1Ua oo mai foi le afioga a Ieova ia te au, ua faapea mai,
2O oe na, le atalii o le tagata, e te faamasino ea? e te faamasino ea i le aai o e totolima? e te faaali atu ia te ia o ana mea inosia uma,
3ma e faapea atu, O loo faapea ona fetalai mai o le Alii o Ieova, Ua faamaligi le toto e le aai i totonu ia te ia, ia oo mai ai ona aso, ma ua faia foi tupua mo ia, ia leaga ai o ia.
4Ua e nofo sala i le toto ua e faamaligiina; ua leaga foi oe ia te oe i tupua ua e faia; ua faalatalataina e oe ou aso, ua e oo lava i ou tausaga; o le mea lea ou te tuu atu ai oe e fai ma luma i nuu ese, ma tauemuga i nuu uma.
5O e latalata mai ia te oe, atoa ma ē mamao, latou te tauemu ia te oe lē ua ta‘uleagaina, ma ua tele lou atuatuvale.
6Faauta, o alii o Isaraelu o ia te oe e taitasi ma faamalosi e faamaligi i ai le toto.
7Ua ia te oe i latou o e faaletaualoa i le tamā ma le tinā; ua ia te oe i latou o e faasaua i le tagata ese; ua ia te oe i latou o e faasaunoa i le ua aumatuā ma le fafine ua oti lana tane.
8O a‘u mea paia ua e ‘ino‘ino i ai, ma o‘u sapati ua e solia.
9O ia te oe tagata e feaveaveai ia faamaligi ai le toto; o ia te oe foi o e aai i luga o mauga; o ia te oe o e fai mea leaga lava.
10O ia te oe foi ē faatelenoa i o latou tamā; o ia te oe ē faaleaga le fafine o faanofoeseina ona o lona leaga.
11Ua fai foi e le tasi mea e inosia i le avā a le tasi tagata; ma ua faaleaga e le tasi i le ulavale le avā a lona lava atalii; ua ia te oe foi le ua ia faaleagaina iona lava tuafafine, o le afafine o lona tamā.
12O ia te oe e ua talia mea, alofa e faamaligi ai le toto; ua e talia foi le totogi faasili ma mea faasili; ma ua e fao faasaua mea a le tasi tagata, a ua e faagalogalo mai ia te au, o loo fetalai mai ai le Alii o Ieova.
13Faauta foi, ua ou pati lima i au mea ua maua i le faamanumanu, atoa ma le toto o loo i totonu ia te oe.
14E lavā ea e lou loto? E malolosi ea ou lima i le aso ou te faasala ai ia te oe? O a‘u o Ieova, ua ou fai atu ai, ou te faia lava.
15Ou te faataapeapeaina oe i nuu ese, ma ou faasalalauina oe i nuu eseese, ma ou faaumatia lou leaga ia te‘a ma oe.
16E faaleagaina lava oe e oe i luma o nuu ese, e te iloa ai o a‘u lava o Ieova.
17Ua oo mai foi le afioga a Ieova ia te au, ua faapea mai,
18Le atalii e o le tagata, ua avea le aiga o Isaraelu, ma otaota o uamea ia te au; o ‘apa memea i latou uma, ma ‘apa sinasina, ma uamea, ma pulu i totonu o le ogaumu; o otaota o ario lava i latou.
19O le mea lea ua faapea ona fetalai mai ai o le Alii o Ieova, ua avea outou uma ma otaota o uamea, o le mea lea, faauta, ou te faapotopotoina ai lava outou i totonu o Ierusalema.
20E pei ona faapotopotoina o ario, ma ‘apa memea, ma uamea, ma pulu, ma ‘apa sinasina i totonu o le umu, e tapili ai le afi ia liu suāvai; e faapea ona ou faapotopotoina o outou i lo‘u ita ma lo‘u tiga, ma ou tuu ai outou ia liu suāvai.
21Ou te faapotopotoina lava outou, ma ou tapili i le afi o lo‘u ita ia te outou, e liu suāvai outou i totonu ia te ia.
22E pei ona liu suāvai o ario i totonu o le ogaumu, e faapea foi ona liu suāvai o outou i totonu ia te ia; e iloa ai e outou, o a‘u o Ieova, ua ou sasaa atu lo‘u ita tele i luga ia te outou.
23Ua oo mai foi le afioga a Ieova ia te au, ua faapea mai,
24Le atalii e o le tagata, ia e fai atu ia te ia, O oe na o le laueleele e le faamamāina, ma le le timuia i le aso o le toatamai.
25E i ai le fouvalega o ana perofeta i totonu ia te ia, e pei o le leona tagi ona saeia o mea; ua latou faaumatia tagata; ua latou ave oloa ma mea tāua; ua latou faatoateleina ona fafine ua oti a latou tane i totonu ia te ia.
26Ua solia e ana faitaulaga o la‘u tulafono, ua latou faaleaga foi a‘u mea paia, ua latou le faailogaina mea paia, ma mea e le paia, ua latou le faailoa foi ona eseese o mea leaga, ma mea e mamā, ua latou liliu ese o latou mata i o‘u sapati, ma ua solia a‘u e i latou.
27O ona alii i totonu ia te ia, latou te faapei o luko o loo saei manu, e faamaligi toto, ma faaumatia tagata ia maua ai mea i le saua.
28Ua vali foi ana perofeta ia te i latou i le panisina, ua vaaia mea faatauvaa, ma vavalo i mea pepelo ia te i latou, ua faapea atu, O loo faapea ona fetalai mai o le Alii o Ieova, a e lei fetalai mai lava Ieova.
29Ua faasaua lava tagata o le nuu, ma ua latou fao mea; ua latou faatiga i e ua puapuagatia ma e ua matitiva; ua latou faasaua foi i le tagata ese a e lei faamasinoina.
30Na ou saili ia te i latou se tagata na te atiaeina le pa, ma tu i le mea ua lepetia i o‘u luma mo le nuu, ina ia ou le faaumatia ai; a e ou te lei maua lava.
31O le mea lea ou te liligi atu ai lo‘u ita i luga ia te i latou, ma ou faaumatia i latou i le afi o lo‘u ita; ou te tauia a latou amio i luga i o latou ulu, o loo fetalai mai ai le Alii o Ieova.
Who We AreWhat We EelieveWhat We Do
2025 by iamachristian.org,Inc All rights reserved.
