1O oefoi le atalii o le tagata, ia e vavalo atu ia Koku, ma fai atu, O loo faapea ona fetalai mai o le Alii o Ieova, Faauta, ou te fai oe mo‘u fili Koku e, le alii sili o Rosi, ma Meseko, ma Tupalu;
2ou te faafoisia oe ma ou ta‘ita‘iina oe, ou te faaae mai foi ia te oe ai le itu i matu, ma aumai ia te oe i mauga o Isaraelu;
3ou te ta foi lau aufana ia paū ese i lou lima tauagavale, ma ou faapaūeseina au u fanafana i lou lima taumatau.
4E te paū i mauga o Isaraelu, o oe, ma au ‘au uma, ma nuu o loo ia te oe; ou te tuuina atu oe i manu feai felelei uiga eseese, ma manu feai o le vao, ia ‘aina ai lava oe.
5E te paū lava i le fogāeleele; auā o a‘u lava ua ou fai atu, o loo fetalai mai ai le Alii o Ieova.
6Ou te lafo atu foi se afi ia Makoku, atoa ma e o nonofo faatalanoa i nuu tu matafaga; latou te iloa ai o a‘u lava o Ieova.
7Ou te faailoa atu foi lo‘u igoa paia i totonu o lo‘u nuu o Isaraelu; ou te le toe mafai ona ia faaleagaina lo‘u igoa paia; e iloa foi e nuu ese o a‘u lava o Ieova, o le Paia o i Isaraelu.
8Faauta, ua oo mai, ua uma ona fai, o loo fetalai mai ai le Alii o Ieova; o le aso lava lea na ou fai atu ai.
9E o atu foi e o nonofo i aai o Isaraelu, ma latou faamu ma susunu le auupega, o talita, ma talipupuni, o aufana foi, ma u fanafana, o tao foi, ma tao e velo; latou te faamuina ai i le afi i tausaga e fitu.
10Latou te le ave foi ni laau ai le vao, latou te le ta foi ni laau i le vao matua; auā latou te faamu le auupega i le afi; latou te vetea foi mea a latou o e sa vetea a latou mea, latou te fao foi mea a e sa faoa a latou mea, o loo fetalai mai ai le Alii o Ieova.
11O lea aso foi ou te tuu atu ai ia Koku i lea lava mea se mea e fai ma tuugamau i Isaraelu, o le vanu e ui ai tagata i le itu i sasae o le sami; e punitia ai e o ui atu ai; latou te tatanu foi ia Koku ma lona vao tagata uma i lea mea; latou te faaigoa ai foi, O le vanu o Hamona-Koku.
12E fitu masina e tatanu ai i latou e le aiga o Isaraelu, ina ia faamamāina ai le laueleele.
13E tatanu foi i latou e tagata uma o le nuu; e fai foi ma mea e ta‘ua ai i latou, o le aso foi e viia ai a‘u, o loo fetalai mai ai le Alii o Ieova.
14Latou te tofia foi isi tagata e fai mo latou faiva ona feoai solo i le nuu, latou te faatasi ma e ui ane latou te tanumia e o totoe i le fogāeleele, ia faamamāina ai; a mavae masina e fitu ona latou suesue lea.
15A o atu foi ē ui ane i le nuu, a iloa e se tasi se ivi o se tagata, ona faatuina ai lea e ia se faailoga, seia tanu ai e i latou o e tanumia tagata i le vanu o Hamona-Koku.
16E igoa foi le aai ia Hamona. Latou te faamamāina ai foi le nuu.
17Ua faapea foi ona fetalai mai o le Alii o Ieova, O oe le atalii o le tagata, ia e fai atu i manu felelei uiga eseese, ma manu feai uma o le vao, Ia aofai mai outou, ina o mai ia, faapotopoto mai ia outou i itu uma i la‘u faigaai ou te faia ma outou, o le faigaai tele i mauga o Isaraelu, tou te aai ai tino ma inu toto.
18Tou te aai tino o e malolosi, ma inu le toto o alii sili o le lalolagi, o mamoe poa, ma tamai mamoe, ma ‘oti poa, ma povi poa, o manu pepeti o Vasana i latou uma.
19Tou te aai ga‘o seia outou maoona, ma outou inu toto seia outou malilie i la‘u faigaai ou te saunia ma outou.
20Tou te maoona ai i la‘u laoai i solofanua, ma e tau i kariota, ma e malolosi, atoa foi ma le ‘au tau uma lava, o loo fetalai mai ai le Alii o Ieova.
21Ou te faailoa atu foi lo‘u mamalu i luma o nuu ese; e iloa foi e nuu uma la‘u faamasinoga ua ou faia, ma lo‘u lima ua ou faaoo ia te i latou.
22E iloa ai foi le aiga o Isaraelu, o a‘u o Ieova lo latou Atua, e amata i lea aso e faapea lava pea.
23E iloa foi e nuu ese, na tāfea le aiga o Isaraelu ona o a latou amio leaga, ina ua latou agasala mai ia te au, o le mea lea na ‘alo ai o‘u mata ia te i latou, ma ou tuuina atu i latou i lima o e na ita ia te i latou; na oti foi i latou uma i le pelu.
24Ua ou faia ia te i latou e tusa ma lo latou leaga, ma o latou solitulafono, ua ‘alo ai foi o‘u mata ia te i latou.
25O le mea lea ua faapea ona fetalai mai ai o le Alii o Ieova, Ou te faafoisia nei le tafeaga a Iakopo, ou te alofa foi i le aiga uma o Isaraelu, ou te fuā foi ona o lo‘u igoa paia;
26ina ua uma ona tauave e i latou lo latou faamasiasiga, ma a latou amio leaga uma na latou agaleaga mai ai ia te au, ina o latou nonofo ma le filemu i lo latou laueleele, e leai foi se na faamata‘u ia te i latou.
27A oo ina ou faafoisia mai i latou i nuu ese, ma ou faapotopotoina i latou ai nuu o e na fai i latou mo latou fili, a faapaiaina foi a‘u ia te i latou i luma o nuu e tele,
28ona latou iloa ai lea o a‘u lava o Ieova lo latou Atua, o le na tāfea ai i latou i nuu ese, ma ou faapotopotoina i latou i lo latou lava laueleele, ma ou le toe tuua lava so latou i ia mea.
29E le toe ‘alo lava o‘u mata ia te i latou, ina ua ou liligi ifo lo‘u Agaga i luga o le aiga o Isaraelu, o loo fetalai mai ai le Alii o Ieova.
Who We AreWhat We EelieveWhat We Do
2025 by iamachristian.org,Inc All rights reserved.
