IEREMIA, 27 - Samoan Old Version Bible

O LE MATAUPU XXVII.O le faatoilaloina o malo uma e Nepukanesa.

1O le amataga o le nofoaiga a Ioakima le atalii o Iosia, le tupu o Iuta, na oo mai ai lenei afioga ia Ieremia mai ia Ieova, ua faapea mai,

2Ua faapea ona fetalai mai o Ieova ia te au, Ia e faia mo oe noanoaga ma amo, ma faaee ai i luga o lou ua;

3ia e avatu ai foi i le tupu o Etoma, ma le tupu o Moapi, ma le tupu o le fanauga a Amoni, ma le tupu o Turo, ma le tupu o Saitonu, i lima o sāvali, o e o mai i Ierusalema ia Setekaia le tupu o Iuta;

4ia e fai atu foi ia te i latou, ia latou faapea atu i o latou alii, O loo faapea ona fetalai mai o Ieova o ‘au, le Atua o Isaraelu, Ia faapea ona outou fai atu i o outou alii,

5O a‘u nei, ua ou faia le lalolagi, o tagata ma manu ua i luga o le fogāeleele, i lo‘u mana tele, ma lo‘u lima faaloaloa; ua ou tuuina atu ai foi i le ua tatau ma lo‘u manatu.

6O lenei, ua ou tuuina atu e a‘u o ia nuu uma i le lima o Nepukanesa le tupu o Papelonia, la‘u auauna; o manu feai foi ua ou tuuina atu ai ia te ia, e auauna ia te ia.

7E auauna lava atu nuu uma ia te ia, ma lona atalii, ma le atalii o lona atalii, seia oo i ona lava po o lona nuu; ona auauna lea o ia i nuu e tele ma tupu sili.

8A o le nuu ma le malo e le mafai ona auauna i lena Nepukanesa le tupu o Papelonia, e le tuuina atu foi o latou ua i le amo a le tupu o Papelonia, ou te taui atu i lena nuu i le pelu, ma le oge, ma le faamai, o loo fetalai mai ai Ieova, seia ou faaumatia i latou i lona lima.

9O lenei, aua ne‘i outou faalogo i o outou perofeta, ma o outou taulāitu, ma o outou fai miti, ma o outou tagata e iite i ao o le lagi, ma e fai togafiti faataulāitu ia te outou, o i latou o e fai atu ia te outou, ua faapea atu, E le fai ma auauna outou i le tupu o Papelonia.

10Auā o mea pepelo ua latou vavalo ai ia te outou, ina ia avemamaoina outou i lo outou laueleele; ia ou tulia foi outou, ma ia faaumatia outou.

11A o le nuu, e tuuina o latou ua i le amo a le tupu o Papelonia, ma auauna ia te ia, ou te tuuina atu i latou ia nofo pea i lo latou laueleele, o loo fetalai mai ai Ieova, latou te galulue ai, ma latou nonofo ai.

12Na a‘u fai atu foi ia Setekaia, le tupu o Iuta, e tusa ma ia upu uma, ua faapea atu, Ia outou tuuina o outou ua i le amo a le tupu o Papelonia, ma auauna ia te ia ma lona nuu, ia ola ai outou.

13Se a ea le mea tou te fia oti ai, o oe ma lou nuu, i le pelu, ma le oge, ma le faamai, e pei ona fetalai mai ai o Ieova i le nuu e le auauna i le tupu o Papelonia?

14Aua tou te faafofoga i upu a perofeta, o e fai mai ia te outou, ua faapea mai, E le fai outou ma auauna i le tupu o Papelonia; auā o mea pepelo ua latou vavalo ai ia te outou.

15Auā o loo fetalai mai Ieova, ua ou le aauina atu i latou, a ua latou vavalo i le pepelo i lo‘u igoa; ina ia ou tulia outou, ma ia faaumatia outou, o outou, ma perofeta o e vavalo ia te outou.

16Na ou fai atu foi i faitaulaga ma lenei nuu uma, ua faapea atu, O loo faapea ona fetalai mai o Ieova, Aua tou te faalogo i upu a o outou perofeta, o e vavalo ia te outou, ua faapea mai, Faauta, e taalise ona toe aumaia mai Papelonia o ipu o le fale o Ieova; auā o mea pepelo ua latou vavalo ai ia te outou.

17Aua tou te faalogo ia te i latou; ia outou auauna i le tupu o Papelonia, ia ola ai outou; se a le mea e fai ai lenei aai ma faatafunaga?

18Afai foi o perofeta i latou, pe afai foi ua ia te i latou le afioga a Ieova, se‘i latou faatoga atu ia Ieova o ‘au, ina ia le oo atu i Papelonia o ipu o totoe i le fale o Ieova, ma le fale o le tupu o Iuta, ma Ierusalema.

19Auā o loo faapea ona fetalai mai o Ieova o ‘au, i pou, ma le vai, ma tuugataelega, ma toe ipu ua tuu i lenei aai,

20o mea ia na le avea ai e Nepukanesa le tupu o Papelonia i lona ave faatagataotaua ia Iekonia le atalii o Ioakima, le tupu o Iuta, ma alii uma o Iuta ma Ierusalema mai Ierusalema i Papelonia.

21Auā o loo faapea ona fetalai mai o Ieova o ‘au, le Atua o Isaraelu, i ipu ua totoe i le fale o Ieova, ma le fale o le tupu o Iuta, ma Ierusalema,

22e aveina atu ia mea i Papelonia, e i ai foi i lea mea seia oo i le aso ou te asiasi atu i ai, o loo fetalai mai ai Ieova; ona ou toe aumaia lea, ma faafoisia mai ia mea i lenei mea.