1Na sii mai le taua e Filisitia ia Isaraelu; ona sosola lea o tagata Isaraelu ai luma o Filisitia, ua pauu i latou i le mauga o Kilepoa ua manunua.
2Ua tulitatao Filisitia ia Saulo ma ona atalii, ma ua fasiotia e Filisitia o Ionatana, ma Apinatapa, ma Makisua, o atalii o Saulo.
3Ua mamafa le taua ia Saulo, ua maua atu o ia e tagata fanafana u, ma ua manua o ia i e na fanafana.
4Ona fai atu lea o Saulo i lona soātau, Ina to ae ia lau pelu, ma tutu‘i mai ia te au, ne‘i oo mai na tagata le peritomeina, ma faaleaga mai ia te au; a ua le mafai lona soātau, auā ua tele lona fefe; ona tago ai lea o Saulo i le pelu, ma faapaū i ona luga.
5Ua vaai lona soātau, ua oti Saulo, ona faapaū foi lea o ia i luga o le pelu, ua oti ai.
6O lea ua oti ai Saulo, ma ona atalii e toatolu, ma lona aiga uma ua oti faatasi.
7Ua vaai tagata o Isaraelu uma sa i le vanu, ua sosola i latou, ma ua oti Saulo ma ona atalii; ona tiai ai lea e i latou o a latou aai, ma sosola i latou; ona o mai lea o Filisitia, ma nonofo ai.
8Ua oo i le taeao, ona o atu lea o Filisitia e tatala ofu o e na fāsia; ona latou maua lea o Saulo ma ona atalii o loo taatitia i le mauga o Kilepoa.
9Ua latou talaeseina ona ofu, ona latou ave ai lea o lona ulu ma ana auupega; ona latou tuu sāvali ai lea i le nuu o Filisitia, ia faataamilo ona tala‘i i a latou tupua, atoa ma le nuu.
10Ua latou tuu ona ofutau i le fale o latou atua, ma ua faamauina lona ulupoo i le fale o Takono.
11Ua faalogo Iapese-Kiliata uma i mea uma sa faia e Filisitia ia Saulo,
12ona tutū ai lea o tagata totoa uma, ma ua latou ave le tino o Saulo ma tino o ona atalii, ua au mai i Iapese, ua tanu o latou ivi i lalo o le tapeneto i Iapese, ma ua latou anapopogi ai i aso e fitu.
13O lea na oti ai Saulo ona o lana agasala na na agasala atu ai ia Ieova, o le afioga lava a Ieova na ia le usiusitai i ai, ua saili foi i le aitu vavalo e fesili i ai.
14A ua le fesili atu ia Ieova, o le mea lea na fasiotia ai o ia; ua liua foi le malo mo Tavita le atalii o Iese.
Who We AreWhat We EelieveWhat We Do
2025 by iamachristian.org,Inc All rights reserved.
