1Ua fetalai mai foi Ieova ia Mose, ua faapea mai,
2Fai atu ia ia Arona ma ona atalii, ia latou faamamao i mea paia a le fanauga a Isaraelu, ina ne‘i faaleagaina lo‘u igoa paia e i latou i mea ua latou faasaina mo a‘u; o a‘u o Ieova.
3Fai atu ia ia i latou, Ai se tagata o lo outou aiga uma i o outou tupulaga amuli, e alu ane o ia i mea paia ua faasaina e le fanauga a Isaraelu ia Ieova, a o loo ia te ia se mea e leaga ai o ia, e vavaeeseina lava lea tagata i o‘u luma; o a‘u o Ieova.
4Ai se tagata o le fanau a Arona ua lepela, po o ua ia te ia se gau, e le ‘ai lava o ia i mea paia, ina seia mamā o ia; ai se pai atu foi i se mea ua leaga ona o le tagata ua oti, po o se tagata ua alu le sua o lona tino;
5ai se tagata foi na te pai atu i se mea totolo e leaga ai o ia, po o se tagata e leaga ai o ia i se mea leaga o ia te ia;
6o le tagata lava na te pai atu i ai, e leaga o ia seia oo i le afiafi, e le ‘ai foi o ia i mea paia seia taelea lava lona tino i le vai.
7A goto le la, ona mamā ai lea o ia; e mulimuli ane ona ‘ai lava lea o ia i mea paia, auā o ana lava mea e ‘ai ia.
8Ai se mea ua mate fua, po o ua saeia, aua le ‘aina lava e ia ne‘i leaga ai o ia ia te ia i lea mea; o a‘u o Ieova.
9Ia latou tausiusi i a‘u sauniga, ina ne‘i nofo sala ai i latou, ma oti ai, pe afai latou te soli ai; o a‘u o Ieova o lē faapaiaina i latou.
10E le ‘ai lava se tasi tagata ese i le mea paia; o le tagata ese ua la mafuta ma le faitaulaga, po o sē ua galue i le totogi, e le ‘ai lava o ia i le mea paia.
11A e afai e faatauina e le faitaulaga se tagata i ana tupe, e ‘ai ai lava o ia, atoa ma le ua fanau mai i lona aiga; latou te aai i ana lava mea e ‘ai.
12Afai foi ua nofo tane le afafine o le faitaulaga i le tagata ese, aua ne‘i ‘ai o ia i se taulaga i mea paia.
13A e afai ua oti le tane a le afafine o le faitaulaga, po ua aleia o ia, ua leai foi sana tama, a ua foi mai o ia i le aiga o lona tamā, e pei ona i ai ina o teine o ia, e ‘ai lava o ia i le mea e ‘ai a lona tamā; a e leai se tagata ese na te ‘ai ai.
14Afai foi e ‘aina e se tagata le mea paia, ma le le iloa, ona faaopoopo atu ai lea e ia lona vaega e lima o mea, ma avatu ai i le faitaulaga, atoa ma le mea paia.
15Aua foi ne‘i leaga ia te i latou o mea paia a le fanauga a Isaraelu, ua latou fai taulaga ai ia Ieova;
16ma latou faanofo sala ia i latou ona o le sese, ina ua latou aai i a latou mea paia; auā o a‘u o Ieova o lē faapaiaina i latou.
17Ua fetalai mai foi Ieova ia Mose, ua faapea mai,
18Ina fai atu ia Arona, ma ona atalii, atoa ma le fanauga uma a Isaraelu, ia faapea atu ia i latou, Ai se tagata o le aiga o Isaraelu, po o se tagata ese e i Isaraelu ua fia avatu sana taulaga i mea uma na ia tauto ai, ma mea uma e fai fua i le loto i mea latou te fai taulaga ai ia Ieova e fai ma taulaga mu;
19tou te faia ma le loto i ai o se manu poa e sao ona lelei, o se povi, po o se mamoe, po o se ‘oti.
20Ai se manu ua i ai se mea leaga, aua tou te avatu ai; auā e le talia lea mo outou.
21Ai se avatu se taulaga faafetai ia Ieova, e faataunuu ai le mea na ia tauto ai, po o le taulaga na te faia fua i lona loto, po o se povi, po o se mamoe, ia sao ona lelei, ina ia talia; aua ne‘i i ai mea e tasi e pona ai.
22O se mea ua tauaso, po ua gau se vae, po ua mutu, po ua i ai se papala, po o se ma‘i pa‘upa‘ua, po o se ma‘i mageso ua poupoua, aua tou te avatu mea ia ia Ieova, aua foi tou te fai a‘i taulaga e fai i le afi i luga o le fata faitaulaga ia Ieova.
23O se povi, po o se tamai mamoe ua i ai se mea faalegatusa, po ua avilu, faitalia lava oe ona fai taulaga ai e fai ma taulaga ua e loto lava ona fai, a e le talia lava lea i le mea na e tauto ai.
24Aua tou te avatu ia Ieova se manu ua tu‘itu‘ia, po ua momomo, po ua omia, po ua seleseleina ona fua manava; tou te le faia foi lea i lo outou nuu.
25Aua foi ne‘i avatua mai le lima o le tagata ese le mea e ‘ai a lo outou Atua i se tasi o ia mea; auā o i ai lo latou leaga, e i ai mea e pona ai i latou; e le talia ia mo outou.
26Ua fetalai mai foi Ieova ia Mose, ua faapea mai,
27A fanaua mai se povi poa, po o se mamoe, po o se ‘oti, ona i ai lea o ia i lona tinā i aso e fitu; a e amata i le aso valu ma aso ua lumanai ona talia ma taulaga e fai i le afi ia Ieova.
28Aua tou te fasia se povi, po o se mamoe, atoa ma lana tama i le aso e tasi.
29Afai foi tou te loto e fai se taulaga faaneenee ia Ieova, ina fai taulaga lava ia ma le loto.
30E ‘aina lava ia i lea lava aso; aua ne‘i totoe sina mea ia te outou seia taeao; o a‘u o Ieova.
31Ia outou tausiusi i a‘u poloaiga, ma ia outou faia; o a‘u o Ieova.
32Aua foi tou te faaleagaina lo‘u igoa paia; a ia faapaiaina lava a‘u i le fanauga a Isaraelu; o a‘u o Ieova o lē faapaiaina outou;
33o le au mai ia te outou nai le nuu o Aikupito, e fai mo outou Atua; o a‘u o Ieova.
Who We AreWhat We EelieveWhat We Do
2025 by iamachristian.org,Inc All rights reserved.
