ESOTO 3 - Samoan Old Version Bible

O LE MATAUPU III.Ua auina atu Mose e le Atua na te faaolaina Isaraelu.

1Sa leoleo Mose i le lafu mamoe a le tamā o lana avā, o Ietero le ositaulaga i Mitiana; ua ia ta‘ita‘iina ane le lafu mamoe i ona tala atu o le vao, ua oo lava i le mauga o le Atua, o Horepa.

2Ua faaali mai ai ia te ia le agelu a Ieova i le afi mumū i totonu o le laau talatala; ona vaai atu lea o ia, faauta, o loo mu lava le laau talatala i le afi, a e lei faaumatia le laau talatala.

3Ona faapea lea o Mose, Ou te afe atu, ma a‘u maimoa i lenei mea ou te vaai ua ese lava, pe faapefea ona le susunuina o le laau talatala.

4Ua silafa e Ieova ua afe ane ia e maimoa, ona valaau mai lea o le Atua ia te ia nai totonu o le laau talatala, ua fetalai mai, Mose, Mose e! Ona fai atu lea o ia, O a‘u lenei.

5Ona fetalai mai lea, Aua e te faalatalata mai iinei; ina to ese ia ou seevae i ou vae, auā ua sa lava le eleele o loo e tu ai nei.

6Ua ia faapea mai foi, O a‘u o le Atua o lou tamā, o le Atua o Aperaamo, o le Atua o Isaako, o le Atua foi o Iakopo. Ona ufitia lea e Mose o ona mata, auā ua fefe i vaai atu i le Atua.

7Ona fetalai mai lea o Ieova, Ua ou matuā vaai atu i le puapuaga o o‘u nuu o loo i Aikupito, ua ou faalogo foi i lo latou alaga ona o e pule faasaua ia i latou, ua ou iloa foi lo latou tiga.

8O lenei, ua ou alu ifo, ou te laveai mai ia te i latou ai lima o Aikupito, ma ou aveina ae i latou ai lea nuu i le nuu lelei ma le lautele, o le nuu o tafe ai le suāsusu ma le meli, o le mea e i ai sa Kananā, ma sa Hetī, ma sa Amorī, ma sa Perisē, ma sa Hivī, atoa ma sa Iepusē.

9O lenei, faauta, ua oo mai ia te au le alaga o le fanauga a Isaraelu, ua ou vaai atu lava i le sauaga o loo faasaua ai Aikupito ia te i latou.

10O lenei, ina sau ia, ou te auina atu oe ia Farao, ina ia e au mai lo‘u nuu o le fanauga a Isaraelu mai Aikupito.

11Ona fai atu lea o Mose i le Atua, O ai ea a‘u nei, ou te alu atu ai ia Farao, ma a‘u aumaia le fanauga a Isaraelu mai Aikupito?

12Ona fetalai mai lea o ia, Ou te ia te oe lava; o lenei foi le faailoga ia te oe ua ou auina atu oe, pe a e au mai le nuu mai Aikupito, tou te auauna ai i le Atua i lenei mauga.

13Ua fai atu Mose i le Atua, Faauta, pe a a‘u alu i le fanauga a Isaraelu, ma a‘u fai atu ia i latou, Ua auina mai a‘u ia te outou e le Atua o outou tamā; ona latou fai mai lea ia te au, O ai ea lona suafa? Se a ea sa‘u e fai atu ai ia te i latou?

14Ona fetalai mai lea o le Atua ia Mose, O A‘U O LĒ OLA, O LOO OLA LAVA; ua ia fetalai mai foi, E te fai atu i le fanauga a Isaraelu, ia faapea O A‘U O LĒ OLA, O ia na auina mai a‘u ia te outou.

15Ua toe fetalai mai foi le Atua ia Mose, Ia faapea ona e fai atu i le fanauga a Isaraelu, Ua auina mai a‘u ia te outou e Ieova, le Atua o outou tamā, o le Atua o Aperaamo, o le Atua o Isaako, o le Atua foi o Iakopo, o lo‘u igoa lena e faavavau, o la‘u faamanatuga lena i lea tupulaga ma lea tupulaga.

16Alu ia, ma e faapotopoto i toeaina o Isaraelu, ma fai atu ia te i latou, Ua faaali mai ia te au o Ieova, le Atua o outou tamā, o le Atua o Aperaamo, ma Isaako, ma Iakopo, o loo faapea mai, Ua ou matuā asiasi atu lava ia te outou, atoa ma le mea ua faia ia te outou i Aikupito.

17Ua ou faapea, Ou te aveina ae outou ai le puapuaga o i Aikupito e o atu i le nuu o sa Kananā, ma sa Hetī, ma sa Amorī, ma sa Parisē, ma sa Hivī, ma sa Iepusē, o le nuu o loo tafe ai le suāsusu ma le meli.

18E faalogo lava i latou i lau upu; tou te o foi, o oe ma toeaina o Isaraelu i le tupu o Aikupito, tou te fai atu foi ia te ia, Ua fetaiai ma i matou a Ieova, o le Atua o sa Eperū; o lenei, se‘i e tuu mai matou te o Malaga e tolu ona aso i le vao, matou te fai ai taulaga ia Ieova lo matou Atua.

19A ua ou iloa lava e le tuuina mai outou e le tupu o Aikupito ina ia o, se‘i iloga o le lima malosi;

20a ou te faaoo atu lo‘u lima ma ou taia Aikupito i o‘u vavega uma lava ou te faia i ai; mulimuli ane na te tuuina atu outou e o.

21Ou te faatupuina foi le alofa o Aikupito i lenei nuu, a oo ina outou o, tou te le o fua;

22a e taitasi le fafine ma ole atu i le o tuaoi ma ia, ma le o nofo i lona fale, i mea ario, ma mea auro, ma ofu, tou te faaofu a‘i i outou atalii ma outou afafine, tou te faamativaina ai Aikupito.