1Ua lagona e Atonesateko le tupu o Ierusalema ua aea e Iosua o Ai, ma ua faaumatia e ia; e pei ona faia e ia i Ieriko ma lona tupu, ua faapea lava ona faia e ia i Ai ma lona tupu; ma ua faalelei ma Isaraelu e ua nonofo i Kipeona, ma latou faatasi ma i latou;
2ona latou matuā fefefe ai lea, auā o le aai tele lava Kipeona, e pei o se aai o se tupu; auā foi e sili ia i Ai, o ona tagata uma foi e totoa i latou.
3Ona alu ai lea o le feau a Atonesateko le tupu o Ierusalema ia Oama le tupu o Heperona, ma Pirama le tupu o Iaremuta, ma Iafia le tupu o Lakisa, ma Tiperi le tupu o Ekelona, ua faapea atu,
4O mai ia ia te au, ma fesoasoani mai ia te au e fasi ia Kipeona; auā ua faalelei i latou ma Iosua atoa ma le fanauga a Isaraelu.
5Ona faapotopoto ai lea o tupu e toalima o sa Amorī, o le tupu o Ierusalema, o le tupu o Heperona, o le tupu o Iaremuta, o le tupu o Lakisa, o le tupu o Ekelona, ma latou o ae, o i latou, ma a latou ‘au uma, ona latou to lauapi ai lea i Kipeona, ma latou tau ma ia.
6Ona alu lea o le feau a tagata o Kipeona ia Iosua i le toagālauapi i Kilikala, ua faapea atu, Aua e te lafoaiina au auauna; ia e faataalise ona alu ae ia te i matou, ma faaolaina i matou, ma fesoasoani ia te i matou; auā ua faapotopotoina e tau ma i matou o tupu uma o sa Amorī, o e nonofo i le atu mauga.
7Ona alu ae lea o Iosua nai Kilikala, o ia ma ‘au uma o le taua faatasi ma ia, atoa ma toa malolosi uma.
8Ona fetalai mai lea o Ieova ia Iosua, Aua e te fefe ia te i latou, auā ua ou tuuina atu i latou i ou lima; e leai so latou e tu i ou luma.
9Ua oo faafuasei Iosua ia te i latou; na atoa le po o alu ae ia nai Kilikala.
10Ona tulia lea o i latou e Ieova i luma o Isaraelu, ua fasia foi i latou i le fasi tele i Kipeona; ua tuliloa atu ia te i latou i le ala e alu ae i Peteorana; ua fasi ia te i latou e oo i Aseka ma Maketa.
11Ua sosola i latou i luma o Isaraelu, na i ai i latou i le ifo a‘i i Peteorana, ona lafo ifo lea e Ieova o maa tetele mai le lagi i o latou luga e oo i Aseka, ua oti ai i latou; e toatele o e ua oti i uato‘a i e na fasia e le fanauga a Isaraelu i le pelu.
12Ona fai atu ai lea o Iosua ia Ieova i le aso na tuuina mai ai e Ieova o sa Amorī i luma o le fanauga a Isaraelu, ua faapea atu i luma o Isaraelu, Le la e, ia tumau oe i luga o Kipeona; ma oe le masina i luga o le vanu o Ailona.
13Ona tumau ai lea o le la, sa tu foi le masina, ina seia tauia e le nuu o e ita ia i latou. E le ua tusia ea lenei tala i le tusi a Iasera? Ua tumau le la i totonu o le lagi, ua le vave ona alu ifo, ua tumau pei o se aso atoa.
14E leai foi se aso na muamua pe mulimuli, e tusa ma lena na faafofogaina ai e Ieova le leo o le tagata; auā na tau le taua e Ieova mo Isaraelu.
15Ona toe foi lea o Iosua ma Isaraelu uma faatasi ma ia i le toagālauapi i Kilikala.
16A ua sosola ia tupu e toalima, ma lalafi i latou i le ana i Maketa,
17sa ta‘ua mai ia Iosua, ua faapea mai, Ua maua tupu e toalima, o loo lalafi i latou i le ana i Maketa.
18Ona fai atu ai lea o Iosua, Ia fuli ane ni maa tetele i le gutu o le ana, ma tuu ai ni tagata e leoleo ia te i latou.
19A o outou, aua ne‘i nonofo outou, a ia tuliloa atu i e ita ia te outou, ma fafasi i e o mulimuli, aua ne‘i tuu atu i latou e o i a latou aai; auā ua tuuina mai i latou e Ieova lo outou Atua i o outou lima.
20Ua uma ona fasia i latou e Iosua ma le fanauga a Isaraelu i le fasi e matuā tele lava, ua faaumatia i latou; a o e na sao o i latou na o atu i latou i aai nofo ‘olo.
21Ona toe foi mai lea o le nuu uma ia Iosua i le toagālauapi i Maketa ua saogalemu, ua leai se tasi e faagaoioi lona laulaufaiva i se tasi o le fanauga a Isaraelu.
22Ona fai atu ai lea o Iosua, Ina to ese ia o maa i le gutu o le ana, ma au mai ia te au mai le ana o ia tupu e toalima.
23Ua faapea foi ona latou faia, ua au mai ia te ia mai le ana o ia tupu e toalima, o le tupu o Ierusalema, o le tupu o Heperona, o le tupu o Iaremuta, o le tupu o Lakisa, o le tupu o Ekelona.
24Ua au mai e i latou o ia tupu ia Iosua, ona valaau atu lea o Iosua i tagata uma o Isaraelu, ua faapea atu i e avea ‘au o le taua, o e na o faatasi ma ia, Ina faalatalata mai ia, ma soli i ua o ia tupu i o outou vae. Ona latou faalatalata mai ai lea, ma latou soli i o latou ua i o latou vae.
25Ua fai atu foi Iosua ia te i latou, Aua tou te fefefe, aua foi tou te matatau, ia outou malolosi, ma ia loto tetele; auā e faapea lava ona faia e Ieova i e ita mai uma lava ia te outou, tou te tau ma i latou.
26E mulimuli ane ua taia i latou e Iosua, ma fasiotia, ma faatautau ia te i latou i laau e lima; ona tautau lea o i latou i laau ua oo i le afiafi.
27Ua oo i le itu aso e goto ai le la, ona fai atu ai lea o Iosua, ona ave ifo ai lea o i latou ai laau, ma lafo ia te i latou i le ana na latou lalafi ai; ua latou avane foi maa tetele i le gutu o le ana, e oo lava i le aso nei.
28O le aso lava lea na maua e Iosua o Maketa, ma fasia i le pelu, ua faaumatia foi e ia lona tupu, o i latou, ma tagata uma sa i ai, ua le faatoe e ia se tasi; ua faia e ia i le tupu o Maketa e pei ona faia e ia i le tupu o Ieriko.
29Ona o lea o Iosua ma Isaraelu uma faatasi ma ia nai Maketa i Lipena; ona latou tau ai lea ma Lipena.
30Ua tuuina mai foi e Ieova lea aai ma lona tupu i lima o Isaraelu; ua fasia ai i le pelu, ma tagata uma sa i ai; ua le faatoeina ai e ia se tasi; ua faia foi e ia i lona tupu e pei ona faia e ia i le tupu o Ieriko.
31Ona o lea o Iosua ma Isaraelu uma faatasi ma ia nai Lipena i Lakisa, ma to lauapi i ai, ma tau ai le taua.
32Ua tuuina mai foi e Ieova o Lakisa i lima o Isaraelu, ua latou aea foi i le aso lua, ua fasia i le pelu, ma tagata uma sa i ai, e pei o mea uma na faia e ia i Lipena.
33Ona alu ae lea o Orama le tupu o Kasera e fesoasoani ia Lakisa; ua fasia foi e Iosua o ia ma lona nuu, ua le faatoeina e ia se tasi mo ia.
34Ua o foi Iosua ma Isaraelu uma faatasi ma ia nai Lakisa i Ekelona, ma to lauapi i ai, ma tau ai le taua.
35Ua aea ai foi e i latou i lea aso, ma latou fasia i le pelu, ua faaumatia e ia i lea aso o tagata uma sa i ai, e pei o mea uma na faia e ia i Lakisa.
36Ona alu ae lea o Iosua ma Isaraelu uma faatasi ma ia nai Ekelona i Heperona, ma tau ai le taua.
37Ua latou aea ai, ma fasia i le pelu, ma lona tupu, ma ona aai uma, ma tagata uma sa i ai; ua le faatoe e ia se tasi, e pei o mea uma na faia e ia i Ekelona, ua faaumatia e ia, atoa ma tagata uma sa i ai.
38Ona toe foi mai lea o Iosua ma Isaraelu uma faatasi ma ia i Tiperi, ma tau ai le taua.
39Ona maua ai lea e ia, ma lona tupu, ma ona aai uma; ua fasia i latou i le pelu, ma faaumatia tagata uma sa i ai, ua le faatoe e ia se tasi; e pei ona faia e ia i Heperona, ua faapea foi ona faia e ia i Tiperi ma lona tupu; e pei ona faia foi e ia i Lipena ma lona tupu.
40Ua fasia e Iosua o nuu uma o i le atu mauga, ma le itu i toga, ma le nuu maulalo, ma le eleele laugatasi, ma o latou tupu uma; ua le faatoe e ia se tasi; a ua faaumatia o mea ola uma, e pei ona poloai mai ai Ieova le Atua o Isaraelu.
41Ua fasia i latou e Iosua e afua mai i Katesapanea e oo atu i Kasa, ma le nuu uma o Kosena e oo atu i Kipeona.
42O ia tupu uma ma o latou laueleele na maua e Iosua i le taua e tasi; auā o Ieova le Atua o Isaraelu na tau e ia le taua mo Isaraelu.
43Ona toe foi mai ai lea o Iosua ma Isaraelu uma faatasi ma ia i le toagālauapi i Kilikala.
Who We AreWhat We EelieveWhat We Do
2025 by iamachristian.org,Inc All rights reserved.
