LEVITIKO 4 - Samoan Old Version Bible

O LE MATAUPU IV.O taulaga mo agasala.

1Ua fetalai mai foi Ieova ia Mose,

2ua faapea mai, Ina fai atu ia i le fanauga a Isaraelu, ia faapea atu, A agasala se tasi ma le sese i se tasi poloaiga a Ieova i mea e le tusa ona faia, ma na faia se tasi o ia mea.

3Afai e agasala le faitaulaga ua faauuina, e sese ai le nuu, na te avatu ai ia Ieova se povi poa taanoa e sao ona lelei e fai ma taulaga mo le agasala, ona o lana agasala na ia agasala ai.

4Na te aumaia foi le povi poa taanoa i le faitotoa o le fale fetafai o le faapotopotoga i luma o Ieova; na te faaee foi lona lima i le ulu o le povi poa taanoa, ma fasi ai le povi poa taanoa i luma o Ieova.

5Ona ave ai lea e le faitaulaga ua faauuina nisi toto o le povi poa taanoa, ma avatu ai i le fale fetafai o le faapotopotoga;

6ona fufui ai lea e le faitaulaga lona tamatamai lima i le toto, ma sausau faafitu nisi o le toto i luma o Ieova, i luma o le ie puipui o le mea paia.

7E tuu ai foi e le faitaulaga nisi o le toto i nifo o le fata e mu ai mea manogi lelei i luma o Ieova, ua i ai lea i le fale fetafai o le faapotopotoga; a o le toto uma o le povi na te liligi ai i lalo ifo o le fata e fai ai taulaga mu, ua i ai lea i le faitotoa o le fale fetafai o le faapotopotoga.

8Na te aveeseina ai foi ga‘o uma o le povi poa taanoa o le taulaga mo le agasala, o le ga‘o alo ma ga‘o uma ua i ai.

9O fatuga‘o foi e lua, ma ga‘o o i ai, ua i lāgotua, ma le ga‘o punipū ua i luga o le finagalo,

10ma fatuga‘o, na te aveeseina ia, e pei ona aveeseina e ia i le povi o le taulaga faafetai; e susunuina ia e le faitaulaga i luga o le fata e fai ai taulaga mu.

11A o le pa‘u o le povi poa taanoa, ma ona anogase uma, ma lona ulu, ma ona ālaga, ma ona tōtōga,

12ma ona otaota, na te avea le povi poa taanoa uma lava i tua o le toagālauapi, i se mea mamā, o le mea e sasaa ai le lefulefu, ma ia susunuina ai i luga o fafie i le afi; o le mea e sasaaina ai le lefulefu e susunuina ai ia.

13Afai e sese le faapotopotoga uma o Isaraelu, ma ua lilo le mea i le faapotopotoga, ma ua latou faia se mea e le tusa ma se poloaiga a Ieova i mea uma e le tusa ona fai, ma ua nofo sala i latou;

14pe a iloa le agasala na latou agasala ai, ona avatu ai lea e le faapotopotoga se povi poa taanoa e fai ma taulaga ona o le agasala; latou te au mai ai i luma o le fale fetafai o le faapotopotoga.

15O toeaina foi o le faapotopotoga, latou te faaee ai o latou lima i le ulu o le povi poa taanoa i luma o Ieova; e fasia foi le povi poa taanoa i luma o Ieova.

16Ona au mai lea e le faitaulaga ua faauuina nisi o le toto o le povi poa taanoa i le fale fetafai o le faapotopotoga;

17ona fufui ai lea e le faitaulaga lona tamatamai lima i le toto, ma sausau faafitu ai i luma o Ieova, i luma o le ie puipui.

18Na te tuuina atu ai foi nisi o le toto i nifo o le fata faitaulaga ua i luma o Ieova, ua i ai lea i le fale fetafai o le faapotopotoga; a o le toto uma na te liligiina ifo i lalo o le fata e fai ai taulaga mu, ua i le faitotoa o le fale fetafai o le faapotopotoga.

19A o ona ga‘o uma na te aveeseina ai, ma susunu i luga o le fata faitaulaga.

20Na te faia foi i le povi poa taanoa, pei ona ia fai i le povi poa taanoa na fai ma taulaga mo le agasala, e faapea lava ona fai; ona fai ai lea e le faitaulaga le togiola mo i latou, ona faamagaloina ai lea o i latou.

21Na te avatua le povi poa taanoa i tua o le toagālauapi, ma susunu ai e pei ona ia susunu le uluai povi poa taanoa; o le taulaga mo le agasala lea mo le faapotopotoga.

22A agasala se alii, ma na faia ma le sese se mea e le tusa ma se tasi poloaiga a Ieova lona Atua i mea ua le tusa ona fai, ma ua nofo sala ai o ia.

23A iloa foi e ia lana agasala ua ia agasala ai, na te au mai ai lana taulaga, o se ‘oti poa e sao ona lelei.

24Na te faaee foi lona lima i le ulu o le ‘oti poa, ma fasi ai i le mea e fasi ai le taulaga mu i luma o Ieova; o le taulaga mo le agasala lea.

25Ona ave ai lea e le faitaulaga nisi o le toto o le taulaga mo le agasala i lona tamatamai lima, ma tuu ai i nifo o le fata e fai ai taulaga mu, na te liligiina ifo foi le toto i lalo o le fata e fai ai taulaga mu.

26A o ona ga‘o uma na te susunuina i le fata faitaulaga, e pei o ga‘o o le taulaga faafetai; ona fai ai lea e le faitaulaga se togiola mo ia ona o lana agasala, ona faamagaloina ai lea o ia.

27A e afai e agasala ma le sese se tagata o le nuu, ma ua faia se mea e le tusa ma se tasi poloaiga a Ieova i mea ua le tusa ona fai, ma ua nofo sala o ia;

28a iloa foi e ia lana agasala ua ia agasala ai; ona au mai ai lea e ia o lana taulaga, o se ‘oti fafine e sao ona lelei, ona o lana agasala ua ia agasala ai.

29Na te faaee foi lona lima i le ulu o le taulaga mo le agasala, ma fasi le taulaga mo le agasala i le mea e fai ai le taulaga mu.

30Ona ave ai lea e le faitaulaga nisi o lona toto i lona tamatamai lima, ma tuu ai i nifo o le fata e fai ai taulaga mu; a o lona toto uma na te liligiina ifo i lalo o le fata faitaulaga.

31Na te aveeseina foi ona ga‘o uma, e pei ona aveeseina ga‘o o le taulaga faafetai; ona susunuina ai lea e le faitaulaga i le fata faitaulaga, o le mea manogi lelei lea ia Ieova; e faia foi e le faitaulaga se togiola mo ia, ona faamagaloina ai lea o ia.

32Afai foi na te au mai se tamai mamoe mana taulaga e fai ma taulaga mo le agasala, na te au mai se manu fafine e sao ona lelei.

33Na te faaee foi lona lima i le ulu o le taulaga mo le agasala, ma fasi ai, e fai ma taulaga mo le agasala, i le mea e fasi ai le taulaga mu.

34Ona ave ai lea e le faitaulaga nisi o le toto o le taulaga mo le agasala i lona tamatamai lima, ma tuu ai i nifo o le fata e fai ai taulaga mu; a o lona toto uma na te liligiina ifo i lalo o le fata faitaulaga.

35A o ona ga‘o uma na te aveeseina, e pei ona aveeseina ga‘o o le tamai mamoe o le taulaga faafetai; ona susunuina ai lea e le faitaulaga i le fata faitaulaga, e pei o taulaga e fai i le afi ia Ieova; e faia foi e le faitaulaga se togiola mo ia ona o lana agasala ua ia agasala ai, ona faamagaloina ai lea o ia.