1O le tolu o tausaga o Hosea le atalii o Ele le tupu o Isaraelu na fai ai ma tupu Esekia le atalii o Aasa le tupu o Iuta.
2O le luafulu ma le lima o ona tausaga na fai ai o ia ma tupu; o tausaga e luafulu ma le iva na tupu ai o ia i Ierusalema. O le igoa foi o lona tinā o Avi o le afafine o Sakaria.
3Ua ia faia le amiotonu i luma o Ieova, faapei o mea uma na faia e Tavita lona tamā.
4Ua ia aveeseina mea maualuluga, ua ia tu‘ipalaina foi tupua, ua na vavae i lalo foi tupua o Asaira, ua na tu‘ininiia foi le gata ‘apa memea na faia e Mose; auā e oo lava i ona po ia na faamu i ai mea manogi e le fanauga a Isaraelu, na na ta‘ua ai foi, o le fasi ‘apa memea.
5Ua ia faatuatua ia Ieova le Atua o Isaraelu; ua leai foi se la te tutusa ma ia i tupu uma o Iuta na mulimuli ia te ia, atoa foi ma e na muamua ia te ia.
6Ua ia pipii lava ia Ieova, ua le tuua lava lona mulimuli atu ia te ia, a ua tausi lava ana poloaiga na poloai mai ai Ieova ia Mose.
7Sa ia te ia Ieova, na manuia ai foi o ia i mea uma na ia alu i ai; ua foua foi e ia le tupu o Asuria, ma ua le auauna ia te ia.
8Ua ia fasia Filisitia e oo lava i Kasa ma ona nuu; o le pae o tagata leoleo atoa ma le aai nofo ‘olo.
9O le fa o tausaga o le tupu o Esekia, o le fitu foi lea o tausaga o Hosea le atalii o Ele le tupu o Isaraelu, na alu ae ai o Salemanesa le tupu o Asuria i Samaria, ua ia vagaia.
10Ua mavae foi tausaga e tolu ona aea ai lea; o le tausaga e ono o Esekia, o le tausaga e iva foi lea o Hosea le tupu o Isaraelu, na aea ai Samaria.
11Ona faatāfeaina lea o Isaraelu i Asuria e le tupu o Asuria, ua na tuu atu ia te i latou i Hala ma Havoli e lata ane i le vaitafe o Kosane, atoa ma aai o Metai.
12Auā na latou le faalogo i le siufofoga o Ieova lo latou Atua, a ua soli lana feagaiga, atoa ma mea uma na poloai mai ai Mose le auauna a Ieova, ua latou le faalogo i ai, ma ua le faia.
13O le sefulu ma le fa o tausaga o le tupu o Esekia na sii ai le taua e Sanerivi le tupu o Asuria i aai nofo ‘olo uma o Iuta, ma na aea ai.
14Ona tuu atu ai lea e Esekia le tupu o Iuta o le sāvali i le tupu o Asuria i Lakisa, ua faapea atu, Ua ou sese; ia e toe afio ese ia te au; a o le mea e te totogi mai ai ia te au, ou te faia lea. Ona totogi mai ai lea o le tupu o Asuria ia Esekia le tupu o Iuta o taleni ario e tolu selau, ma taleni auro e tolugafulu.
15Ona avatu ai lea e Esekia o ario uma na i ai i le fale o Ieova, ma mea e teu ai oloa i le fale o le tupu.
16O ona po ia na fofoe ese ai e Esekia o auro sa i puipui o le malumalu o Ieova, atoa ma pou na ufiufi i le auro e Esekia le tupu o Iuta, ua na avatu ai i le tupu o Asuria.
17Ua aauina mai foi e le tupu o Asuria o Taretana, ma Ravesarisa, ma Ravesaki, ma ‘au e tele mai Lakisa i le tupu o Esekia i Ierusalema. Ona latou o ae ai lea, ua oo i Ierusalema. Ua o ae i latou, ona o mai ai lea, ua tutū latalata ane i le alavai o le vailepa aupitoaluga, o i le ala tele o le fanua o le ta ofu.
18Ua latou valaau mai i le tupu, ona o atu ai lea ia te i latou o Eliakimo le atalii o Hilikia o le na pule i le aiga, ma Sevena le tusiupu, ma Ioaa le atalii o Asafo le fātuaiupu.
19Ona fai mai ai lea o Ravesaki ia te i latou, Ia outou fai atu ia Esekia, O loo faapea ona fetalai mai o le tupu silisili, o le tupu o Asuria, Pe se a lea faatuatuaga ua e faatuatua i ai?
20Ua e faapea ane (a o upu faatuavaa lava) ua ia te oe le poto ma le malosi e fai a‘i taua. O lenei, pe e te faatuatua ia te ai, ua e foua ai a‘u?
21Faauta nei, ua e tōonai i lea tootoo u ua gapēpē o Aikupito, pe a totoo i ai se tagata e tuai ai lona lima e ati; e faapea lava Farao le tupu o Aikupito ia te i latou uma o e faatuatua ia te ia.
22A e afai tou te faapea mai ia te au, Matou te faatuatua ia Ieova lo matou Atua; e le o ia ea ua aveeseina ai e Esekia o ana mea maualuluga, ma ona fata faitaulaga, ma ua fai atu ia Iuta ma Ierusalema, Ia outou tapuai i luma o lenei fata faitaulaga o i Ierusalema?
23O lenei, ina au mai ia ni mea e tuu faafaatau i lo‘u alii le tupu o Asuria, ona ou avatu ai lea ia te oe o solofanua e lua afe, pe afai e te mafaia e oe ona ia tofu ma se tietie ai.
24A e mafai faapefea ona e tulia se tasi ta‘ita‘i o auauna e aupito ona faatauvaa a lo‘u alii, a e faatuatua i Aikupito e maua ai kariota ma ‘au e tietie i solofanua?
25Fā‘i ea ua ou sau nei e aunoa ma Ieova i lenei mea e faaumatia ai? Na fetalai mai Ieova ia te au, ou te alu ae i lenei nuu ia faaumatia.
26Ona faapea atu ai lea o Eliakimo le atalii o Hilikia, ma Sevena, ma Ioaa, ia Ravesaki, Ia e fetalai mai i au auauna i le gagana a Arama, auā matou te lagona ai; a e aua e te fetalai mai ia te i matou i le gagana a Iuta ma le faalogo mai o tagata o i luga o le pa.
27Ona tali mai ai lea o Ravesaki ia te i latou, Ua auina mai ea a‘u e lo‘u alii i lou alii atoa ma oe e tautala atu ai i ia upu, a e lei auina ea i tagata o e nonofo i luga o le pa, ina ia latou topalega, ma feinu i o latou lava miaga faatasi ma outou?
28O na tu mai ai lea o Ravesaki, ua alaga ua leo tele i le gagana a Iuta, ua faapea mai lana upu, Faalogologo mai ia i le afioga a le tupu silisili, o le tupu o Asuria;
29o loo faapea ona fetalai mai o le tupu, Aua ne‘i olegia outou e Esekia, auā na te le mafaia ona laveai ia te outou ai lona lima.
30Aua ne‘i faatupuina foi e Esekia so outou faatuatua ia Ieova, o loo faapea ane o ia, E laveai mai lava Ieova ia te i tatou, e le tuuina atu foi lenei aai i le lima o le tupu o Asuria.
31Aua ne‘i outou faalogo ia Esekia; auā o loo faapea ona fetalai mai o le tupu o Asuria, Ina au mai ia te au se mea alofa, ma ia o mai ia te au, ona outou aai ai lea taitasi i lona lava vine, e taitasi foi i lona lava mati, ma outou feinu foi taitasi i le vai o lona lava vaieli,
32seia ou alu atu e ave ia te outou i le nuu faapei o lo outou lava nuu, o le nuu o i ai saito ma uaina, o le nuu o i ai areto ma tovine, o le nuu o i ai le suāuu olive ma le meli; ina ia ola outu, a e le oti; aua foi tou te faalogo ia Esekia i lona faa‘ole‘ole ia te outou, o loo faapea ane, E laveai mai Ieova ia te i tatou.
33Pe ai se atua o i se nuu ua na laveai i lona nuu ai le lima o le tupu o Asuria?
34Po o ifea atua o Amato ma Arepa? Po o ifea atua o Sefavaima, o Ena ma Iva? Po ua latou laveai ea i Samaria ai lo‘u lima?
35Po o ai ni atua uma o nuu ua laveai i o latou nuu ai lo‘u lima, ina ia laveai e Ieova i Ierusalema ai lo‘u lima?
36A ua faalologo le nuu, ua latou le tali atu se upu ia te ia, auā sa faapea mai le poloaiga a le tupu, Aua ne‘i tali atu ia te ia.
37Ona o mai ai lea o Eliakimo le atalii o Hilikia lē pule i le aiga, ma Sevena le tusiupu, ma Ioaa le atalii o Asafo le fatuaiupu, ia Esekia, ma o latou ofu ua saei, ua latou tala mai ia te ia o upu a Ravesaki.
Who We AreWhat We EelieveWhat We Do
2025 by iamachristian.org,Inc All rights reserved.
