1Ua faapea ona fetalai mai o Ieova i le fanauga a Amoni, E leai ea ni atalii o Isaraelu? e leai ea sona suli? Se a foi le mea ua fai ai Kato e Malekama mona, ua nonofo foi ona tagata i ona aai?
2O le mea lea faauta, e oo ai i ona po, ua fetalai mai ai Ieova, ou te faafaalogoina le alaga o le taua i Rapa, o le aai o le fanauga a Amoni; e fai ia ma mea mautietie, o le faatafunaga lava, e susunuina ona faoa aai i le afi; ona fai ai lea e Isaraelu o i latou mona, o e sa fai o ia mo i latou, ua fetalai mai ai Ieova.
3Hesepona e, ina uio ia, auā ua faatafunaina o Ai; ina alalaga ia, outou tama fafine o Rapa, ina lavalava ia o outou i ie talatala; ina taufaitagitu‘i ia, ma fetaufetuliai i aupa; auā e alu Malekama i le tafeaga, o ona faitaulaga atoa ma ona alii faatasi ma ia.
4Se a le mea ua e mitamita ai i vanu, o lou vanu ua tafe, o oe na le tama fafine ua liliu ese? o lē faatuatua i ana oloa, ua faapea mai, O ai ea e sau ia te au?
5Ua fetalai mai le Alii, o Ieova o ‘au, Faauta, ou te faaoo ia te oe le mata‘u, mai ia te i latou o i ou itu uma lava; e tulia foi outou e taitoatasi i le mea ua i ona luma; e leai foi se tasi e faapotopoto i e ua sosola.
6E mulimuli ane ona ou faafoisia mai lea o le tafeaga o le fanauga a Amoni, ua fetalai mai ai Ieova.
7O loo faapea ona fetalai mai o Ieova o ‘au ia Etoma, E le toe ai ea se poto i Timanu? ua fano ea le faautauta ai tagata mafaufau? ua mavae ea lo latou poto?
8O outou o e nonofo i Titana, ina sosola ia outou, ina liliu ia, ia outou nonofo i mea maulalo; auā ou te faaoo le malaia o Esau i ona luga, o ona po lava ou te taui atu ai ia te ia.
9Ana o atu ia te oe o e tau vine, po ua latou le faatotoe ea ni toe fuifui vine? ana o atu ia te oe o e gaoi i le po, po ua latou le faaumatia ea mea e tusa ia i latou?
10Auā ua ou suena Esau, ua ou faaalia foi ana mea lilo, na te le mafaia ona lafi; ua faaumatia lana fanau, ma ona uso, ma i latou sa tuaoi ma ia; o ia foi ua leai.
11Ina tuua ia au tama ua aumatuā, ou te faaola ia te i latou; ia faatuatua mai foi ia te au ou fafine ua oti a latou tane.
12Auā o loo faapea ona fetalai mai o Ieova, Faauta, o i latou e le tatau ona latou inu i le ipu, ua latou inu ai lava; a o oe, e faasaoina ea oe? e le faasaoina lava oe, auā e te matuā inu lava.
13Auā ou te tauto lava a‘u ia te au, ua fetalai mai ai Ieova, e fai lava Posara ma mea e ofo ai, ma fai a‘i luma, ma mea gaogao, ma faafanoga; e fai foi ona aai uma ma faatafunaga e faavavau.
14Ua ou faalogo i le tala mai ia Ieova, ua auina atu foi le sāvali i nuu ese, ua faapea atu, Ina faapotopoto ia outou, ma ia outou o mai ia te ia, ma ia tulai atu outou e tau ai le taua.
15Auā faauta, ua ou faia oe ia faatauvaa i nuu, ia inosia oe e tagata.
16O lou matautia, ma le faamaualuga o lou loto ua faaseseina ai oe, o oe o loo nofo i ana o le papa, o le ua nofoia ai le mea maualuga o le mauga; e ui ina maualuga le mea e te tuu ai lou ofaga e pei o le aeto, ou te lafo ia te oe i lalo i lea mea, o loo fetalai mai ai Ieova.
17E fai foi Etoma ma faatafunaga; o i latou uma e ui ane ai e taitasi ma ofo, ma uisa i ona mala uma.
18E pei o le faaumatia o Sotoma mo Komoro, ma e sa latou tuaoi, o loo faapea mai ai Ieova, e le nofo ai se tasi i lea mea, e le mau ai foi se atalii o se tagata.
19Faauta, e alu ae o ia e pei o le leona ai le matagofie o Ioritana, i le mea malosi e mau ai; auā ou te faaoso ia te ia ia faavave ona alu ese o ia ia te ia, e pei o le emo o le mata; o ai foi le tagata filifilia ou te tofia e tau ma ia? auā po o ai ea e tusa ma a‘u? o ai foi e atofa ni aso ia te au? o ai foi lena leoleo mamoe e mafai ona tu i o‘u luma?
20O le mea lea ia outou faalogologo mai ai i le pule a Ieova ua ia pule ai ia Etoma, ma ona mafaufauga ua ia mafaufau ai ia leaga ai e o nonofo i Tamanu, E moni, e tosina i latou e le aupito itiiti o le lafu mamoe; e moni, na te faatafunaina i o latou luga le mea latou te mau ai.
21O le taalili o lo latou paū ua luluina ai le lalolagi; o le leo foi o lona alaga ua lagona lea i le sami Ulaula.
22Faauta, e alu ae o ia ma lele e pei o le aeto, e fālō foi e ia ona apaau i luga o Posara; e avea foi loto o toa o Etoma i lea lava aso, e pei o le loto o le fafine ua faatiga.
23 O le upu ia Tamaseko. Ua faamaina Amato, ma Arepa; auā ua latou faalogo i le tala leaga; ua liu suāvai i latou; o loo i le sami le atuatuvale; e le mafai ona to‘a filemu.
24Ua faavaivai Tamaseko, ua liliu o ia a sola, ua maua o ia i le mata‘u; ua maua foi o ia i le puapuaga ma le faatiga, e pei o le fafine o le a fanau.
25Pe faapefea ona le tuua le aai sa viia, le aai na ou fiafia i ai?
26O le mea lea e pauu ai ona taulelea i ona malae, e fano foi i lea lava aso ona tagata tau uma, ua fetalai mai ai Ieova o ‘au.
27Ou te faamu foi le afi i le pa o Tamaseko, e faaumatia ai foi maota o Peniata.
28O loo faapea ona fetalai mai o Ieova ia Kitara, ma malo o Hasora, e na fasia e Nepukanesa le tupu o Papelonia, Ina tulai ia outou, ia o ae i Kitara, ma ia outou faaumatia tagata i sasae.
29Latou te faoa o latou fale ie ma o latou lafu mamoe; latou te avea foi mo i latou o latou ie puipui, ma a latou mea uma, ma a latou kamela; e alalaga foi i latou ona o i latou, O i ai le mata‘u i itu uma.
30O outou o e nonofo i Hasora, ina sosola ia, ia outou matuā sosola lava, ia outou nonofo i mea maulalo, o loo fetalai mai ai Ieova; auā ua pulea outou e Nepukanesa le tupu o Papelonia, ua na mafaufau foi i se togafiti e leaga ai outou.
31Ina tulai ia, ma ia outou o ae i le nuu ua filemu, o e nonofo faatalanoa, ua fetalai mai ai Ieova, e leai ni o latou puipui, e leai foi ni faamau faalava, ua nonofo i latou na o i latou lava.
32O a latou kamela foi e fai ia ma vete, ma a latou lafu e tele e fai ma mea faoa; ou te faataapeapeina foi i mata matagi uma o i latou o e sala a latou pito ‘ava; ou te aumaia foi lo latou malaia ai ona itu uma, o loo fetalai mai ai Ieova.
33E fai foi Hasora ma mea e fale ai luko, o le faatafunaga e oo i le faavavau; e le nofo ai se tagata i lea mea, e le mau ai foi se atalii o se tagata.
34O le afioga a Ieova na oo mai ia Ieremia le perofeta ia Elama, i le amataga o le nofoaiga a Setekaia le tupu o Iuta, ua faapea mai,
35O loo faapea ona fetalai mai o Ieova o ‘au, Faauta, ou te gausia le aufana a Elama, o le mea sili lea e malolosi ai i latou.
36Ou te aumaia foi matagi e fa mai itu e fa o le lagi i luga o Elama, ma ou faataapeapeina i latou i ia matāmatagi uma; e leai foi se nuu e le oo atu i ai tagata Elama ua tulia.
37Ou te faamatatau foi Elama i luma o e ita mai ia te i latou, ma luma o e saili e fasioti ia te i latou; ou te faaoo le malaia i o latou luga, o lo‘u ita tele, ua fetalai mai ai Ieova; ou te aveina atu foi le pelu e mulimuli atu ia te i latou, seia ou faaumatia i latou.
38Ou te tuuina lo‘u nofoālii i Elama, ou te faaumatia foi i lea mea le tupu ma alii, ua fetalai mai ai Ieova.
39A e oo i ona po amuli, ona ou faafoisia mai ai lea o le tafeaga a Elama, ua fetalai mai ai Ieova.
Who We AreWhat We EelieveWhat We Do
2025 by iamachristian.org,Inc All rights reserved.
