1Ua fetalai mai Ieova ia Mose, Faauta mai, ua ou tofia oe e fai ma Atua ia Farao, o lou uso foi o Arona, e fai o ia ma perofeta ia te oe.
2E te fai atu mea uma lava ou te fai atu ai ia te oe; e tautala atu foi lou uso o Arona ia Farao, ina ia tuu atu e ia o le fanauga a Isaraelu e o ese i lona nuu.
3O a‘u foi ou te faamaaa i le loto o Farao, ou te faatele foi o‘u faailoga ma o‘u vavega i le nuu o Aikupito;
4a e le faalogo mai Farao ia te oulua; ona ou faaoo lea o lo‘u lima i Aikupito, ou te aumaia foi o a‘u ‘au, o lo‘u nuu lava o le fanauga a Isaraelu, mai le nuu o Aikupito i sala tetele.
5E iloa foi e Aikupito, o a‘u lava o Ieova, pe a ou faaloaloa lo‘u lima i luga o Aikupito; ou te aumaia foi le fanauga a Isaraelu ai totonu ia i latou.
6Ona faia lea e Mose ma Arona e pei ona fetalai mai ai o Ieova ia te i laua, sa faapea lava ona fai e i laua.
7O tausaga o Mose ua valugafulu; o tausaga foi o Arona ua valugafulu ma le tolu, ina ua tautala atu i laua ia Farao.
8Ua fetalai mai foi Ieova ia Mose ma Arona, ua faapea mai,
9A fai mai Farao ia te oulua, ua faapea mai, Ina faia se vavega e oulua; ona e fai atu lea ia Arona, Tago ia i lou tootoo, ma lafo i luma o Farao, ona liu gata ai lea.
10Ona o atu lea o Mose ma Arona ia Farao, ua la faia faapei ona fetalai mai ai o Ieova; ua lafo e Arona lona tootoo i luma o Farao ma ana auauna, ona liu gata ai lea.
11Ona valaau atu lea e Farao i le au popoto ma taulāitu; ua faapea foi ona fai e taulāitu a Aikupito i a latou togafiti faataulāitu.
12Auā ua latou taitasi ma lafo lona tootoo, ona liu gata ai lea; a ua folo o latou tootoo e le tootoo o Arona.
13A ua faamaaaina le loto o Farao, e lei faalogo foi o ia ia i laua, faapei ona fetalai mai ai o Ieova.
14Ua fetalai mai foi Ieova ia Mose, Ua maaa lava le loto o Farao, e le mafai e ia ona tuu atu o le nuu e o.
15Ina alu ia oe ia Farao i le taeao; faauta, o le a alu atu o ia i le vai; e te tu atu foi lua te fetaiai ma ia i le auvai o le vaitafe; o le tootoo foi sa liu gata e te ave i lou lima.
16E te fai atu foi ia te ia, Ua auina mai a‘u ia te oe e Ieova le Atua o sa Eperū, o loo fetalai mai, Ia e tuu mai lo‘u nuu e o, ina ia latou auauna mai ia te au i le vao; faauta foi, ua o le āu faalogo mai lava.
17O loo faapea ona fetalai mai Ieova, O le mea nei e te iloa ai, o Ieova lava a‘u; faauta, ou te ta i lenei tootoo ua i lo‘u lima i le vai o le vaitafe, ona liu toto ai lea;
18e mamate ai i‘a o i le vaitafe, e elo foi le vaitafe; ona ‘ino‘ino ai lea o Aikupito ona inu i le vai mai le vaitafe.
19Ua fetalai mai foi Ieova ia Mose, Ia e fai atu ia Arona, Ina tago ia i lou tootoo, ma faaloaloa lou lima i luga o vai o Aikupito, i o latou vaitafe, ma o latou vaita‘i, ma o latou vailepa, ma mea uma lava e i ai o latou vai, ina ia liu toto; ina ia i ai toto i le nuu uma lava o Aikupito, i ipu laau atoa ma ipu maa.
20Ua faapea ona fai e Mose ma Arona, pei ona fetalai mai o Ieova; ua ia sii i luga foi le tootoo, ma ta le vai o le vaitafe i luma o Farao ma ana auauna; ona liu toto ai lea o le vai uma lava o le vaitafe.
21Ona mamate ai lea o i‘a sa i le vaitafe, ua elo foi le vaitafe, e le mafai e Aikupito ona inu i le vai o le vaitafe, sa i ai le toto i le nuu uma lava o Aikupito.
22Ona faapea lea ona fai e taulāitu o Aikupito i a latou togafiti faataulāitu; ona faamaaaina ai lea o le loto o Farao, ua le faalogo foi ia te i laua, faapei ona fetalai mai ai o Ieova.
23Ona liliu ai lea o Farao, ua alu i lona fale, e lei mafaufau foi o ia i lenei mea.
24Ona eli lea o Aikupito uma i tafatafa o le vaitafe ia maua le vai latou te inu ai; auā e le mafaia e i latou ona inu o le vai nai le vaitafe.
25Ua faaatoa foi ona aso e fitu, talu ona taia e Ieova o le vaitafe.
Who We AreWhat We EelieveWhat We Do
2025 by iamachristian.org,Inc All rights reserved.
