1A e tupu mai le la laau i le pogai o Iese, e tupu ae foi le tatupu i ona aa.
2E afio mau ia te ia le Agaga o Ieova; o le Agaga o le poto ma le mafaufau; o le agaga o le faatonuga ma le malosi; o le Agaga o le malamalama ma le mata‘u ia Ieova.
3E fiafia foi o ia i le mata‘u ia Ieova; e le faamasino o ia e tusa ma le sisila atu o ona fofoga; e le aoai foi o ia e tusa ma le faafofoga o ona taliga.
4A e faamasino o ia ma le tonu i e matitiva, e aoai foi o ia ma le tonu, ona o e faamaulalo o i le lalolagi; na te taia foi le lalolagi i le sasa o lona fofoga, o le mānava foi o lona fofoga, na te fasioti a‘i lē amio leaga.
5E fai le amiotonu ma fusi o lona sulugatiti, e fai foi le faamaoni ma fusi o lona tino.
6E nofo faatasi le luko ma le tamai mamoe, e taoto foi le nameri faatasi ma le tamai ‘oti; e faatasi foi le tamai povi ma le leona taanoa atoa ma le manu peti, e ta‘ita‘iina foi i latou e le tama itiiti.
7E aai faatasi le povi fafine ma le urosa, e taooto faatasi a laua tama; e ‘ai foi e le leona ‘au o saito pei o le povi.
8E taalo foi le tama e lei te‘a ma le susu i le lua o le asipi, o le tama foi ua te‘a ma le susu, e tuu e ia lona lima i le lua o le gata uogo.
9Latou te le faia se mea leaga, latou te le faaumatia foi se mea i lo‘u mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.
10O lea aso foi e tu mai ai le Pogai o Iese, e fai ma tagavai o le nuu, e saili ia te ia o nuu ese; e matagofie foi lona malologa.
11O lea aso foi e toe tuu atu faalua e le Alii lona aao e laveaiina e ua totoe o lona nuu; o e ua totoe i Asuria, ma Aikupito, ma Patoro, ma Kusa, ma Elama, ma Senara, ma Amato, atoa ma nuu tu matafaga.
12E faatuina foi e ia le tagavai mo nuu ese, ma faapotopotoina e ua tulia o Isaraelu, ma aofai e ua faataapeapeina o Iuta i itu e fa o le lalolagi.
13Ona mavae atu ai lea o le mataua o Efaraima, e faaumatia foi e o faasaua ia Iuta; e le mataua Efaraima ia Iuta, e le faasaua Iuta ia Efaraima.
14Latou te felelei atu i tau‘au o Filisitia i sisifo; latou te vete faatasi mea a tagata o sasae; latou te fetagofi ia Etoma ma Moapi; e faalogo foi ia te i latou le fanauga a Amoni.
15E faaumatia lava e Ieova le faga o le sami o Aikupito; e sii foi e ia lona aao i luga o le vaitafe i lona matagi tetele lava, e taia foi e ia e fai ma magāvai e fitu, ma faaui atu ai ia te i latou o faaseevaeina.
16E i ai foi le ala tele mo e ua totoe o lona nuu, o e ua totoe i Asuria; pei ona fai ia Isaraelu, i le aso na ia alu ae ai nai le nuu o Aikupito.
Who We AreWhat We EelieveWhat We Do
2025 by iamachristian.org,Inc All rights reserved.
