1Ua mavae nei mea ona oti lea o le tupu o le fanauga a Amoni; ona soloai ane lea o Anuni lona atalii e fai ma tupu.
2Ona fai ane lea o Tavita, Ou te agalelei atu ia Anuni le atalii o Naasa, e pei ona agalelei mai o lona tamā ia te au; ona aauina lea e Tavita o ana auauna e faamatalaloto ia te ia ona o lona tamā. Ua oo atu auauna a Tavita i le nuu o le fanauga a Amoni.
3Ona fai atu lea o alii o le fanauga a Amoni ia Anuni lo latou alii, Fa te oe ea e ava mai Tavita i lou tamā, ina ua na aauina mai nisi e faamatalaloto ia te oe? E le o lea ea ua aauina mai ai e Tavita o ana auauna ia te oe, ina ia vaavaai i le aai e agaga i ai, ma ia faaumatia ai?
4Ona pupue atu lea e Anuni i auauna a Tavita, ua tafi faaitutasi a latou ‘ava, ma na sesele ese o latou ofu i totonu, e pau atu i o latou nofoaga; ona aau ese atu lea e ia ia te i latou.
5Ua ta‘u atu ia Tavita, ona aauina atu lea e ia nisi e faafetaiai ia te i latou auā ua tele lava le ma o ia tagata; ua fai ane le tupu, Nonofo ia i Ieriko; seia tutupu a outou ‘ava, i le tou foi mai ai.
6Ua iloa e le fanauga a Amoni ua inosia i latou e Tavita, ona auina atu lea e le fanauga a Amoni e faaoloātaua ia Suria o i Petereopo ma Suria o i Sopa, o tagata e lua sefulu o afe, o ‘au e savavali; ma tagata o le tupu o Maaka e tasi le afe, ma tagata o Isetopa e sefulu afe ma afe e lua.
7Ua lagona e Tavita, ona aauina atu lea e ia ia Ioapo atoa ma ‘au uma o e fitafita.
8Ua o ane foi le fanauga a Amoni, ma tofi le taua i le faitotoa o le aai, a o Suria mai Sopa, ma Reopo, ma tagata o Isetopa, ma Maaka, ua nofo ese i latou i le vao.
9Ua iloa e Ioapo ua faasaga mai le taua ia te ia i luma ma tua, ona filifili ai lea e ia o e ua fitafita uma i Isaraelu, ua ia tofia foi i latou ia faafesagai ma Suria.
10A o e ua totoe o le nuu, ua ia tuu atu i latou i le pule a lona uso o Apisai, ina ia tofia i latou e ia e faafesagai ma le fanauga a Amoni.
11Ona fai atu ai lea o ia, Afai e malo mai Suria ia te au, e te fesoasoani mai ia te au; a e afai e malo mai le fanauga a Amoni ia te oe, ona ou alu atu lea e fesoasoani ia te oe.
12Ia e faamalosi, ma ia tatou faamalolosi mo lo tatou nuu, ma aai a lo tatou Atua, a ia faia e Ieova le mea e finagalo i ai o ia.
13Ona faalatalata atu lea o Ioapo, atoa ma le nuu sa ia te ia, e tau ma Suria; ona latou sosola ai lea ia te ia.
14Ua vaai atu le fanauga a Amoni ua sosola Suria, ona latou sosola foi lea ai luma o Apisai, ma latou ulu atu i le aai. Ona foi ai lea o Ioapo ai le taua ma le fanauga a Amoni, ua oo mai i Ierusalema.
15Ua iloa e Suria ua fāsia i latou e Isaraelu, ona faapotopoto faatasi ai lea o i latou.
16Ona aauina lea e Atatesa o le sāvali e faalaei ‘au mai ia Suria o e i tala atu o le vaitafe; ona latou o mai lea i Ailama; o Sopaka foi le pule i ‘au a Atatesa, na muamua o ia ia te i latou.
17Ua ta‘u mai ia Tavita, ona faapotopoto lea e ia o Isaraelu uma, ma sopoia atu Ioritana, ua oo atu i Ailama. Ona tofia lea e Suria o le taua e faasaga mai ia Tavita, ma ua latou tau ma ia.
18Ua sosola Suria i luma o Isaraelu; ua fasioti foi e Tavita o Suria o e tau i kariota e fitu selau, ma le fa sefulu o afe o e tietie i solofanua, atoa ma Sopaka le pule i a latou ‘au, ua ia fasi ia te ia, ua oti i lea mea.
19Ua iloa e tupu uma e na auauna ia Atatesa, ua fāsia i latou e Isaraelu, ona faalelei lea o i latou ma Isaraelu, ma auauna i ai; ua fefefe foi Suria e toe fesoasoani i le fanauga a Amoni.
Who We AreWhat We EelieveWhat We Do
2025 by iamachristian.org,Inc All rights reserved.
