1Fai mai, Afai e molia e se tagata lana avā, ma ua alu ese o ia ia te ia, a e fai ma avā a se tasi, e toe alu atu ea o ia ia te ia? E le matuā leaga ai ea lena nuu? A o oe, ua e talitane i tane e toatele, a ia e toe foi mai ia te au, ua fetalai mai ai Ieova.
2Ina faasaga ae ia ou mata i mauga tula, ma vaavaai, po o ifea ea se mea ua e le mulilua ai? ua e lamalama i ala mo i latou, e pei o se tagata Arapi i le vao; ua leaga ia te oe le nuu i lou talitane ma lau amio leaga.
3O le mea lea ua taofia ai le timu, ua leai foi ni timuga mulimuli; a ua ia te oe le muaulu o le fafine talitane, e le mafaia ona faamaina o oe.
4E te le valaau mai ea ia te au e amata nei lava, Lo‘u tamā e, o oe lava le ta‘ita‘i o a‘u ina o ou teine muli?
5E faamoemoe ea lona toasa e faavavau? pe na te tausia pea lava i ai? Faauta foi, ua e tautala, ua e faia foi mea leaga, ma e faamalosi i ai.
6Na fetalai mai Ieova ia te au i ona po o Iosia le tupu, Po ua e iloa ea le mea ua faia e Isaraelu, le ua liliu ese? Ua alu ia i luga o mauga maualuluga uma, ma lalo ifo o laau lauolaola uma, ma ua mulilua ai.
7Na ou fai atu foi ina ua uma ona ia faia o ia mea uma, Ina e toe foi mai ia ia te au; a e lei toe foi mai lava ia, o lona uso faa‘ole‘ole foi o Iuta na ia iloa atu i ai.
8Ona ou iloa lea, e ui lava i na mea uma na mulilua ai Isaraelu le ua liliu ese, na ou aleia ai o ia, ma ou avatu ia te ia le tusi alei, a ua le fefe lava lona uso faa‘ole‘ole o Iuta, a ua alu ia ua mulilua foi o ia.
9Ona o le leaga o lona mulilua ua ia faaleaga ai le nuu, ma ua mulilua i maa ma laau.
10A e ui lava i ia mea uma, e lei foi mai ia te au o lona uso faa‘ole‘ole o Iuta ma lona loto atoa, a ua pepelo o ia, o loo fetalai mai ai Ieova.
11Ua fetalai mai Ieova ia te au, O Isaraelu ua liliu ese ua sili o ia ona amiotonu ia Iuta le ua faa‘ole‘ole.
12Ina alu ia, ma e tala‘i atu ia upu i le itu i matu, ia faapea atu, Isaraelu e, le ua liliu ese, ina foi mai ia, o loo fetalai mai ai Ieova, ou te le vaai ma le ita ia te outou; auā ou te alofa lava a‘u o loo fetalai mai ai Ieova, e le tumau lo‘u ita e faavavau.
13Tau ina e iloa lau agasala ua e fouvale ai ia Ieova lou Atua, ua e fealuai i tane ese i lalo o laau lauolaola uma; ua e le faalogo mai foi i lo‘u leo, o loo fetalai mai ai Ieova.
14Le fanau liliu ese e, ina foi mai ia, o loo fetalai mai ai Ieova; auā e ui lava ina ou ‘ino‘ino ia te outou, a ou te avea outou, e taitasi i aai ma le taitoalua i aiga, ma a‘u aumaia outou i Siona.
15Ou te avatu foi ia te outou leoleo mamoe e tatau ma lo‘u loto, latou te fafaga ia te outou i le poto ma le faautauta.
16A oo ina faatoateleina outou, ma faauluolaina i le nuu i ia ona po, o loo fetalai mai ai Ieova, ona latou le toe fai ane lea, O le atolaau o le feagaiga a Ieova; e le toe manatua; e le toe ta‘ua foi; e le asiasia; e le toe faia lava.
17O ia ona po e ta‘ua ai e i latou o Ierusalema, O le nofoālii o Ieova; e potopoto nuu ese uma i le suafa o Ieova i Ierusalema; latou te le toe savavali foi e tusa ma le finau vale o latou loto leaga.
18O ona po ia e savavali faatasi ai le aiga o Iuta ma le aiga o Isaraelu, e o mai faatasi foi i latou mai le nuu i le itu i matu, i le nuu na ou foaiina atu e fai mo outou tamā.
19A o a‘u, na ou faapea atu, E faapefea ona ou faatasia oe ma le fanau, ma avatu ia te oe le nuu lelei, o le tofi e matagofie, o ‘au o atu nuu? Ona ou faapea ai lea, E te valaau mai ia te au, Lo‘u tamā e; e te le toe liliu ese foi ia te au.
20E moni, e pei o le fafine ona amio faa‘ole‘ole i lana tane, ua faapea ona amio faa‘ole‘ole ia te au o outou, le aiga o Isaraelu e, o loo fetalai mai ai Ieova.
21Na lagona le leo i luga o mauga tula, o le tagi ma le aioi atu o le fanauga a Isaraelu; auā na latou faapiopio lo latou ala, ua galo ia te i latou o Ieova lo latou Atua.
22Ina toe foi mai ia outou, le fanau liliu ese e, ou te faamaloloina o outou liliu ese; silasila mai ia te i matou, matou te o atu ia te oe, auā o oe Ieova lo matou Atua.
23E moni, e le aoga ona faatuatua i mauga, ma le tele o atu mauga; e moni, o loo ia Ieova lo matou Atua ona faaolaina o Isaraelu.
24Ua ‘aina e le mea e masiasi ai o mea sa tautigaina ai o matou tamā talu ina o matou o taulelea; o a latou lafu mamoe ma a latou lafu povi, o latou atalii ma o latou afafine.
25Ua matou taooto ma lo matou masiasi, ua ufitia lava i matou i lo matou mā; auā ua matou agasala ia Ieova lo matou Atua, o i matou atoa ma o matou tamā, talu ina o matou o taulelea ua oo lava i nei ona po, e lei faalogo foi i matou i le siufofoga o Ieova lo matou Atua.
Who We AreWhat We EelieveWhat We Do
2025 by iamachristian.org,Inc All rights reserved.
