei savavali foi i latou i o‘u ala e fai ai mea tonu i o‘u luma, ma anaana i a‘u tulafono ma a‘u faamasinoga, e pei o lona tamā o Tavita.
34A e ou te le ave ese le malo uma ia te ia; auā ou te faia o ia ma alii i aso uma o lona ola, ona o la‘u auauna o Tavita na ou filifilia; auā na ia tausi i a‘u poloaiga ma a‘u tulafono.
35A e ou te ave ese le malo i lona atalii, ma ou foaiina atu ia te oe o itu aiga e sefulu.
36Ou te foaiina atu foi i lona atalii le itu aiga e tasi ina ia i ai i la‘u auauna o Tavita le lamepa e le aunoa i o‘u luma i Ierusalema le aai na ou filifilia mo a‘u e tuu ai lo‘u igoa.
37Ou te ave foi oe, e te pule i mea uma e manao i ai lou loto, e fai foi oe ma tupu ia Isaraelu.
38Afai foi e te faalogo i mea uma ou te fai atu ai ia te oe, ma e savali i o‘u ala, ma e faia mea tonu i o‘u luma, ina ia e tausi i a‘u tulafono ma a‘u poloaiga, e pei ona faia e la‘u auauna o Tavita; ona ou i ai lea ia te oe, ma ou fai foi mo oe le aiga tumau, e faapei ona ou faia mo Tavita, ou te foaiina foi o Isaraelu ia te oe.
39Ou te faatigaina foi le fanau a Tavita ona o lenei mea, a e le oo i le faavavau.
40Ona lamalama ai lea e Solomona ia fasioti ia Ierepoamo. Ona tulai ai lea o Ierepoamo, ma sola atu i Aikupito ia Seseka le tupu o Aikupito; sa i Aikupito foi o ia ua oo i le oti o Solomona.
41O toe o mea na faia e Solomona, ma mea uma na ia saunia, ma lona poto, ua le tusia ea ia i le tusi i mea na faia e Solomona?
42O tausaga na fai ai Solomona ma tupu ia Isaraelu uma lava i Ierusalema e fagafulu o tausaga ia.
43Ona taoto ai lea o Solomona faatasi ma ona tamā, ua tanumia foi o ia i le aai a Tavita lona tamā; ona soloai ane lea o Reopoamo lona atalii e fai ma tupu.
Who We AreWhat We EelieveWhat We Do
2025 by iamachristian.org,Inc All rights reserved.
