1Ua ou i luga o la‘u moega i le po, na ou saili ai i le ua manao i ai lo‘u loto. Ua ou saili ia te ia, a e lei maua o ia.
2Ou te tulai ma fealualuai i le aai, i ala ma malae, ou te sailiili ai i le ua manao i ai lo‘u loto; ua ou sailiili ia te ia, a e lei maua.
3Na maua a‘u e leoleo e feoai i le aai; ua ou faapea atu i ai, Ua outou iloa ea le ua manao i ai lo‘u loto?
4E lei ata tuanai ia te i latou, ua ou maua loa le ua manao i ai lo‘u loto; na ou taofi ia te ia, ou te lei toe tuuina o ia seia ta‘ita‘iina atu ia te ia i le fale o lo‘u tinā, i le potu o le na fanaua a‘u.
5Tama fafine a Ierusalema e, ou te fai atu ia te outou, ia tauto mai i sevi ma aila o le vao, tou te le tatatuli pe fafagu i la‘u pele, seia faitalia o ia.
6O ai ea lena o loo alu ae nai le vao e faapei o le asu faaniutu, o loo nanamu i le pulu muro, ma le pulu lipano, ma mea manogi uma ua nutililiia a le tagata faatauoa?
7Faauta mai ia, o lona moega, o le moega o Solomona, ua vagavagaia i toa e toaonogafulu nai le au totoa o Isaraelu.
8Ua taitasi uma ma ‘u‘u i lana pelu, ua a‘oa‘oina i le taua; o le tagata ma lana pelu i lona vae ona o le mata‘u i le po.
9Ua faia e le tupu o Solomona le fata mona i laau mai Lepanona.
10Ua ia faia ona pou i le ario, o ona faalava i le auro, o lona nofoa i le ie pāuli; ua folasia faamatagofie i totonu i mea alofa mai tama fafine a Ierusalema.
11Tama fafine a Siona e, o atu ia, ina matamata i le tupu o Solomona ma le pale na faapaleina ai o ia e lona tina i le aso na fai avā ai o ia, le aso foi na fiafia ai lona finagalo.
Who We AreWhat We EelieveWhat We Do
2025 by iamachristian.org,Inc All rights reserved.
