1Afai e faia e tagata se fefinauaiga, ma latou o mai i le faamasinoga, ina ia faamasinoina ai i latou e faamasino; ona latou ta‘uamiotonuina atu lea le ua amiotonu, a e faasalaina le ua amioleaga.
2Afai foi e tatau ona sasaina o le ua amioleaga, ona fai atu lea e le faamasino e faataatia ia te ia, ma sasaina o ia i ona luma, ia faatatau le faitau o ona ta i lana amio leaga.
3A fagafulu ona ta, soia, a e aua ne‘i faasili ai; ne‘i faaopoopo o ia i ai, ma ta ia te ia i ni ta e tele, ona inosia ai lea o lou uso i ou luma.
4Aua ne‘i e fusi le gutu o le povi a o solisolia e ia le saito.
5Afai e mau faatasi le uso, a oti se tasi o i laua, e leai sana fanau, aua ne‘i nofo tane le avā a le ua oti i se tasi tagata ese; a ia alu i ai le uso o lana tane, ia fai mana avā, ma tausi tama ia te ia.
6Ona avatu ai lea o le igoa o lona uso ua oti i le tama ulumatua e fanau mai ia te ia, ina ne‘i soloia lona igoa ia Isaraelu.
7Afai foi e le loto lea tagata, e fai mana le avā a lona uso, ona alu ae ai lea o le avā a lona uso i toeaina i le faitotoa o le aai, ma fai atu, E le mafai le uso o la‘u tane ona faatumau mo lona uso se igoa ia Isaraelu, e le fia tausi tama mai o ia ia te au.
8Ona aami lea ia te ia e toeaina o lona aai, ona tautala lea o i latou ia te ia; afai foi e tu mai o ia, ma fai mai, Ou te le fia fai avā ia te ia;
9ona sōsō atu lea o le avā a lona uso ia te ia i luma o toeaina, ma to ese lona seevae ai lona vae, ma feanu i ona luma, ma fai ane, e faapea, E faapena lava ona fai i le tagata na te le mafaia ona ati ae le aiga o lona uso.
10Ona ta‘ua lea o lona igoa i Isaraelu, O le aiga o le ua toeseina lona seevae.
11A femisai tagata, o lea tagata ma lea tagata, ona sōsō atu lea o le avā a le tasi na te laveaiina lana tane ai le lima o lē na te fasi ia te ia, ona tago atu lea o lona lima, ma papalu ia te ia;
12ona e tutū ese lava lea o lona tapulima, aua e te alofa ia te ia.
13Aua ne‘i ia te oe i lau taga o maa eseese e fua ai, o le latele ma lē laitiiti.
14Aua ne‘i ia te oe i lou fale o efa eseese, o lē latele ma lē laitiiti.
15A ia ia te oe le maa fua atoatoa ma le tonu, ia ia te oe foi o le efa atoatoa ma le tonu; ina ia faafualoa ai ou aso i le laueleele ua foaiina mai e Ieova lou Atua ia te oe.
16Auā e inosia e Ieova lou Atua o i latou uma o e faia ia mea, e taitasi uma o e faia le amioletonu.
17Ia e manatua le mea na faia e Amaleka ia te oe i le ala, ina ua outou o mai nai Aikupito;
18ina ua faafetaiai mai o ia ia te oe i le ala, ma ua na fafasi i ou tagata na mulimuli, o e na vaivai uma na mulimuli atu ia te oe, a o ē lailoa ma le lavā; e lei mata‘u foi o ia i le Atua.
19Pe a oo foi ina avatu e Ieova lou Atua o le malologa ia te oe i e ita ia te oe uma lava o e vagavagai ia te oe, i le nuu ua foaiina mai e Ieova lou Atua ia te oe e fai mou tofi, ia fai mou lava, ia e soloiesea le faamanatuga o Amaleka ai le lalolagi; aua ne‘i galo ia te oe.
Who We AreWhat We EelieveWhat We Do
2025 by iamachristian.org,Inc All rights reserved.
